[校園][純愛]《幸運星下的預言》: 第一百一十章

好記得有一日

自修室好嘈

多咗好多細路仔喺度玩

啲家長又由佢地

完全唔知咁樣係騷擾緊人



唔識教就唔好生啦

算數唔緊要

我地走

我:「咁依家去邊呀」

筱瑜:「係囉想溫多陣」



我:「Starbucks好似有啲遠

喺條街又溫唔到架啦

邊個地方好」

筱瑜:「等我諗下先」

我:「諗唔到呢」



筱瑜:「哈哈你又知嘅」

我:「我係你邊個

點會睇唔出呢

傻豬嚟嘅」

筱瑜:「係喇最叻係你呀

咁去邊呀」

我:「去我屋企囉好冇

不過我呀媽喺度



我同佢講聲先」

筱瑜:「會唔會麻煩到佢呀

真係冇地方咪下次先一齊溫囉

今日各自溫住先」

我:「得啦冇野呀」

上次見佢對住佢呀媽原來係咁嘅反應

咁我費事提議去佢嗰度啦



同埋小弟屋企雖然唔係大

不過要帶人上嚟溫書都絕對夠空間

跟住我就打俾老母

我:「呀媽呀

我依家同個同學上嚟溫書呀」

老母:「哦

佢今晚喺唔喺度食飯呀」

跟住我就問筱瑜今晚喺唔喺度食飯



筱瑜:「我驚麻煩到你喎」

跟住我同返老母講

我:「佢話驚麻煩你喎

如果你冇諗住煮我地飯咪出去食囉

冇所謂呀」

老母:「麻乜鬼

得喇今晚三個食啦



反正你老豆加班有你兩個陪食飯」

我:「咁我依家嚟啦

到時唔好咁嘈呀真係要溫書」

老母:「得啦」

筱瑜:「auntie點講呀」

我:「冇問題呀煮埋你飯喎

依家上去啦」

就係咁

筱瑜就第一次上我屋企喇。


去到樓下

筱瑜佢話過門都係客

點都要買啲野上去

原本想例牌買個花籃

跟住我話我屋企淨係買橙

買完返嚟都係俾我食

跟住我叫佢買魷魚絲啦

因為我老母好撚鍾意食

上緊去嗰陣冇拖住手

因為去到呢一刻我老母都係唔知佢個仔已經拍緊拖

一出𨋢就拎鎖匙開門

開緊嗰陣都聽到入面有腳步聲行緊出嚟

跟住就見到我老母呆咗喺度

筱瑜:「auntie你好呀

我叫做筱瑜

唔好意思呀今日要打攪你

傑仔佢話你鍾意食魷魚絲呀

小小心意不成敬禮」

老母:「咁客氣呀

係咪傑仔特登叫你買等佢自己食」

我:「痴線

我都唔食魷魚絲嘅」

老母:「唔係咁講點屈到你」

自問自己老母唔難同人相處

所以嚟嗰陣唔擔心筱瑜同佢會搞到面左左

老母:「筱瑜入嚟啦

拎對拖鞋俾你先

放心洗到好乾淨冇人著過

衰仔原來個靚女返嚟

我以為係澤仔添」

我:「唔好咁熱情嚇親人呀」

筱瑜:「哈哈冇野喎」

老母:「放心喎auntie我好開通

呢個年紀拍拖好正常」

我:「真定假呀」

老母:「呃你做乜

筱瑜鍾唔鍾意食咕嚕蝦球，金菇肥牛卷」

筱瑜:「auntie你話事啦

我冇所謂呀」

老母:「講真喎有冇啲咩唔食

又或者敏感呀

真係有唔怕講呀」

筱瑜:「冇呀

今日打攪你我唔好意思就真」

老母:「乜說話呢

咁好啦，

到時俾下面唔好話難食呀

唔係我就好難落台」

筱瑜:「哈哈

傑仔成日話你煮餸好食

我信佢呀」

我:「屌你啦我都冇講過

擦鞋」

老母:「好過你鞋都唔擦

筱瑜啱聽」

筱瑜跟住已經笑到痴線

老母:「你兩個入房溫啦閂埋道門都唔緊要

我唔理你乜都聽唔到」

我:「都唔知你個腦裝乜

溫書點會有聲」

老母:「係喇係喇」

跟住我同筱瑜就入咗我間房溫書