[喪屍][人性?][政治?]在喪屍橫行的年代裏，我只想做一個人: 32 食人的喪屍 (一)
「小剛！你終於嚟喇。」穿過潮濕陰暗的秘道，廢屋中小剛的朋友阿奇已經等候多時，「等咗咗耐，仲以為你出咗咩意外！」
「我唔喺到嗰陣有冇咩異樣？」
「劉居啱啱帶咗班人質去祠堂前面嘅廣場，誠哥已經去咗睇吓發生咩事。」
我們一行七人，隱身於村內一座破破爛爛，不堪使用的瞭望台上。
「呢班人會帶嚟不幸！」
「冇錯！」
「自從災害降臨香港，我哋一直受到神嘅保護，呢一個幾月一直冇怪物夠膽入侵呢條村，但尋日嗰班人一出現，果晚班怪物就馬上入侵！你哋話，係邊個嘅錯？」
「係佢哋嘅錯！」
「對付呢班受到詛咒嘅人，我哋應該點做？」
「燒死佢哋！燒死佢哋！」
「冇錯！只有聖火先可以淨化佢哋嘅罪孽！」
呀禮和白詠欣兩姊妹被縛在廣場中心，動彈不得，數個穿白衣的男子圍著四人，防止他們逃跑。劉居聲如洪鐘的宣告四人的罪狀，每說完一句，在廣場圍觀的村民便附和一句。
「呢三個受到詛咒嘅人，要懲罰佢哋都唔急於一時，我哋今晚就開始審判佢哋！」
「仆你個街......白詠欣同呀禮都算，白詩婷有病又咁細個，都要咁樣對佢！班仆街真係冇人性！」
「小剛，到底咁係咩一回事？」杜嵐問。
「自從嗰晚喪屍入侵之後，佢哋晚晚都攻入嚟，條村陷入混亂，佢哋好擔心再咁落去條村會被攻陷，加上原本一路都冇喪屍攻過嚟，而家突然發生咁嘅事，佢哋就開始質疑神父同劉居嘅統治......佢哋就做一場咁嘅戲，一來係要安撫村民，二來為咗殺雞儆猴，等村民唔敢做反。」
我冷冷一笑：「燒死幾個人就可以令班喪屍唔入侵，信嗰個都白癡。」
杜嵐望向廣場，像是在找尋甚麼：「神父同sam佢哋去咗邊？」
「頭先都佢哋冇出現......」誠哥懶懶的說，「自從喪屍出現嗰晚，好似都唔係好見佢哋喺村到浦頭。」
小剛點點頭，「聽講神父佢受咗傷，呢幾日我都冇見佢出嚟傳道，sam好似去咗照顧佢。」
望回廣場中心，呀禮和白詠欣等人不知被送到那裡去了，只剩下劉居，手持一本厚厚的白皮書，向村民講道。
「......他要把他們分別出來，好像牧羊的分別綿羊、山羊一般。把綿羊安置在右邊，山羊在左邊，於是王要向那右邊的說，你們這蒙我父賜福的，可來承受那創世以來為你們所預備的國......」
「......王又要向那左邊的說，你們這被咒詛的人，離開我，進入那為魔鬼和他的使者所預備的永火裡去。因為我餓了，你們不給我吃。渴了，你們不給我喝。我作客旅，你們不留我住。我赤身露體，你們不給我穿。我病了，我在監裡，你們不來看顧我......」
「......我實在告訴你們，這些事你們既不做在我這弟兄中一個最小的身上，就是不做在我身上了。 這些人要往永刑裡去；那些義人要往永生裡去......」
每位村民手上都持一份文件，那大概是經文的複本。劉居帶領著眾人，高聲朗讀經文，語氣堅定，聲調鏗鏘有力，彷彿對於經文的內容深信不疑。
「各位！我哋就係綿羊！我哋係蒙天父賜福嘅一群！所以，當天父嘅審判降臨，我哋得以幸免！而之前帶嚟災禍嘅三個就係魔鬼嘅使者！佢哋打算將嗰班被詛咒嘅罪人嚟到呢條村到！但各位唔洗驚，因為我哋係受天父眷顧嘅綿羊，天父已經派咗佢另一位兒子，即係我哋嘅救世主嚟到塵世，好快就會拯救我哋，帶我哋進入新世界！」
