你同我其實無分別。
 
難得星期五放早,幾個女同事落尖沙咀Happy Hour。燈紅酒綠,飲多兩杯,自不然講下同事壞話。
 
Chloe:「Joanne結婚嗰晚,老細食到一半話要走,佢即刻叫晒大家影大合影,唔知仲以為老細係主人家。」Chloe份人好nice,平時好少講同事壞話,多數都係坐喺位默默做。
 
雖然結婚同我有啲距離,但我都知婚禮係場Show,多數做俾四大長老睇,估唔到嘅係Joanne結婚感言第一句竟然係:「多謝老細抽空蒞臨我嘅婚禮,多謝公司呢個大家庭。」
 
真係天大地大不如公司的恩情大,爹親娘親不如老細親。
 


Coco:「係我就旅行結婚算,用幾十萬搞俾面派對?睬佢都傻喇!」「不羈放縱愛自由」絕對適合用嚟形容Coco,一年飛四五轉,放假唔去旅行不如攞咗佢條命,佢夢想係移民摩洛哥開民宿,貪嗰到夠晒異國風情。
 
講講下,成班同事將個目標轉去我嗰到:「你同男朋友點啊?穩定未?幾時結婚?」
 
我支支吾吾:「未喇,佢話要移民,但我麻麻。」

Chloe:「下!咁點啊?」
 
我:「無點,之前講過分手。不過佢話大家都未有新對象,繼續一齊無損失,可能我有一日會改善主意。我都唔知點啊,咪一齊住先囉,佢個人其實都ok。」幾杯落肚,自然大膽啲,咩都夠膽講出口。
 


Chloe俾我誠實嘅回應嚇親:「咁都得?真係無得救?」
 
我抖一抖肩,望住Coco問:「你呢?你男朋友支持你移民?」
 
Coco:「講呢啲?唔好講佢喇。」
 
Chloe死心不息,不停追問。我見Coco眼神閃縮,一直迴避講佢男朋友嘅事,我識趣咁轉話題:「不如轉場?」明眼人都知,Coco同佢男朋友係有啲野。我覺得佢地同我同啊Mark係冇分別。一樣有口難言,一樣走入死胡同。
 
去或留呢個問題一日未解決,一日都係重複討論、嗌交、無結論,再討論、嗌交、無結論。



酒醒之後,我極度後悔同佢地講咗我同啊Mark分過手嘅事,話晒都係同事,Friend極好難免有日被人事非當人情。
 
已有 0 人追稿