[喪屍][人性?][政治?]在喪屍橫行的年代裏，我只想做一個人: 24 探病時間外禁止進入 (二)
我照他的說話做了，「......你係咩人？」
他不理，而對面的其他一樣打扮的成員，也開始快步走過來，「其他人！全部企喺身，雙手放喺頭後面！」
我斜眼看看腳邊的其他人，權叔沒辦法的擺擺手，站了起來。對方有七個人，全副武裝，我們只有四人，即使要打也打不過。
「你哋係咩人？嚟呢到做咩？」
「我哋只不過係普通嘅市民......因為我哋嘅成員之中，有人病咗，所以先過嚟呢到，打算搵藥。」
「......你哋嘅居住地喺邊度？」
「ＸＸ工廠大廈。」
因為未知對方是敵是友，權叔便騙了他說我們之前暫住的那個工廠大廈。對方之中有人翻開地圖，指著給那個領頭的男人看。他點一點頭，「......我唔知你哋需要咩藥，但呢到已經咩物資都冇哂。我哋嚟到呢到之前，所有有用嘅嘢都已經被其他人搶走哂喇。」
「所有都......？」
男人點一點頭，「你哋走啦。」
我們面面相覷。這麼辛苦，長途跋涉才來到這裏，想這麼簡單就打發我們？
「呀......呀......」
突然，我們入來的大門被撞開，一大群喪屍湧入，為首的就是那隻速度奇快的喪屍。我們先是一呆，然後馬上衝去辦公室的另一邊。
「做乜冇啦啦咁多喪屍架！」
我們，連同那些戴臉具的人，衝到辦公室另一旁的大門，然後鐵閂落下，頓時把我們和外面的喪屍阻隔開。
「嗄嗄嗄......」
我們在鐵閂邊氣喘不止，那個男人突然把我壓到鐵閂上，白色的臉具下是憤怒的眼睛：「係咪你哋帶班喪屍上嚟架！」
我冷冷的盯著他，回答說我們也不過是在下面搜索，不小心驚動了喪屍才跑上來。
旁邊一個男人拍拍那個叫allan的人：「隊長，你冷靜啲，佢哋唔係嗰啲變種......」
allan手扶在旁邊，低頭思索一會，「算啦，反正啲喪屍之後就會自己行返落去。」然後他抬起頭，盯著我們，「你哋係喺樓下急症室嗰個入口入嚟，係咪？」
我們點一點頭，他又說：「而家出面咁多喪屍，你哋暫時冇辦法下返去架喇......今日就喺到留一晚啦。」
mk大叫：「吓？我哋好需要馬上搵到藥，唔可以喺呢到浪費時間！」
「你想唔想都冇辦法，出口咁多喪屍，等到佢哋散開之後你哋先離開到。」
那有甚麼辦法呢？只好照他們所說的做了。
他們領著我們，上了上一層。這邊的格局和下層的辦公室一樣，但當中的工作間，桌椅，膠板之類已經被移除，轉而放了一張張的長檯，上面放了不小的文件，顯微鏡，還有一大堆叫不出名堂的東西。
在桌邊其中一個在工作的女人抬起頭來，眼光和我對上，「駱輝......？」
我駐步，瞬間就認出了她，那是之前在荃灣警局遇到，被葉劍南抓走的女人，想不到竟然在此重遇。
「你係serena？」
serena放下手上工作，快步走了過來，「你哋點解會喺呢到嘅？」
「我哋——」
「佢哋入嚟打算搵藥，輾轉就上咗嚟。」
名叫Allan的男子的解說相當簡略。我把藥單交到serena手上，並簡單說了白詩婷的病情。
「痢疾......原來係咁。你哋要嘅藥，我要去搵下有冇。」
「唔係話所有嘢被已經人搶走哂嘅？」
serena白了allan一眼，allan滿不在乎的擺一擺手，serena帶歉意的說：「仲有少少剩底，我去睇下有冇啦。」
