[校園][純愛]《幸運星下的預言》: 第一百三十七章(終章)

九年冇見

其實變化唔係好大

同以前冇分別都係咁白

容貌亦一如九年前咁動人

身材都保持得好好



由第一日識佢去到今日

一直都係咁苗條

甚至喺佢心口前嗰條頸鏈，

亦都係我九年前見過嗰條

唔使近望上面有冇刻名都已經知係



根本就冇可能唔認得

唯一一樣，

就係我唔知佢咁多年以嚟有冇高到

我真係判斷唔到

最後，



始終都係佢開聲先

筱瑜:「我知你依家有多野想問

唔使急

飲咗包朱古力奶先丫」

我:「多謝

好耐冇飲過

飲筒呢」

跟住佢就好似九年前咁樣，



遞上一支飲筒

筱瑜:「你好耐冇飲過

咁耐冇見講野都係咁誇張」

我:「問唔到你飲筒

咁我點樣飲

一早有講。」

佢冷笑咗一下



筱瑜:「我知你有好多野想問

你等我慢慢講啦好冇

係咪會後悔呀」

我:「點解會咁

呢個係你嘅預言一部分」

筱瑜:「封信有冇寫丫」

我:「冇

你係特登唔寫留嚟依家講



定係中間發生咗突發事件」

筱瑜:「話你知丫

喺我讀緊master嗰陣，

有一日我喺樓梯碌咗落嚟

因為嗰陣都有唔少人，

我俾後面個女仔撞到

嗰個女仔都係同學嚟



或者你唔喺我隔離啦，

結果嗰次我就冇咁好彩呀

雖然皮外傷程度唔算好高，

但係醫生同我講，

我嘅腰椎第一至第二節有損傷

雖然就唔係完全損傷

即係話唔會永久癱瘓

當然佢好官腔咁樣話都有機會完全復原嘅

要靠物理治療之餘，

亦都要等待醫術嘅進步」

嗰日我望住佢，

眼淚真係好唔爭氣咁樣滴落嚟

其實我真係好大男人

從來都唔鍾意喺人地面前流淚

不過今次真係冇辦法

九年前佢對住我喊，

等咗九年原來就係為咗回禮

真係好諷刺

筱瑜:「唔好喊啦

我唔想咁耐冇見一見返就係呢種氣氛

我知你唔鍾意咁樣呀」

我:「你繼續丫」

筱瑜:「如果我同你講，

依家我同嗰個女仔一齊住你信唔信」

我:「信

我認識嘅你，

不嬲都係咁厚道

但係你媽咪同家姐呢」

筱瑜:「家姐佢講過

佢一定要接我返去住，

不過我真係唔可以再麻煩佢同埋姐夫

遲啲佢結婚生仔，

再加埋我

佢真係冇私人空間架

我唔想成為家姐個負累

所以我婉拒咗佢好意」

我:「成世都係咁

點解唔自私一次，

顧住呢個顧住嗰個」

筱瑜:「我已經好自私

如果再自私啲嘅話，

可能好多野都唔同架喇」

跟住大家相對無言

筱瑜:「媽咪早幾年移民咗去外國

佢個醫生建議佢去外國，

話咁樣對於佢精神狀態係最好，

你應該知佢有咩問題架啦」

我:「佢知唔知你依家咩情況」

筱瑜:「唔知呀，

我冇同佢講」

我:「咁你依家同嗰個女仔住邊」

筱瑜:「嗰個女仔見到我咁樣，

喺醫院即刻大喊

可能你唔信啦

不過見到佢咁樣之後，

呀唔係，

應該話從一開始我就冇怪過佢

因為其實佢都係俾人撞到

我都係同家姐講千祈唔好怪嗰個女仔

成件事只係純粹不幸，

我都唔想佢孭住呢件事生活落去

唔止我，

佢都好辛苦架」

我好想問佢

究竟你經歷過啲乜，

先變到依家咁豁達

不過諗諗下又唔係喎，

其實佢不嬲都係咁

第一日識佢已經係咁架啦

筱瑜:「跟住佢話不如兩個女仔一齊住