眾村民齊聲讚歎，甚至有人淚流滿面，彷彿所謂的救世主就在眼前，向各人伸手，帶他們進入所謂的新世界。
「哈哈，邪教！真係邪教！」權叔目不轉睛的看著廣場，嘿嘿的冷笑著。
「嗯......」小剛沉吟片刻，「我有個計劃，我哋今晚就去救返村長，同白詠欣佢哋。」
---------------------------------------------------------------------------
「小剛，你真係覺得咁樣做......真係好咩？」
「你有咩更好嘅方法？」
「但係咁樣即係同哂全村人作對......」
「你怕？」
「嘿，嚟到呢一步，只有勇往直前喇。」阿奇搖頭笑道。
我，小剛和阿奇在土地廟前，監察村子的一舉一動。
「有喇！」
小剛興奮的指著村子東部——一縷白煙滾滾而上，下面冒出點點的火光。
那是提示我們行動的訊號。
「好，跟住到我哋喇......」
我們各自推著一個大膠筒向村子前進。膠筒內裝的是硝酸銨和汽油的混合物。
「硝酸銨同汽油混合可以製成炸彈......你點知呢樣嘢架小剛？」
「我以前響台灣住過一排......台灣好興用呢種炸彈做恐怖襲擊，因為硝酸銨係肥料，而汽油係燃料，兩樣嘢都好易得到......咁樣製成嘅炸彈俗稱『肥料炸彈』。」
硝酸銨雖然是肥料，但具爆炸性。過去曾發生因管理不善引發爆炸的例子，因此硝酸銨被存放在村外稍遠的一個倉庫外，這對務農為生的村民而言亦較方便。汽油和膠筒在原本拋錨的車上和附近的廢車處理場獲得。
現在大約是晚上六點左右，天才剛入黑，喪屍將在短時間內開始攻城，我們要抓緊時間。由於裝著炸彈的膠筒頗重，我們花了不少時間才到達村子。
小剛在村子土生土長，因此他對村子的圍牆和瞭望台視野死角位置了然於胸，而剛才由村內的權叔，誠哥和杜嵐引發的小型火災也能調開部分看守，所以我們能在不被發現的情況下到達圍牆之外。
「冇咗我，誠哥同小剛，呢班友就好似冇咗大佬咁......剩係放下火都引走咗咁多人，如果真係有喪屍響呢個時間襲擊咁點算。」阿奇低聲抱怨著。
「都唔諗得咁多喇......阿奇，駱輝，而家照計劃行動！」
村子的入口位於正東方，我們分別在北，西，南面放置炸彈炸毀圍牆，於是村民不得不分兵守衛缺口，防止喪屍入侵，於是我們便能趁村中防守薄弱的時候營救人質。
「滋......轟！」
用浸過油的棉線作為簡單到不行的導線，點燃之後馬上離開，緊蓋著耳朵，大約三秒之後，震天價響，炸彈隨即爆炸。回頭一看，只見一片白煙，硝煙味撲鼻而來，滿地瓦礫，圍牆上出現一個偌大的缺口，大約可供兩人同時通過，這下子他們必須多派些人防守。
當村民們亂成一團時，我們立即前往村外的秘道入口。
「喂，小剛......之前嘅事，好對唔住。」
「吓？」
「你救咗我，又幫咗我哋咁多，但之前你叫我哋幫手救村長，拒絕咗你。而家都係因為自己人都畀人捉埋，先至有所行動。」
「算啦。」小剛搖一搖頭，「而家唔係講呢啲嘅時候......我哋就到喇！」
「等等先......」到達秘道出口時，小剛探頭而出，「一個人都冇......」
我們分成兩隊，小剛，阿奇和我潛到村外引爆炸彈，而杜嵐，權叔和誠哥四處縱火以混淆視聽。誠哥會向守衛報稱發現縱火者，盡量引開部分守衛，為了增加可信性，權叔和杜嵐會適時出現在追兵面前。誠哥會引追兵到錯誤的方向，而權叔和杜嵐會逃到我們身處的秘道隱匿。
