[校園][純愛]《幸運星下的預言》: 第一百二十七章

我仍然記得第一日入去課室嗰陣

首先梗係坐低先啦

跟住見到邊個有喺ocamp傾過計

就坐埋去嗰度

呢個行為絕對係表示友好嘅一種



點頭跟住微笑其實好重要

跟住再食住上借頭借路坐埋去

咁就已經可以結盟

當然啦，

自己都要識分辨



有啲一望就知係戇鳩仔

咁你打死都唔好坐埋去啦

又或者你見到有啲人好多野講不過冇人理佢

咁你自己都知呢個都係靠唔住

同佢friend即係嗱屎上身



可能你地覺得唔係掛

第一日就搞咁多野

識個朋友啫

喂大佬依家唔係幾時學

出到嚟面對嘅只會更加難

到時先學做梗炮灰都得

所以唔好話我咁麻煩

佢本身就係咁



適者自然可以生存

戇鳩仔其實真係有樣睇

坐咗喺度之後一路等

等緊咩

嗰陣我就唔承認

依家就梗係唔怕講啦

大家都係排呢一科做a1



我咁嘅蛋散都入到，

佢成績比我更加好，

冇理由入唔到

除非改次序啫

嗰陣我一路傾計一路望住門口，

等嚟等去都見唔到我最熟識嗰個面孔

直至professor入咗嚟跟住閂門，

我先知道佢唔係呢班



係咪同一科我就唔肯定

一陣我要出去睇

我都係純粹好奇啫，

唔代表啲乜

係呀

嗰陣我係咁同自己講。


後來有一日



我先至意外得知佢入咗邊間u

我唔知佢係失手

定之後改次序啦

總之我記得佢依家嗰間u唔係當日佢嘅首選

跟住先醒起，

係喎點解咁蠢呢

或者係佢男朋友讀呢間呢

即係嗰個呀文

咁就好正常喇

又係嘅佢咁鍾意佢

想一齊讀好正常嘅事，

係我自己咁戇居

以為佢唔會改啫

喺度妄想入到u會見到佢，

當日我喺放榜嗰日講嘅野不幸言中

其實都唔係不幸嘅

起碼依家唔使見到

唔會咁易亂諗野先丫，

佢讀咩都唔關我事

好聽啲我就係佢嘅前度

唔好聽就係水泡

水泡都唔係最抵死，

大把人心甘情願做

最慘係自以為是嗰啲叻仔呢，

以為係真命天子嗰種就最好笑

唔緊要嘅大學咁多女

新環境新形象，

起碼會有啲衝擊先

得唔得大家都唔知，

況且如果真係溝唔到咁都冇辦法

只要唔使無時無刻諗住一個冇可能再發展嘅人

咁就得啦，

呢個亦都係我最大嘅目標

問心講句，

我真係唔想同佢完全冇晒任何瓜葛

但我知如果我要追隨自己目標，

呢啲係必需要做

既然依家形勢都幫埋你

咁冇理由唔珍惜丫

或者我地以後會越嚟越陌生

甚至出到街見到面，

招呼都唔會打一句

不過你問我，

對比念念不忘，必有迴響，

決斷啲亦未嘗不可

我嘅性格就係咁，

有得揀嗰陣肯定優柔寡斷

依家冇得揀大家距離越嚟越遠

邊度再有咁多時間諗佢丫，

或者真係冇緣啦

我都唔想咁樣講，

不過諗唔到第二個原因去解釋，

其實由分手第一日已經知道，

我同佢個走向係咁樣

只不過真係發生嗰陣，

都總係有一點點心酸

有心理準備都冇用，

因為根本就預計唔到

從來都係。