等佢照顧我，

佢話唔咁樣佢會過意唔去

食宿費都全免

就係咁我同佢做咗朋友

好奇怪呀呵

有次佢飲醉咗，

返到嚟我同佢傾計

原來佢一直耿耿於懷

佢話自己害咗我，

其實真係唔好咁諗

我都係咁同佢講呢件事純粹都係唔好彩」

我:「不過你咁順攤

佢話一齊住你都肯嘅

你唔驚佢咩

當然啦今日梗係唔驚啦

咁嗰陣呢」

筱瑜:「哈

你信唔信呢個聽落去咁荒謬嘅原因先」

我:「我一定會信你

由我第一日識你開始，

我就知你係一個咁善良嘅人

永遠都唔會推卸責任，

對住我呢個咁嘅人，

只係包容同埋勸喻

係得你先做到」

筱瑜:「你知唔知呀

其實啱啱整到，

獨自一個人嗰陣呢

其實我負面情緒好強烈架

嗰陣我唔敢同其他人講

因為驚嚇親人，

真係有諗過不如一走了之

亦都因為咁所以當初我唔驚同嗰個女仔一齊住

當時生無可戀自自然然就唔驚咁多啦

你知唔知點解我今日會重喺度」

我:「點解」

筱瑜:「就係我醒起九年前講嗰個好無聊嘅約定

我真係有諗過你會唔會唔記得呢

跟住我再諗，

如果我一直捱到嗰日

你記唔記得我唔可以肯定

至少我仍然有呢個機會先

但係我依家走咗去，

就算你記得都好，

我都唔可以再見返你

所以，

多謝你」

跟住我即刻捉住佢隻手

我:「咪住先你依家見返

咁你會唔會

唔好呀」

筱瑜:「嗰陣我諗埋一邊啫

放心啦我唔會再有呢個諗法

嗰陣以為以後唔可以正常行路好大鑊

先有呢種消極諗法啫

望返轉頭，

依家會覺得嗰陣嘅自己好傻

放心啦唔會呀」

我:「你知唔知我俾你嚇親

究竟你嗰陣係點，

經歷咗咁多野，

你今日竟然可以當係家常便飯咁樣講出嚟

好堅強

真係好堅強。」

筱瑜:「唔好喊到咁勁啦

最難捱嘅時候已經過咗

你千祈唔好怪表弟同埋映彤唔講你知呀

係我千叮萬囑叫佢唔好講」

我:「放心啦我冇嬲過任何人」

筱瑜:「同埋呢其實我依家可以行到嘅

當然會論盡啲啲啦

我喺屋企可以嘅話盡量都步行

好過未做物理治療嗰陣唔少，

過程就梗係唔容易啦

但係我一耷低頭見到條頸鏈，

我就知自己唔可以咁懦弱」

我:「係喎當年謝師宴我見你冇戴架

點解依家戴返」

筱瑜:「當年我有戴去

擺喺個袋度，

冇戴出嚟俾你睇啫

唔係點樣要你死心」

我:「咁都係你太了解我啫

原來你一直咁重視呢段關係，

你知唔知我好想同你講

我同九年前一樣，

對住你從來都冇變，

但係我唔可以呀

我中間拍過三次拖，

我唔可以同你講我有幾深情，

點樣念念不忘

一講出嚟就好難聽」

筱瑜:「我知呀

你唔好再鬧映彤成日like你啲舊相呀

係我有時撳錯」

我:「原來係你呀

即係你知道晒啦」

筱瑜:「少少咁啦

真係好多謝映彤，

呢啲咁唔合理嘅要求都肯應承

重有嗰啲三文治呀

每次你兩個咁啱一齊返早，

佢都會早啲過嚟幫我拎俾你」

我:「原來係你呀

睇嚟我條脷都係廢，

咁都食唔出」

筱瑜:「邊關你事

係我要特登整到唔同啫，

從來都唔係你問題」

我:「咁映彤係好好人嘅

唔怪得我每段感情，

映彤都咁積極要同佢地見面啦」

筱瑜:「哈哈你依家明就得啦

其實當媽咪走咗之後

我係有諗過搵返你

嗰陣我行路仍然係自如