「時間緊迫，再等落去我驚班追兵追唔到人會返返去，我哋而家行動啦！」再等了大約五分鐘依然未見杜嵐她們出現，計劃馬上進入第三部分。
「小剛......？呢個人咪係石屋嗰邊嘅......」
我們來到村公所前，這本是村內行政機構的地方，村長一派失勢之後，劉居和神父一派取而代之，此處亦成為他們的辦公室。門前兩名守衛正在站崗，窗戶似乎用甚麼封死，黑漆漆的看不見內裡的情況。
「呀......」小剛在我身後生硬的笑道，「講起上嚟就好笑喇，頭先咪又爆炸又放火咁嘅，咪就係佢同班同黨搞出嚟架囉，諗住趁機過嚟救人，點知都未嚟到已經比我發現咗喇......呃，副主席佢喺唔喺到？」
「佢哋帶咗嗰班人去村中廣場喇。不過神父佢喺樓上，等我上去同佢講你嚟咗啦。」說著，和小剛說話的守衛蹣跚的上樓，在他推門的一刻隱約看到屋內空無一人。另一守衛繞到我背後，低頭檢查縛在我手的繩結是否牢固，就在此刻，小剛和阿奇對望一眼，兩人幾乎同一時間往那守衛頸旁一擊，那守衛便無聲無息的倒下。
「喂，小剛，神父話佢暫時唔想見任何人......吓...... 」
去而復返的守衛在推開門的一刻看到地上的昏倒的守衛，連驚呼都來不及，小剛一拳打在守衛胸口，他悶叫一聲便隨即倒下。
「睇唔出你斯斯文文，出手都幾狠架喎。」阿奇用刀割開我手上的繩結時，我對小剛這樣說道。
「呢班仆街捉咗我老豆，我出手梗係唔留情面。」
「真係一條友都冇......」阿奇在屋內環視一周，低聲道：「根據我之前收到嘅情報，村長同嗰班失蹤者比佢哋困響地下室......」
小剛馬上走到地下室，嘗試打開門，但門卻上鎖了。
「仆街......我哋上去問神父攞鎖匙！」
即將可以救出父親，小剛變成急躁起來，我和阿奇尾隨小剛，來到二樓唯一有亮光的房間前。
「小剛......駱輝......？」
房間內，半截蠟燭的燈光在搖曳著，投射在牆上的sam的影子忽暗忽明，在我們見面之前，sam正坐在床邊一張木椅上，如今他站了起來，滿臉驚異。
「神父。」小剛直直走向床邊，向床上那個瘦弱的身影問道：「地下室嘅鎖匙喺邊？」
「鎖匙唔喺我哋到。」sam搖頭。
小剛盯著sam，冷冷說道：「我唔係問緊你。」他的氣勢強得連sam也不敢與他相望，移開目光。
床上的神父只是說了幾個字就猛烈咳嗽：「我......咳......我冇......咳咳咳......」
小剛不多費唇舌，馬上在房內東翻西找，所有可能藏東西的地方也找過了，抽屜，書櫃，床底......苦無所獲。sam在旁怒道:「我哋冇呢到地下室嘅鎖匙呀！呢到一直係劉居班人住嘅地方，我哋都係因為神父受傷先搬咗過嚟咋！劉居一直警告我，唔畀入地下室，我哋點會有鎖匙呀！」
突然，忙得像盲頭蒼蠅的小剛陡然停下，望向了sam，然後他一個箭步走到床邊，一下子地掀開蓋在神父身上的棉被——
除了sam和神父，全部人都呆住了。
沒有鎖匙。令人震驚的是神父身上的傷勢：他胸膛有好幾處深陷到腹腔的傷口，有些傷口的闊度大得甚至可以讓我們看到內裡的內臟和胸骨，甚至在跳動的心臟。全身上下大小深淺不一的傷口，相對之下就不太令人驚訝。
常人的話，鐵定早已死了。