[校園][純愛]《幸運星下的預言》: 第一百一十一章

入到我間房

佢就見到嗰隻鬆弛熊公仔

筱瑜:「真係擺喺張床喎

以為你得個講轉頭擺去唔知邊度添」

我:「痴線



第二個就唔敢講，

你送到喎梗係擺喺當眼位」

筱瑜:「你間房好整潔喎

auntie真係犀利執得咁好」

我:「你都傻嘅



我自己執架」

筱瑜:「犀利喎

唔係講笑真係執得好有條理」

我:「梗係啦

我預咗你隨時過嚟同我瞓



所以咪執得乾淨啲」

筱瑜:「痴線

做乜無啦啦過嚟同你瞓」

我:「你知你啦成日掛住我嘅

見少日都唔得

點知你會唔會失驚無神走過嚟呀」

筱瑜:「哦

依家有怨言喇」



我:「你解讀得太深入喇

總之就因為你先執得咁乾淨」

筱瑜:「唔信囉

不過打理得乾淨又真係幾好嘅哈哈」

我:「屌間房係自己嘅

咁都唔乾淨咁你唔好去食屎」

筱瑜:「如果我冇執開房



聽到你咁講會點呢」

我:「唔好玩啦你冇執房

你個人咁撚整潔咁撚有條理

梗係知你有執開先至咁講」

筱瑜:「其實你真係好醒嘅啫」

跟住佢又用對手圈住我

我:「使唔使咁開心呀」

筱瑜:「要呀



就係要咁開心」

我:「好彩你易氹啫，

如果唔係我都食得屎」

筱瑜:「唔係呀好難架

係你夠無聊夠低b先至得咋」

我:「啲字眼正面少少好唔好」

筱瑜:「唔好意思呀唔係好識字



淨係諗到呢啲形容詞」

我:「溫書啦」


一對小情侶，

孤男寡女獨處一室

我可以同你講，

其實真係可以淨係溫書

我都唔止一次講過

佢如果對於呢方面係有需要嘅話呢

我覺得佢絕對會同我講

佢依家冇講，

咁我就一路詐唔知啦

總之我唔會嘗試去抵觸呢條線

可能一直都覺得呢方面難開口，

大家要拎共識相對較難

你當我戇鳩仔啦

有女都唔識食

不過我成日覺得一旦講出口，

大家立場有唔同之後

呢段關係上面或者會出現少少裂縫

我唔希望有呢個情況出現

所以一直都冇提過性呢方面

同埋嗰陣咩環境丫

陷入水深火熱之中，

有時間都攞嚟衝A-Level啦

邊得閒諗呢方面先得架

唔係話唔鹹濕

咁都要睇時間架

萬一破戒發現原來真係咁爽

容乜易掛住沉迷喺性上面唔記得正經野

唔可以俾呢啲情況發生

都係嗰句講出嚟預咗俾人笑

不過嗰陣的而且確係咁樣諗

溫到咁上下我地出返去房

佢入咗去廚房睇下有咩幫手，

筱瑜:「auntie有咩要幫手呀」

老母:「傻嘅唔使入嚟呀

你兩個溫晒喇」

筱瑜:「我地每日都溫幾個鐘

太多我驚大家都辛苦

去到臨考前一個禮拜先至再谷

傑仔好叻呀」

老母:「多得你啫

唔使入嚟喇出去睇電視做乜都好」

筱瑜:「上到嚟冇理由淨係坐喺度嘅」

老母:「真係唔使喎」

我:「呀媽

筱瑜平時真係識煮野食」

老母:「下

真係架」

筱瑜:「媽咪要返工

佢做寫字樓起碼七八點先返到嚟

冇理由要佢再煮啦

家姐讀緊大學都忙，

佢又唔係住宿舍

以前就佢煮嘅依家佢多野做咁咪我幫手

屋企大家都有份」

老母:「犀利喎筱瑜

你又好野喎對手仔重係咁靚」

我:「auntie你都係啫」

咁又係喎

無論老母定係筱瑜

佢兩個對手真係好白滑

真係有花工夫去keep

講講下佢兩個喺度講煮餸

痴線好似朋友咁樣喺度傾喎

重叫我落去買薯仔話唔夠用

搞到我好似外人咁樣

當然啦我估唔到佢兩個咁融洽

諗住大家會好拘謹點知原來咁啱傾

對我嚟講都好嘅

嗰陣好低能咁樣諗，

咁嘅話以後就唔使擔心婆媳關係啦

哈哈，

有邊個唔係視初戀為一個美好嘅國度

又有邊個唔想初戀陪你行到人生終點

最重要最重要係喺嗰陣，

有邊個會知道，

理想同現實係有分別呢。