不過見到你拍緊拖我唔好意思搵返你啦

去到後期我就受傷，

咁咪索性唔搵你

所以我真係等咗今日好耐

多謝你」

我:「你知唔知我畢業嗰陣我同自己講

有朝一日我喺條街見到你我一定要同你講多謝

唔係你嗰幾年我A- Level唔會有呢個成績

之後發展嘅路都會好唔同，

真係好多謝你」

筱瑜:「你本事啫

我有咩功勞丫，

你記得今日嘅事已經好好彩

我唔會再強求任何野

記住呀，

開始唔細喇

正正經經搵個結婚伴侶

展開人生新一頁啦

唔使再掛住我呢個人」

我:「唔可以再一齊咩

我單身咗幾年，

個原因就係因為你

我唔想再搵其他水泡去代替你

唔怕同你講埋，

我有一刻好憎你

好憎你點解咁好」

筱瑜:「你美化咗我啫

我又點會係你諗咁好呢」

我:「大家今日出得嚟

即係你都著緊呢段關係呀

我亦都唔可能會忘記呢段感情

點解唔可以一齊

你以前唔係講過咩，

無論我遇到咩難關

你都喺我隔離嘅咩」

筱瑜:「我依家陪住你，

只會變咗一個包袱

幫唔到你向前」

我:「唔係呀」

筱瑜:「唔同喇

我唔再係同你差唔多高嗰個筱瑜，

唔再係你一擰轉頭就見到我嘅嗰個人，

依家你要耷低頭烏低身先見到

都未講到起居飲食呢

我唔想你攰呀你明唔明呀

一日得兩日得一個禮拜一個月都頂到，

跟住呢，

成日耷低個頭

終有一日你會攰架，

我想你記住嘅筱瑜係以前一擰轉面就見到嗰個，

唔係依家呢個呀。」

我望住佢

我都見到佢眼有淚光

係佢第二次對住我喊

一個自我保護機制咁強嘅人，

公開對人流淚

我絕對明白佢呢刻情緒有幾真摯

真摯到收飾唔到，

筱瑜:「依家嘅我已經唔可以再好似以前咁樣煮野俾你食

我唔想你因為同我出街而要招人話柄

冇錯我係講過，

邊個人講你話你我都會幫你發聲

但係依家我就係令你遭人詬病嘅原因，

我唯一幫你嘅方法就係唔喺你隔離呀」

我:「冇問題呀我完全唔在乎

我緊張嘅係隔離嘅你，

你都話有機會完全復原

可能得呢點解唔可以正面啲去諗」

筱瑜:「由我整受傷到依家都幾年喇

機會大唔大心中有數，

我唔想你辛苦呀

我知你會話我唔係你點樣知呀，

但係你冇必要照顧我呢個人架

你知唔知呀，

真心鍾意一隻雀仔唔應該係將佢困喺個籠度，

而係應該放生佢，

等佢自由自在咁樣飛

你就當我貪心啲，

你再一次應承我丫，

唔好留戀一個幫唔到你嘅人」

我:「全部都唔介意呀

點解唔可以試下再一齊

以前嘅我太遲鈍唔知你點諗，

但係今日嘅我唔會再咁懵，

我好清楚我對你係咩感覺

亦都好了解你對我咩感覺」

筱瑜:「冇咗大家喺身邊都可以生活架

對你如是對我亦都係一樣，

過去嘅九年就係一個證明呀，

你冇必要為咗我咁麻煩呀，

你就當我自私啲，

我覺得照顧我係麻煩就係麻煩啦

傑仔知唔知呀，

回憶係最靚嘅事，

我地應該係封存等佢唔好受污染

而唔係再拎出嚟，

我知呀，

拎出嚟的確係有機會再增加更多嘅回憶，

但亦都有機會保留唔到原本嘅美好呀

唔好意思呀真係唔可以咁，

我唔想你被今日發生嘅事破壞我同你以前嘅片段

可唔可以呀?」

望住佢嘅眼神，

我終於知道點解映彤會應承幫佢

根本就婉拒唔到

以我認識嘅筱瑜，

當佢下定決心做一件事，

嗰份信念係好強

