為左追到女神我要成為全級第一！: 第四十章：

過左唔知幾耐，突然之間廚房入面有人大叫可以開飯啦！我同啊傑就係張沙發到彈起身，見到小欣同啊儀每人拎住兩碟餸行出黎，本身諗住行過去就食飯啦點知小欣要我地兩個去洗左手先比我地食。

洗完手之後我地就準備開飯啦，我先望一望飯枱上面有咩餸，有蕃茄炒蛋，薯仔炆雞翼，蕃茄薯仔湯同埋蒜蓉炒生菜，係名副其實嘅三餸一湯白飯任裝。就咁睇個賣相黎講就好似幾好食咁，唔知好唔好食呢，一食落口竟然出乎意料地好食，啊傑見我係咁食唔停，所以佢都開食。

佢兩個見到我地係咁食，臉上面都露出滿意的表情。轉眼之間枱上面嘅餸菜都比我地完美咁清晒，為左感謝返小欣同啊儀煮既晚飯，我同啊傑就去左洗碗，今次就輪到佢兩個坐係沙發上面睇電視。好快我地洗完碗啦！接下來我地都係繼續玩返紙牌遊戲，玩到差唔多接近晚上十點幾，啊傑就提議不如食埋糖水自再返屋企，我地大家都無意見。

去到糖水舖，我冇諗過今晚竟然冇咩人黎食糖水，所以我地唔洗等就可以入到去糖水舖，平時都要起碼等五至十分鐘先入到去食。係食糖水既過程中都係充滿笑聲，為冷清既糖水舖帶來一絲氣氛。

食完同埋完單之後，啊傑同啊儀都話屋企人催佢地返屋企所以講完再見就急急腳走左，淨返我同小欣係到。





小欣：不如我地去海濱散下步啊！
我：咁夜你屋企人唔催你返屋企咩？
小欣：我出門口個時同佢地講左話今日會夜啲先返。
我：咁好啦，行完海濱我就送埋你返屋企啦！
小欣：嗯！

如是者我地向著海濱方向進發，我慢慢將手靠近小欣佢然後輕輕咁拖實佢既纖纖小手，小欣比我突如其來既行為有啲嚇親，但佢並無因為咁而鬆手，反而佢望向我微微一笑。曾經有人講過係中學生涯入面無拍過拖係一個遺憾黎，而我都好認同呢一句。

係人生之中點都會有過一段充滿青春既愛情，同小欣佢相處左咁耐，經歷大大小小既事情，我都係時候比返一個名份佢，我決定係去露營個日正式同佢表一次白，雖然我同小欣係其他人眼中已經默認左係一對情侶，但都算未正式公開表明係。





仲記得小欣講過我要拎到全級第一佢先接受我既表白，可惜最後都只係拎到全級第二返黎，雖然其實可以拎到全級第二我都好開心，但心入面點都有啲不甘，點解會拎唔到全級第一返黎，如果拎到全級第一返黎你話幾好呢...

喂！喂！突然有把聲將我拉返黎現實，我望住小欣佢，佢就開口問我諗咩諗得咁入神，嗌左你幾次都唔理人！我同左佢講話我係到諗緊我地露營個時究竟會做點咩呢～

小欣佢就話到時候你咪知囉，我心諗到時候會有一個驚喜比你啊！