個故終於寫完喇,應該係我寫咁多篇故最唔舒服同心寒嘅故仔,可能係同依家香港政治同社會氣氛有關。有唔少人物同故事設定係改咗,原本伊臣項友個角色無咁衰格,諗住寫得有少少悲情。不過真係寫唔出… 

文毅同舊故殺人要填命嗎男主一樣係啞嘅,原本係有特別意思嘅,但我一寫到項友伊臣條線,好似將個文毅男主邊緣化咗少少。仲諗住想寫佢寫得深入啲,可能自己水平唔得就寫到唔湯唔水。Dia又係一樣,除咗最後揭露佢真正身份,佢好似存在感唔太強,連另一女角台主蔚藍仲搶鏡過佢。 

個結局有諗過好唔好寫死女主角Dia,我係想文毅送佢去醫院後,Dia就響醫院消失生死未卜,咁樣令到個ending無咁慘。不過諗過諗過,消失結局好似令Dia個角色行為有少少前後不一咁款…(雖然個故有唔少角色行為前後不一咁樣) 

另一女角台主蔚藍上年寫嗰陣係無嘅,係響今年重新寫番突然諗到。本來諗住係等我同睇緊嘅讀者一見到佢,有得紓緩個故悲情氣氛。唔知做乜台主一出場,成個故爭啲失控咁滯,我一寫佢就慶!搞吓搞吓我決定整鬼個台主,惡趣味、嘔心同佢個下場我專登寫到有咁衰得咁衰。(不過幫伊臣個黑警都唔方好人)。 

故中故殺手無夢條Ruby線係我上年原本想寫嘅科幻故事,但係諗唔掂,索性同呢篇故二合為一。對殺手無夢篇故中故我唔係幾咁滿意,最後同Ruby大戰我好似寫衰咗有啲草草了事,太大格局可能我都係寫唔好。 



之後會唔會再出新故呢?俾少少時間我。