[喪屍][人性?][政治?]在喪屍橫行的年代裏，我只想做一個人: 30 喪屍戰爭 (二)

我們馬上趕回石屋，未入白詩婷的房間就已經在門外聽見白詠欣的哭聲。進入房間，只見白詠欣跪在床邊，握著白詩婷乾瘦的手腕，泣不成聲，杜嵐站在門邊，眼角含淚。

「呀嵐，到底發生咩事？」

「婷婷佢......頭先唔知點解個身係咁抽搐，之後就突然間暈咗，叫極都叫唔醒......」

權叔上前用手背摸一摸白詩婷的頭頂，像是碰到火般馬上縮開，然後他再用手指感受白詩婷的呼吸，轉過來對我們說：「白詩婷佢發高燒，呼吸好微弱。」

白詠欣哭道：「明明今日都仲好哋哋，尋日佢仲已經可以落床，點解會......」





權叔輕拍她肩膀，柔聲道：「你冷靜啲先，你係護士，呢到得你先有呢方面嘅專業知識。你冷靜啲諗吓，我哋而家可以做到啲乜？」

白詠欣低頭苦苦思索，「我......我唔知道。我已經盡力照顧佢，但我都唔明點解病情會咁反覆......我哋一定要帶佢去睇醫生。」

「但係而家邊到可以睇醫生呀？」

杜嵐叫道：「serena佢話過，如果我哋要幫手，可以去搵佢！」

權叔眉頭一皺，搖一搖頭：「佢哋喺槍會山軍營，由呢到行過去起碼要幾個鐘，白詩婷冇可能支持到。」





「咁唯有......」呀禮低聲道：「唯有帶佢入村，搵神父幫手。」

也只有這個辦法了。我們馬上抱著昏迷的白詩婷到山下去。到了村口，門前的守衛還一度堅持不讓我們入村，後來經過一輪擾攘，神父來到村口，放了我們入村。檢查清楚我們沒有感染後，我們尾隨神父，穿過平頂民房之間狹小的通道，頂著村民在平房門口或窗戶投射而來的好奇又戒備的目光，來到另一棟看來毫不起眼的白色三層高的平房，門牌號碼一零七。入內，屋內空間比外頭看來的還要廣闊，大概是因為原本的傢俱都被搬走，中央放置了一張長檯，上面放滿了文件和簡單的醫療用具，後方用白布幕掩著，隱約可見放在布幕後方的病床。

「你哋點解......」

出乎意料地，sam竟然也在屋內，在我們進屋時他正在看書，一看見我們，他驚訝得站了起來。

我把白詩婷放到病床上，在微弱的蠟燭燈火下，白詩婷嘴唇發紺，顯然情況不妙。神父戴上醫療手套和口罩，對我們說：「德馨，你留低。其他人出去等啦。」





白詠欣高聲道：「我係護士，等我嚟啦。」

神父瞥了白詠欣一眼，又轉而望回白詩婷，「好，你嚟幫我手。」

我們走到屋外，sam低聲問道：「白詩婷佢到底發生咩事？」

權叔輕嘆一聲，搖搖一頭，「佢突然間暈咗，叫極都冇反應，我哋都唔知發生咩事。」

sam點一點頭，沒有回話。有好一段時間我們沒有說話，眾人之間的氣氛有點尷尬，杜嵐率先打破沉默：「sam，你係咪打算......唔再返石屋？」

「暫時我會住喺到，因為我暫時仲想跟住神父學嘢。」

「你係咪真係已經加入咗神父嗰個最後聖殿？我聽駱輝佢哋講，神父自己都話呢個係邪教嚟。仲有，小剛佢哋話神父好可能同村民失蹤有關，而家連村長都失蹤埋。佢哋唔係好人嚟架。」

sam冷峻的臉上浮現一絲笑容：「最後聖殿的確係邪教，佢只不過係利用宗教嘅名義去管治呢條村。但我要向神父學嘅係信仰......學習去相信。」





杜嵐皺眉：「我唔明白......」

「失去呀穎，我失魂落魄漫無目的咁行，行咗入湖到， 畀上山狩獵嘅村民發現，帶咗我入村......佢哋帶咗我去見神父。」他頓一頓：「我同神父講， 我唯一嘅生存意義，我所愛過嘅女人，喺我面前變成喪屍，喺我面前被殺......我同佢講，如果世界真係有上帝，點解佢要容許呢一切發生？點解呀穎咩事都冇做錯到，但要變成喪屍？......我話，我一出世我老豆就走咗佬，我老母成日吸毒，我喺垃圾筒搵嘢食嘅時候，上帝去咗邊？我喺公園喊嘅時候，我為咗生活淪落到去偷嘢嘅時候，點解佢唔幫我？點解我嘅生活會咁悲慘？我同佢講，我唔信上帝，我亦唔打算信上帝——如果上帝真係存在嘅話，我就只有自殺呢條路，因為只有自殺先可以逃離呢個佢一手創造嘅可笑世界。」

雖然sam覆述這段說話的時侯，語氣十分平淡，但可以想像當時mk妹剛死，sam悲憤交加時對神父怒吼的情景。

「神父只係靜靜望住我，慢慢講咗一句：『咁如果世上的確冇上帝，你係咪就唔會自殺？』。我冇回答。佢再問：『如果冇上帝，冇神，呢個世界只有我哋自己，你係咪就願意接受呢個世界？』。我話我唔知道。」

