原本呢篇故仔上年年尾已經完成了一半,準備要貼上嚟。但係唔知係我對自己無信心,或者要應付年尾日文考試而擱置。考完日文試,屋企發生咗好多嘢令我好心痛。 

考完試,我阿媽年尾同我去完日本之後,好突然咁患上咗白血病。呢篇文自然無乜心機再寫落去。我同我屋企人以為唔係好大件事,覺得白血病應該到咗今年會醫番好,搞掂哂出院。嗰年年尾我係諗住阿媽醫番好個人,出院唔駛再入去先寫番篇文。 

今年大概復活節,原本有得換骨髓。搞到九月應該一天都光哂可以出院,但係…我阿媽突然昏迷。好難相信,原本好地地,最後會咁嚴重。每一日,我同我屋企人都想阿媽醒番,當佢醒番跟著乜療程都唔做,即刻出院繼續一齊生活落去。 

阿媽情況一日一日轉差,已經一點希望都無埋。我好後悔當佢仲清醒嗰陣入去探佢,無好好咁同佢傾一次偈。佢昏迷後,想交談都交談唔到。時間一點一點咁流逝,醒番嚟嘅機會越嚟越渺茫。生命原來咁脆弱,5月月尾乜嘢都無留低就走咗。 

我到依家都唔係好接受到阿媽走咗嘅事實,我唔知如果有得時光倒流可唔可以挽回一切,或者越搞越衰都唔奇。生活點都要繼續落去,今年8月臨生日之前發現番呢篇文,執咗少少再貼上嚟,當係送俾自己生日禮物,同埋送俾遠在天國的阿媽。阿媽,我淨係識寫呢啲打打殺殺嘅故仔,希望唔會嚇親妳。 



可能你哋覺得我喺度賣慘,如果呢篇前言令你有點唔舒服,我願意喺度講聲對唔住。入嚟講故台,應該係開開心心咁睇一篇故仔。雖然依家香港咁嘅時勢,大家都無心情睇。 

好抱歉呢篇前言好似寫到唔知想點,我嘅中文淨係可以寫到咁樣。如果淨係入嚟想睇故,可以skip咗呢段前言。 

故事參考自電影《天有眼》,《Nocturnal Animals》。 

聲明︰本故事內容純屬虛構,如有雷同實屬巧合。