[喪屍][人性?][政治?]在喪屍橫行的年代裏，我只想做一個人: 34 食人的喪屍 (三)
小剛的鐵撬「噹」一聲的掉地，上面粘滿紅白色混合的漿糊狀物體。
「咿呀！！！」sam暴起，撲倒了小剛，一拳打到小剛的臉上，「你點解要殺神父！點解！點解呀！」
我和阿奇費盡九牛二虎之力才能把sam拉開，這時小剛已經打得臉目模糊，嘴角和鼻子流血，軟攤在牆邊，低聲嘟嚷著甚麼。
「點解你要殺死神父！你條仆街答我呀！」
「神父佢食人呀！」阿奇怒道：「你去地下室睇下就知喇！」
「你唔好亂講呀！」
「阿奇佢講得啱。」我低聲道：「我哋喺地下室發現咗村長嘅屍體。佢......俾人砍開一舊舊，仲有個雪櫃，入面雪住好多人嘅肢體同內臟。」
「咁......你都唔可以一口咬定係關神父事！神父佢今日先因為受傷被送過嚟，又傷到床都落唔到......」
「你全天候二十四小時跟住神父咩？你可以百分百肯定神父同地下室無關？神父係喪屍嚟，出面班喪屍甩頭甩骨都照樣追住我哋跑啦！」
「我唔信......我唔信神父會食人！」
「你畀佢呃咗喇！呢一切都係神父扮出嚟架咋！好簡單一句，你有冇親眼見過神父食嘢呀？」
「我......」sam低著頭，「神父佢成日將村配給嘅食物，讓畀我同白詠欣佢哋......」
「咁就梗係啦，因為佢係喪屍吖嘛！佢就好似養豬咁，俾嘢你哋食然後搵日劏咗你嚟食呀！」
「......」sam低頭不語。
自己最信任的人竟然處心積慮想殺死自己，把自己當成食物......這是難以接受，卻血淋淋的事實。
我和阿奇扶起小剛，對sam道：「你地下室睇下啦，神父佢唔係你想像中嗰個好人嚟。」
我們把小剛扶到大門前，正想開門之際，門卻自己打開了——
「噢，有意想唔到嘅訪客。」
門後站著的是劉居，身旁邊還站著六七人，其中赫然發現那兩名被打暈的守衛，顯然就是他們通風報訊。
本來我們的行動要趕在守衛醒來前完成，但誰料到會發生神父和地下室這樣的事，輾轉下我們都忘掉時間緊迫這項事實。
「劉居......」
「咦，你識得我？」劉居衝著我冷冷一笑，「我認得喇，你係石屋嘅人，嗰班魔鬼嘅同伙。」
「魔鬼嘅同伙？你係咪講緊你自己？」我咬牙道：「神父係喪屍呢件事，你冇理由唔知道，係咪？」
聽見我這樣說，劉居雖然還是嘻皮笑臉的樣子，但臉上頓時蒙了一層寒霜，「神父係喪屍，咁又點？」
「咩叫咁又點呀，你哋利用宗教去愚弄村民，仲暗中捉咗唔滿意你哋嘅村民，攞去畀神父呢隻喪屍食！」
「你唔好含血噴人。」
「呢間屋入面嘅地下室，就有神父食人嘅證據！容許佢咁做，甚至提供活人畀佢嘅你，一樣係惡魔！」
「嗯。你講完未？」
「你哋醒下啦！」我不理劉居，向劉居身邊的守衛喊話，「神父係喪屍呀！村長條屍仲喺地下室呀！你哋係咪仲要助紂為虐呀！」
「你講嗰啲嘢，我哋全部都知道。」其中一名守衛說道，「唔怕同你講埋，捉村長走嗰晚，我都在場。」
阿奇怒道：「原來你都有份......」
「我從來冇隱瞞過任何嘢。」劉居沉聲道：「神父唔單止係喪屍，佢仲有能力控制其他喪屍。換言之，只佢想，佢就有能力令呢條村免於喪屍嘅騷擾。於是我哋同佢做咗個交易，我哋提供活人，佢就用佢嘅能力保護條村。」
「荒謬！」我大叫，「要保護條村，結果竟然要犧牲村民嘅性命！咁樣根本就係本末倒置！」