「神父話，其實佢好清楚，響而家呢個一切既定價值同意義都已經被毀滅嘅世界，宗教係好好嘅手段去重塑價值。神父佢知道，所有人都知道，所謂最後聖殿只係毫無意義嘅邪教，但如果冇咗佢，我哋，而家見到嘅呢條井然有序嘅社會就會再度毀於一旦。所謂最後聖殿只不過係劉居借用上帝嘅名義創造出嚟，用嚟統治嘅工具，神父都只不過係被迫捲入。」

「神父嘅理論係，人無法理解上帝，而如果人可以理解上帝，咁我哋就唔再需要上帝。正正因為理性無法理解上帝，人只有完全拋棄理性，用熱情，全心全意咁去信仰上帝。我話我唔需要上帝我都可以生存落去，佢話，你行落去湖到，唔係諗住自殺咩？我話，係又點？我講過，如果真係有上帝，咁我亦只有自殺呢條路。佢望住我，同我講，你咁樣只不過係自我毀滅。」

「我冇出聲。他話：『或者理性可以解釋人點解會變成喪屍，但對於每一個變成喪屍嘅人而言，對每一個因為親人愛人變成喪屍而悲傷嘅人而言，可以解釋到「咁點解要係佢」呢個問題咩？如果真係解釋到，又有咩人可以接受到呢個解釋？所以我明白你。如果你嘗試用理性去解釋一切，你只會不斷被痛苦折磨。』。我到呢一刻終於忍唔住，我企起身大叫：『我同你講，有對住喺山上嘅老夫婦，我因為太肚餓而去搶哂佢哋嘅食物，你嗰位上帝點解唔阻止？我見過有個女人為咗一罐午餐肉去出賣身體，個仔餓到連喊都冇力，你嗰個上帝點解會缺席，唔伸出援手？我見過有個男人因為個女死咗而自甘墮落，你嗰位上帝喺咪一路睇緊一路偷笑？仲有無數咁多人，因為自己最愛嘅人變成喪屍而自殺，上帝點解選擇沉默？......』」





「神父聽住我講，靜靜咁行到我面前，輕輕咁擁抱我。嗰一刻我失控咁喊起上嚟，我自己都解釋唔到，點解我要咁激動......我喊住咁問：『上帝真係可以幫到我？』神父回答：『人唔單止需要物質上嘅麵包，更需要精神上嘅麵包。』」

「我唔夠膽講我相信上帝嘅存在，但我想試下去相信。」

說到此處，大門忽然被打開，白詠欣臉色慘白的走了出來，眾人馬上問她結果，她低聲回道：「婷婷佢暫時已經脫離危險期，但仲要觀察多一陣。」

權叔問：「你係指白詩婷要留喺村到？」

白詠欣點點頭，「我打算留喺到，直到婷婷好返為止。石屋嗰邊嘅工作我會照做，不過可能會遲少少先到......」

權叔無可奈何的擺擺手，「你點解唔同我哋商量下先呢？」

「我......我唔想再好似今晚咁，婷婷突然出事但我咩都做唔到。呢到有醫生，有咩突發事都有醫生在場，所以我就擅自決定留喺到。」

「但係咁樣會唔會有危險？」杜嵐問：「唔計神父，村入面啲人好似唔係好鐘意我哋，又有人失蹤，嗰個劉居仲好似係壞人嚟......」





「我諗，如果sam都喺到嘅話，發生咩事都會有個照應。」說著，她望向sam，等待對方的回應。

「我都唔知劉居會做出咩事，但如果佢真係要加害於你，我冇可能袖手旁觀。」

「既然係咁，我都要留喺度。」呀禮說道：「多個人照應吖嘛係咪？」

權叔長長嘆了口氣：「唉，你哋個個都自把自為。」

我笑了笑：「呀禮都係擔心白詠欣啫......不過，你哋話要留低，唔代表人哋會收留你哋——」

「如果你哋想住喺到，我無任歡迎。」神父站在門邊，氣若游絲，「村入面供應畀我嘅食物，我自己都食唔哂。雖然啲村民可能會有微言，不過睇在我份上，只要你哋唔好做咩刺激佢哋嘅嘢就冇事。」

這樣下來，這晚回到石屋的就只有我，權叔和杜嵐。隔日早上，白詠欣和呀禮回到石屋，開始一天的工作，但sam依舊沒有回來。我和權叔到外搜索，一路上只遇到幾隻落單的喪屍，收穫也不多，只找到一兩個罐頭。如此少的收穫量代表附近地區大概被搜括乾淨，如果要找到食物之類的可能就要冒險走到市區了。住在郊區雖然基本上不會遇到喪屍，但相對的要到物資豐富的市區就要走一大段路。





當晚上回來時，白詠欣和呀禮正在準備晚餐，杜嵐在修補破損的工具。所謂晚飯就只是幾根香蕉和烤魚。飯後，我和權叔坐在火堆旁，討論到市區搜索的路線和策略，杜嵐把剩下的魚骨，蕉皮之類當作肥料，埋到田中，呀禮和白詠欣則起程回到村子。這可真是寧靜又平凡的一天——

「碰！」

門突然被打開，白詠欣和呀禮站在門前，表情複雜。

「你哋又返番嚟嘅？」

「黑沙圍嗰邊而家被喪屍攻打緊，我哋根本入唔到去！」