說罷，serena就上了上一層，我們和allan站在一旁，而那些在長檯工作的人就由頭到尾都沒有抬起頭，就像我們由始至終都沒有出現。之後serena就把藥帶了過來，「好彩你哋要嘅藥我哋仲有，攞去啦。」
杜嵐伸手接過，「但我哋冇嘢可以同你交換......」
「唔緊要，就當係你哋救咗我嘅回禮啦。」
感覺上他們並不是一般的倖存者。那些桌上的器材，那些堆積如山的文件，不知可處而來的電力——在這一層，不知為何燈是亮的，還有那些全副武裝的男人，這都不應該是像我們一樣在掙扎求存的人有的樣子。藥就這樣送給我們，雖然可以那些東西對她沒有用，但要是我的話不大大的敲詐一筆才怪。
「你哋今晚會喺度留一晚，係咪？跟我嚟，我去睇下有冇房係空出嚟嘅。」
之後她領著我們上了一層，來到一個小小的房間，入面有幾張椅子，「只係得呢到係冇人用......要你哋屈就一下喇。」
權叔擺擺手，「唔緊要，反正都係住一晚啫。」
「一陣間，晚飯嘅時候我拎食物畀你哋啦......」
「竟然仲有嘢食！」
「分量唔會好多，唔好期待太多。」serena笑了笑，就帶上了門。
serena剛走出了房間，我突然想起甚麼，想出去一問，但不料門竟然鎖上了。
「屌你老母......」
權叔見門竟然開不了，就上前不斷拍打，但此門卻是頗為堅固，竟然連絲毫的搖動也沒有。
「喂！鎖我哋喺度做咩呀！開門呀！開門呀！」
門外傳出serena的聲音：「因為我哋有......我哋做緊嘅嘢唔可以洩露出去，所以暫時要你哋屈就一下喇。」
「喂！開門呀！喂！」
腳步聲遠去。
我們默默的坐在房內。這邊只有一個小小的窗戶，高掛在接近天花的位置，雖然未至於碰不到，但大小不足至容納一個人通過，即使是身型最瘦削的杜嵐不能。
「我哋嘅警覺性太低......」權叔恨恨的說，「可能係安逸嘅生活過得太耐，搞到我哋忘記咗要警戒其他人......」
「邊個會估到佢會突然間咁做先得架！」mk妹抱著胸，「一開始扮到好似幫我哋咁，又叫我哋留低又咁易話圍，問佢拎藥咩都唔洗畀就有！」
杜嵐輕聲說：「話唔定佢真係有咩苦衷呢？」
「可以有咩苦衷？就算係有咩秘密，同我哋講唔好亂走就得，做咩要鎖門？」
「佢可能係......」杜嵐欲言又止，「我只係覺得，唔好咁快下定論比較好。」
「事實就係你唔知佢哋做得出咩事！咁樣嘅事都唔係第一次發生啦，上次就係葉劍南，今次？嗰個女人仲要係恩將仇報！」
「......」杜嵐沉默片刻，又抬頭問：「駱輝，你頭先衝出去做咩？」
我說我只是想問一下他們在這所醫院幹甚麼。
「我仲以為你發覺到佢哋有咩陰謀，想衝返出去添。」
我搖搖頭，沉思不語。
我們在房間待了好幾個小時，期間一直沒有人過來。權叔一開始還間中的拍門大叫，但竟然沒有人理他。直至到了大概是旁晚時分，房內開始變黑時，serena才帶著食物和蠟燭進來。
「......你到底想點？」權叔冷冷問。
serena過來時，門外有兩名看來是外國人的看守。
「我早就話過，道門要上鎖，係因為出於某啲原因，我哋唔可以畀你哋四圍走......總之，聽日就會放你哋走架喇。」
「既然怕洩露秘密，唔一早殺咗我哋？」
「你唔相信我都冇辦法......我拎咗食物嚟，你哋鐘意就食啦。」
「我點知食物入面有冇落毒又類？」
「哈，」serena無奈一笑，「如果要殺你哋，使乜搞咁多嘢——」
