三個月後…………
 
呢日星期六, 下晝收工後原本約咗班同事一齊去打 tennis 嘅, 電話忽然叮咗一聲, 我望吓係唔係有訊息收到, 咦, 係微信嘅玲玲果果嚟喎。
 
玲玲留咗段錄音比我, 「Raymond 哥, 我而家響旺角朗豪坊度呀, 你得唔得閒出嚟見吓面呀?」
 
哦, 原來玲玲嚟咗香港, 極速盤算咗一陣, 跟住好快我就按鍵約佢一陣響旺角度見面, 放咗班同事飛機之後, 我就立即轉移陣地搭車落去旺角度搵玲玲。
 
朗豪坊正門前, 我已經見倒一個熟悉嘅面孔正企住響度等緊我,
 




「喂靚女。」 「Raymond 哥。」
 

 
見玲玲拖住個喼響身邊, 跟住我就問佢 : 「做咩呀, 落嚟走水貨呀?」
 
玲玲笑住同我講 : 「落嚟買啲嘢啫, 係嘞, 我帶咗啲菜乾落嚟, 諗住如果見倒你嘅話就送比你, 嗱, 係我鄉下的特產嚟架。」
 
我有啲尷尬咁講咗聲多謝, 但其實個心就覺得好老土, 我揸住包菜乾再問住玲玲 : 「喂, 而家去邊呀? 係呢妳食咗飯未呀? 如果未嘅不如就同妳一齊去食吖。」
 




同玲玲搭 lift 上到朗豪坊頂樓度, 跟住我哋就去咗其中一間餐廳度据扒, 坐低咗之後, 玲玲望住個餐牌好耐, 見佢係咁揭極都唔知想叫啲咩至好, 我問佢到底想食啲咩? 但玲玲跟住就同我講, 「呢度啲嘢好貴呀, 不如我哋….唔好響度食咯。」
 
我同佢講 : 「唔怕架, 妳叫啦, 至多一陣如果無錢比嘅話, 我就叫佢比兩對膠手套我哋入去洗碗囉。」
 
玲玲聽完之後係咁笑住, 我攞咗佢個餐牌, 跟住就介紹佢叫呢個特式西冷牛扒去試吓, 叫咗嘢食之後, 跟住我就同玲玲閒談住起嚟
 
我問住佢 : 「係呢, 妳幾時落嚟架?」
 
玲玲 : 「我今朝先嚟嘅, 落嚟係諗住幫人同自己買啲嘢, 跟住下晝再四圍行多一陣就走架嘞, 同埋順便睇吓搵唔搵倒你之嗎。」
 




我再講 : 「嘩, 咁遠落嚟剩係買嘢同行街就走, 咁妳唔去吓啲海洋公園同狄士尼, 又或者上吓山頂去睇吓夜景?」
 
玲玲微笑住搖住頭話 : 「唔嘞, 一個人有咩地方好去吖, 而且我又唔識得點搭車, 所以我都係求其響旺角呢度買完嘢行一陣就走架嘞。」
 
我聽完佢講之後就話 : 「嗱, 比面妳包菜乾, 咁不如一陣我陪妳四圍去玩嘞。」
 
玲玲聽到之後好大反應咁話 : 「吓, Raymond 哥你話陪我? (諗咗一陣) 都係唔好嘞, 我邊度敢麻煩 Raymond 哥你吖。」
 
我托住下巴同佢講 : 「其實話比妳知吖, 妳今日叫我出嚟搞到我同唔倒啲女仔去街, 我唔理呀, 妳如果唔比我陪嘅話, 咁我就叫關閘果便唔比妳過關番上去架嘞。」

玲玲聽倒我咁講之後, 面上即時露住一絲絲甜笑。