雄哥講完, 跟住佢又行番去 Sally 身邊度講 : 「嗱, 我幫佢都得, 但一陣妳要陪嗲落去餐廳度食飯過喎。」 Sally 笑住點一點頭, 跟住見雄哥攞起個電話嚟打住 : 「呀成, 酒店而家咩環境呀? ……哦, 咁我而家落嚟睇吓點情況先。」
 
收咗線後, 雄哥叫我哋同 Sally 留響間房度, 跟住佢就緩緩咁開門行出房外, 樓梯之處, 雄哥正雙手插住褲袋咁行緊落樓下, 但沿途果然見倒有好多人正不斷上上落落似係好急要搵緊人咁。
 

 
落到 Lobby 柜檯之處, 一個黑衫經理正哄埋雄哥身邊度講 : 「呀黃而家發哂癲咁搵緊果個香港仔, 不過公司已經叫酒店報咗公安, 一陣就會有人嚟拉呀黃佢哋班人架嘞, 但條靚仔應該都仲有手尾跟, 因為保安部仲係呀黃啲人, 而呀黃就講明係要買起呢條香港仔嘅。」
 
雄哥望住四周再同個經理講 : 「睇定啲先, 香港公司果便已經叫咗我哋啲人下晝會接管保安部, 頭先我見過篤灰條女講哂件事出嚟, 其實條香港仔只係隻棋嚟啫, 晏啲酒店換完班底無哂呀黃啲人之後, 條香港仔應該都會無事架嘞。」
 


房內, 我哋五個人正在無所事事, 小燕玲玲同 Anna 正在雞啄唔斷咁講緊是非, 而我同 Sally 就正響度默默互相對望住之中。
 
我問住 Sally : 「妳爸爸….好似都幾犀利咁喎?」
 
Sally 同我講 : 「其實….我都唔知同唔理佢啲嘢嘅, 不過我剩係知媽咪病死咗之後, 嗲啲佢就好傷心, 後尾有啲有錢叔叔話叫佢搬嚟酒店呢度住, 但我就唔知出便啲人點解好似會咁怕佢咁嘅。」
 
Sally 又再問我 : 「係呢, 咁你打算幾時先走呀?」 我搖住頭苦笑地講 : 「愈快愈好, 今次上嚟我仲諗住一心去做嘢, 但點知我都估唔倒而家居然係會搞成咁, 唉, 而家我都唔敢諗聽日咁遠, 總之今日有命落番倒香港至算嘞。」
 
我同 Sally 再默默無言咁對望住, 靜咗一陣, 跟住我再同佢講咗一句, 「我哋 keep contact 吖。」 Sally 聽倒之後就微微同我點一點頭。
 



 
半個鐘頭之後……
 
多架公安車已抵達酒店之處, 而黃生一眾黨羽亦已全部被還押拘捕; 小燕被召番到會計部, 跟住就正式被委任成為酒店會計部高級主任一職。
 
而酒店各部門, 所有同黃生有緊密聯繫嘅高中低層職員, 一律都即時解僱同立即要離開酒店範圍之內, 而雄哥同保安部接任人亦同時宣佈成立新嘅酒店保安事務部。