「鈴鈴鈴......」突然一陣急促的鐘聲響起，然後就是錯落的腳步聲，一大隊人馬在門邊跑過，『敵襲！敵襲！』
外頭傳出一陣陣的喧鬧聲，像是眾多人在交談，奇怪的是，他們在說英語。
serena連忙跑到外面，拉住其中一個跑過的人，『發生甚麼事？』
『喪屍突襲！你......你不是戰鬥人員，快去避難！』
陪同serena的兩個士兵說：『醫生，你快點去避難吧。』
『我......我待會就會去！反而是你兩個，還不去前線幫手？』
『我們受命要保護你安全......』
『我不需要——』
『所有戰鬥人員，請馬上到前線作戰。重複，所有戰鬥人員，需馬上到前線，非戰鬥人員以及研究人員請馬上前往避難......』
『還不去？』
『......明白。請你也馬上去避難。』
serena目送著那兩人離去，「你哋......知唔知道呢到係咩地方？」
「吓？」
「我哋喺呢到進行喪屍嘅研究......喪屍本質嘅研究。」
杜嵐睜大眼睛：「喪屍嘅本質......？」
「你哋都知道，耍破壞喪屍嘅大腦，先可以完全阻止喪屍嘅行動，即係殺死喪屍......由此可見大腦同喪屍有密切嘅關係。我哋發現，即使已經變成咗喪屍，佢哋嘅腦幹仍然有反應，喪屍嘅心肺功能，循環系統等等都仍然運作緊......即係話，喪屍除咗佢哋嘅侵略性之外，純粹就身體機能而言，其實同人類一樣。」
權叔呆道：「同人類一樣，咁即係咩意思？」
「你哋對喪屍嘅印象，大概係一具具以人類為目標，永遠唔會滿足嘅，識得活動嘅屍體。而事實上係，喪屍識得呼吸，喪屍會有心跳，喪屍嘅大腦仍然識活動......簡單嚟講，與其話喪屍係識活動嘅屍體，不如話喪屍係意識被奪去嘅人類。純粹觀察兩者嘅身體，一隻喪屍同一個人類，佢哋係唔會有任何分別，所謂喪屍只不過係患病嘅人類，而呢個人類喺技術上未算係死亡。」
「唔算死亡？」mk妹吃驚的叫了出來，「即係話......佢哋有康復嘅可能？」
「我不過係指出，人同喪屍喺身體機能上係完全相同，但可唔可以康復就係另一回事。喺我，同埋其他研究人員眼中，佢哋只不過係有病，你所講嘅食人，兇殘等等，只係呢個病嘅病徵......」
「但係我唔明白，」杜嵐追問，「我就當你講嘅嘢係啱......但係，我地點能夠當嗰班喪屍係仲生存緊？佢哋不斷咁食人，完全喪失哂理智，我亦睇唔出佢哋懂得思考，甚至有意識......咁樣嘅生物，就算身體機能之類同人類完全一樣，可以話佢哋係生存緊咩？」
「咁嗰啲因為車禍，大腦受損，只有腦幹繼續活動嘅植物人，無法思考，亦無法感知，失去意識，咁又算唔算係生存緊？」
「就......就算你咁講......」
「我哋繼續研究落去，發現喪屍失去對痛，冷熱，光暗之類嘅反應，但奇怪嘅係，佢哋並非感覺唔到，而係喪失咗對呢啲感覺嘅自然反應。例如搵針吉一隻喪屍，佢哋的確會『感覺』到痛，但就唔會有一般人嘅反應，例如縮手，打冷震之類。另一方面，我哋亦都發覺，喪屍雖然可以『感覺』到痛，但唔可以『感知』到痛覺。例如話，斬斷一隻喪屍嘅手臂，佢哋大腦之中有相關嘅活動，去傳遞痛嘅感覺，但痛嘅自然反應就被一啲不知名嘅原因隔絕。同樣地，喪屍亦唔可以感知到自己嘅痛楚——」
「噠噠噠！」
『喂！你們在幹嘛！還不快去避難！』
「呀呀呀......」
就在剛才短短的十多分鐘內，喪屍已經攻入了這層。