為左追到女神我要成為全級第一！: 第四十一章：

個一晚我同小欣悠悠閒閒咁行完成條海濱長廊之後我就進入護送小欣返屋企呢個任務，好快我就送到去佢屋企樓下，我本身諗住望住佢入左大廈門口先再離開，點知小欣佢突然回頭走返黎我個邊，然後佢竟然...佢竟然輕輕抬頭錫落我塊面到，之後再急急腳跑返入去大廈到。

比佢突如其來既突襲搞到我有啲不知所措，等到我個人清醒啲之後我就準備行路返屋企沖涼休息然後迎接新一日既來臨。我本身諗住我可以自然咁醒，點知比個來電鈴聲嘈醒咗，我以為係小欣佢地是但一個打比我啦！我一睇係張老師打比我！

於是我就聽張老師既電話啦
張老師：早晨啊！啊俊同學，張老師有啲事情想拜托一下你做！

我：咩事情啊張老師？

張老師：早排我地老師同校長開例會個陣有討論一下你，因為你知啦你由一個全級最尾搖身一變做全級第二，所以校長想你係結業禮個時進行一個個人演講，分享一下你既經歷同埋想希望用你既例子去鼓勵一下師弟師妹佢地。





我：下！張老師你認真架？

張老師：係啊！有三日時間比你準備架啦！

我：既然係校長搵我去演講，咁我都無可能拒絕啦！

張老師：難你唔到既，期待你到時既演講啦！

就係咁我無啦啦要係結業禮上進行個人演講，諗返起以前我因為唔係咩校園風雲人物，所以無咩機會可以上台演講，估唔到我會因為呢一次而有機會上台演講，死啦到時講咩好呢？無理由同成班低年班同學講話我係因為小欣佢先努力讀書架，點都要搵啲嘢去掩飾下。





經過呢兩日既日思夜想，最終決定演講內容係如下：有一日我發現自己如果再咁頹廢落去都唔係辦法，眼見身邊既朋友都過著一個又一個既美好人生，所以我決定要改變自己。起初發現要改變自己真係一件好難既事黎，但我好好彩遇到一班好朋友，有佢地既陪伴我先有動力繼續支持落去，係呢班朋友當中有一位可以話影響得我最大，我同佢經歷左好多事情，已經成為左係一個互相幫助互相支持既對象，我希望藉住呢個機會去同佢講一聲多謝，沒有你我甚麼都不是！演講內容大概係咁，到時再隨機執生啦～

啊明聽完我個演講內容之後比左個like手勢我之後再陰陰嘴係到偷笑，見佢有呢個反應睇黎都應該無咩問題，到底點解我個時自我感覺會咁良好....