為左追到女神我要成為全級第一！: 第四十二章：

結業禮既早上小欣想約我食完早餐之後一齊返學校，但我啊爸啊媽知我今日結業禮想參與下，所以專登請咗一日假返黎香港睇我。難得屋企咁齊人，我啊媽就想去飲茶，順便同我當面傾多計。

我唔想拒絕小欣既邀請，所以我膽粗粗反問返佢一唔一齊飲茶，小欣第一個反應係比左三粒點我然後再講左句你認真架？我就同佢講話我比較想同屋企人飲茶多啲，因為唔係成日見，但我又好掛住你（明明我幾日前先見完佢黎）小欣聽完我講之後佢竟然問我係邊到飲茶啊仲話等多一陣就可以出發，我即刻嘩左一聲，由於真係好大聲搞到啊媽問我咩事！

我同返啊媽講一陣飲茶要加多個位，佢問返點解既，我就話到時你咪知囉，嘻嘻！我啊爸見到我咁既表情就話肯定個傻仔有女朋友仔啦，你睇下佢笑牙唔見眼咁！如是者等我換好校服之後我地一家三口就出發去茶樓飲酒。我同小欣講左話我地係學校附近間開心茶樓到，小欣就話佢十分鐘之內到，我要佢唔洗急慢慢黎。

小欣對上次見到我屋企人係佢同佢屋企人食生日飯個陣同埋家長日個日，而個陣雙方屋企人都唔知我同小欣既關係。係等待小欣既過程中我又期待但又緊張一陣會係點樣既情況，小欣會唔會因為怕羞而唔講嘢呢，係呢十分鐘入面我腦海中已經幻想左數百次個情景...

就係呢一刻小欣把聲出現啦！佢一黎到就講話要你地等咁耐真係唔好意思啊！我啊爸啊媽竟然異口同聲一齊話唔係等左好耐姐，快啲坐低食嘢啦，趁熱食啊唔洗客氣喎！我夾左粒燒賣比佢食，因為我知佢中意食燒賣。唔知啊媽係咪有印象，佢問我小欣係咪上次家長日坐係我隔離個個女仔黎，因為個日我啊媽同小欣啊媽傾得入晒神我唔知佢有無留意一下小欣。





小欣聽到我地之間既對話就主動同我啊媽講係啊伯母！介紹返我自己先，我叫林小欣，係啊俊既未來女朋友，好高興咁快就同你地見面！我啊爸聽到小欣話係我未來女朋友之後就滿口問號問返小欣點解既，我唔知小欣佢係咪專登串我啦，佢話因為啊俊佢仲未達到我比佢既要求，所以我都仲未算係佢女朋友。

我啊爸聽完之後就無奈咁講左句真係唔明你地而加啲年輕人既愛情，然後佢就默默咁食野。而我啊媽又發動佢既好客精神，係咁問啊小欣問題，好彩小欣佢都逐一咁回答晒，飲茶過程既都十分之順利結束。

係時候準備返學校參加結業禮啦，係到講返聲除左啊明知道之外小欣佢地同我屋企人都唔知我今日會上台演講，目的都係想比佢地一個驚喜。











係到都想祝各位讀者母親節快樂，記得要孝順父母啊大家！