[校園][純愛]《幸運星下的預言》: 第一百二十八章

好多人講過，

要放低一個人

首先要做嘅，

就係搵第二個人填補

有啲野現實唔敢又或者唔想同人講



依家喺度講就唔驚啦

初戀之後去到依家，

我總共拍過三次拖

頭兩個係同一間u

第三個係fresh grad嗰年識嘅



我最記得第一個女仔係同班同學嚟

佢叫做Zoie

第一眼見到佢，

唔錯啦咁樣

冇咩特別評語



啱啱認識個情況其實好尷尬

你當我上堂發緊夢

當然啦我係扮到好認真聽書咁樣望住professor

跟住望望下我feel到有對眼望住我

跟住即刻回神，

於是就見到Zoie個視線同我對上

跟住好尷尬咁樣笑啦

大家都明係咩畫面



後來佢同我講返其實我嗰陣係望住佢

咁就開始慢慢熟

第一次同佢一齊搭車嗰日應該係關鍵

你知啦開好個頭好重要

好多人以為最尾先重要

其實我覺得唔係

真係要部署其實係越早越好



當然啦，

嗰陣我唔係話想溝佢

係佢話順路去mk一齊啦咁樣

原本我都驚冇野講

呢樣簡直係十級尷尬

好好彩我地搵到個共同話題

就係傾廣東歌

嗰陣應該重係流行用廣東歌做鈴聲嘅時代



行行下我無啦啦聽到殘酷遊戲副歌嗰幾句

原來就係佢電話響

等我傾完收線就梗係食住上

Zoie:「做咩呀」

我:「識野喎」

Zoie:「你係衛蘭fans」

我:「係呀做咩



你用得即係你都係啦」

Zoie:「算係啦哈哈」

嗰程地鐵就係咁講佢啲歌

特別去到有啲站好多人入企得好逼嗰陣

細細聲喺佢耳仔講對於醞釀氣氛真係唔錯。


嗰日之後我feel到我同佢開始曖昧

當然啦我亦都間唔中會flirt佢

曾經有個不拘言笑嘅女仔話過我知

冇一個女仔唔鍾意被人flirt

當然啦唔好夾硬嚟喎

唔使好高技巧，

正正常常嘅話呢就可以拉近個關係

我重記得以前交學費嗰陣已經令我意識到呢樣野

一個平時咁cool嘅女仔聽到都會暗爽

咁有邊個唔鍾意呢

即係話個方法可行啦，

特別Zoie本身都多野講

之後嘅日子證明我冇推斷錯誤

間唔中flirt一flirt

佢果然好受落

就係咁就拍拖

我重記得正式拍拖第一日

送完佢返屋企到我返自己屋企嗰陣，

我竟然喺度諗有冇後悔

哈哈真係講你都唔信

呢個諗法其實由晏晝已經充斥住

當然啦喺佢面前唔通我講出嚟咩

所以我一路冇講，

喺依家一個人我先夠膽深入去諗

依家咁樣係咪我想要嘅野

我諗咗好耐我真係唔肯定，

我唔明白點解會有咁嘅反應

十個有九個第一日拍拖我都唔認為會諗呢個問題

甚至當年初戀嗰日，

都完全唔係呢個態度

嗰日係好開心，好興奮

講野語無倫次，

搭𨋢、沖涼一個人嘅時候會係咁笑

成個人好輕真係好飄飄然

我唔知點解依家會咁樣，

總之係兩種反應

當然啦，

我有信心自己喺Zoie面前可以掩飾呢個諗法

呢一刻嘅我，

係嗰種對住伴侶都唔會完全忠誠嘅人

我唔係話會出軌呀，

我最憎就係第三者

就算點樣衰，

我都唔會玩三角關係

唔會完全忠誠嘅意思，

只係講我唔會喺佢面前透露最真實嘅諗法啫

大話就一定講

唔係話問我去邊呢種大話，

特別係佢唔知點解對於我以前嘅野好有興趣

我講嚟講去就係話你就係我初戀

初頭佢唔信嘅

跟住我即刻俾銀包佢睇

佢見我乜相都冇擺

我又主動俾埋電話去睇

完全冇另一個女仔嘅相

跟住佢就開始信，

當然佢亦都知我有映彤呢位異性好朋友

映彤啫，

咁就梗係唔介意俾Zoie知啦

講開又講，

映彤知道我拍拖

即刻叫我帶埋Zoie出嚟食餐飯

正當我諗住點樣包裝呢件事嘅時候

Zoie第一句就話冇問題

重話佢都好想見映彤

我都唔係傻嘅

當然知Zoie點諗

於是我有私底下同映彤夾口供

盡量唔好講嗰啲私人野

最好講埋啲濕鳩搞笑野咁就得

映彤冇問我點解

總之我覺得佢知道我點解要咁樣

事實上佢都好配合

嗰餐飯個氣氛好唔錯，

映彤佢重特登做主動，

問返佢我地點樣識，邊度表白乜乜物物

總之一切圍繞著呢刻嘅事

真係好多謝佢。