唔會有人阻止到佢，

雖然我係好唔情願，

不過都只可以尊重佢嘅選擇。

筱瑜:「返去囉」

我:「送你」

筱瑜:「好呀」

雖然依家唔再係同佢肩拼肩一齊返屋企

地點唔同方法唔同，

但係至少我同佢冇變過

做到呢一點應該要知足

一路行一路唱歌

對住佢唔使講就梗係唱衛蘭，

筱瑜:「你做咗佢fans呀」

我:「多得你囉

你以前俾我嗰啲碟我真係聽晒

我有佢演唱會呀

12年，18年嗰兩個我都有去」

筱瑜:「係咪真架

整幾句嚟聽下」

我:「別怕 你舊日再好 到今天還有甚麼好。」

筱瑜:「啱啱睇完先識嘅」

我:「如果我要道別 寫一個完美壯舉

重繪世界未日 不等到誰應許

面對這身旁芒人海裡 來日誰進墳裡

或者真的太累 歷久怎會不衰。」

筱瑜:「真係有聽喎

積雪好好聽呀」

我:「寧願笑得不夠 無謂喊得太久

不必等他傷透 親手將他放走

無牽的手 才可牽手

是過去沒有的自由。」

筱瑜:「長痛短痛都好好聽呀

不必等他傷透，親手將他放走。」

我冇出聲

點會唔知呢句點解丫

我:「係喎

你記唔記得你當年喺我本手冊上面寫你電話嗰陣嗰句歌詞」

之後佢笑咗一笑

筱瑜:「點會唔記得

依家知唔知點解」

我:「當年我知道你電話之後就冇諗喇」

筱瑜:「其實係我有一日無聊

好耐以前嘅事，

你知我鍾意佢啲歌架啦

我無意中發現呢首歌呢句歌詞個筆劃同我個電話係一式一樣」

我:「真係fans」

筱瑜:「或者呢句先係我最早嘅預言

連嗰陣嘅我都唔知。」

十個他不如你一個，

係呀你講得冇錯

十個她，

真係不如你一個

跟住一路行，

一路唱咗好多side track

喺我識嘅人入面，

係得佢一個有聽過呢啲歌

又係嘅如果唔係佢，

我諗我未必係衛蘭fans

去咗個分岔路，

筱瑜:「行呢邊丫

遠啲呀。」

我:「嗯」

大家都好貪心，

用一個最緩慢嘅速度，

行一條最遙遠嘅路線，

目的就係偷得幾耐得幾耐

一寸光陰未必只係一寸金，

喺嗰段路上面我地都係傾過不停

同分手之前一模一樣，

嗰種氣氛冇因為時間流逝而冷卻，

佢話佢依家喺佢家姐間公司做，

佢家姐一定要留佢喺度做

筱瑜:「我都唔係傻嘅

咁梗係知佢想點啦

又好好彩姐夫包容，

真係當我係妹咁樣睇住」

我:「咁咪好囉」

筱瑜:「佢話我已經唔一齊住，

如果連返工都唔應承即係唔俾面喎

家姐每個禮拜都會嚟探我

真係好多謝身邊咁多人

包括依家喺我隔離嗰個人

佢俾我嘅動力係其他人估計唔到架」

我:「多謝你

我曾經懷疑過如果冇識過你會唔會更加好，

我依家要打倒昨天的我

多謝你嘅出現」

筱瑜:「唔使再笠高帽喇」

但係，

速度再慢，

路線再遠都好啦，

始終都會有完嘅一刻

真係要分別

筱瑜:「咁好啦

我......入去喇

下次見啦」

我:「嗯。」

或者大家都好清楚，

下次再見都唔知係何年何月何日

就算見到都好，

都可能只係點頭微笑嗰種蜻蜓點水方式

輕輕帶過

甚知佢見到我都唔會打招呼

直行直過就算

筱瑜:「拜拜喇」

我:「拜拜」

夕陽餘暉下，

有個男仔，

望住一個背住佢，坐緊輪椅嘅女仔，

心中默念一句，


「我會等你，直至你企返起身。」