我和他他他的故事: 測測男朋友

 8月嘅天氣非常翳焗，熱到人恨不得長居冷氣房，免得過都唔好踏出房半步。
 
難道星期六放假，我當然要做個hea 霸，死都唔離開張床。打開電腦，click入心理測驗<<從擁抱方式看你渴望得到哪種愛情？>>，個測驗係根據你最鍾意嘅擁抱方式，睇到你希望得到嘅愛情，同期望對方點對待你。
 
我揀咗正面擁抱，雙手環繞住對方背脊，結果係大家信任度同安全感十足，相處起上嚟同老父老妻無公別，大家都好獨立咁話。
 
「頂，準到呢！」心裡一邊暗罵，一邊諗緊我同Mark嘅相處。
 
正所謂相不睇不發，命運在我手，如果可以早著先機，自然事半功倍，所以廟街嘅塔羅、鐵板神算、八字相學，無試過九成，都有八成。
 


「嗯⋯⋯都幾準。」喺旁人眼中我地的確係對恩愛情侶，好少嗌交，又好少為左其他人呷醋。但至弊係拍拖兩年已經老父老妻到零激情，唔通真係平淡是福。有時我真係覺得自己大個女，獨立到唔洗男朋友陪。
 
由於Mark係營養師，佢特別關心我嘅健康狀況，閒時就提醒我注意三高，多菜少肉，勤做運動。可惜嘅係佢對我嘅好，並唔係我想要嘅。
 
試問有邊個二十幾歲嘅後生女會餐餐少油、少鹽、少糖。本來生活已經夠苦悶，連食餐好都唔得，生活仲邊度會有情趣喎！所以即使喺Mark嘅努力鞭策下，我嘅減肥大計仍然係明日復明日，從來都未成功過，好在Mark從來都無嫌棄過我圓轆轆嘅身型。
 
你知喇，減肥係女仔終身事業，咁快成功，人生好容易無咗目標㗎嘛。