「咁樣係必要之惡。你哋喺石屋住咗咁耐，應該附近嘅地方都探索過哂架啦？嗰班喪屍出現冇幾耐，條條村已經陷入一片混亂，內部糧食不足，外部又有喪屍不斷騷擾，幾乎日日都有人死。內憂外患之下，幾乎每一條村都發生大大小小嘅爭執，最後演變成一係開戰，一係離開。」
「然後神父出現，令到呢到唔再被喪屍侵擾。但問題未被解決，甚至可以話係惡化咗，因為其他村嘅人都開始發現唯獨黑沙圍冇被喪屍入侵，於是佢哋開始湧入嚟。最初我哋唔畀佢哋入村，之後佢哋要求我哋交出神父，甚至打算聯合一齊攻入呢條村。最後，係我提議，放所有人入村，條件就係，佢哋必須要百分百服從我哋嘅領導，否則殺無赦。」
「我哋要求所有人服從指示去工作，生活，甚至連同妻子伴侶行房都要管埋，呢一切都用宗教嘅名義去包裝。我哋宣稱，係因為神父被上帝保佑，我哋先冇再被喪屍入侵。我哋甚至捉咗一隻喪屍，困住佢同神父，畀其他人見到，喪屍冇去咬神父，仲自己走開......當呢種事確確實實發生喺自己眼前，就算係再堅定嘅人都不免會相信，真係有所謂神跡。當然，呢個時候仲有唔相信嘅人，懷疑嘅人，我哋就建立高壓統治，鎮壓所有唔服從嘅人。最後，呢條村終於回復秩序。」
「秩序？」阿奇衝前，抓住劉居的衣領，「你哋只不過係美化自己嘅極權統治！你哋所做嘅嘅一切有冇徵求過村民嘅同意？當然冇，因為你推村民去做喪屍嘅食糧！你哋剝奪人嘅自由，去玩弄村民嘅性命，甚至連村長都成為你同神父嘅犧牲品......你哋只不過係一班人渣！劉居你只不過係趁亂奪權嘅人渣之中嘅人渣！」
旁邊的守衛馬上抓住了阿奇，把他拉到一旁。劉居整理衣襟，冷笑道：「自由？你住咗喺到咁耐，你睇班人點運用佢哋嘅自由？佢哋燒殺搶掠，互相攻擊同背叛，呢個就係佢哋運用自由嘅方法。倒不如將佢哋嘅自由完全剝奪，由我哋分配哂所有嘢，咁佢哋就再唔會互相爭鬥。我哋利用神父，表演神跡，令所有心靈脆弱嘅人有所依靠。我哋利用人嘅自私同軟弱去管治人，令佢哋不得不服從。你可以話佢哋唔幸福咩？失去希望同家人嘅人而家搵到心靈寄託；所有人而家都可以得到食物，唔會再出現互相爭奪嘅情況。而呢一切嘅代價，只不過係村民嘅自由，同極少數人不服從者嘅性命——同之前一片混亂時侯，幾乎日日都有人死，相比之下嗰少少犧牲又算係咩呢？」
「如果你覺得我係人渣，咁都冇所謂。自從選擇行呢條路，我哋所有人對呢點都已經有所自覺。」他笑了笑，「的確，我哋先係惡魔嘅同伙......但我哋係為咗人嘅福祉先咁做。」
我無意去反駁他的歪理，只冷笑一聲：「只可惜你嗰位惡魔盟友已經畀小剛殺死咗。你嗰套把戲而家唔再有用喇。」
劉居望了倚在我身上，不醒人事的小剛一眼，「冇所謂。反正自從喪屍忽然再度入侵之後，村民開始唔再相信我哋，搞到我而家，要同佢收拾呢個爛攤子。小剛殺死咗佢，我就唔需要出手。」
「你條仆街！」阿奇忽然掙脫了守衛的束縛，直直衝向劉居，打算揮拳之際，被旁聽的守衛揮動鐵鎚擊中腦袋，沉哼一聲後，隨即氣絕。
「哎，就咁死咗真係可惜，原本仲準備咗個舞台畀你。」
「舞台......？」
「你有興趣？唔使心急，你同小剛一陣都會去嗰到。」
「......你係指要燒死我哋？」
劉居一呆，隨即哈哈大笑：「冇錯。」
「神父都已經死咗，你仲要玩呢啲把戲？」
「總要做啲嘢去平息村民嘅怒火。唔咁做嘅話，佢哋嘅矛頭就會指向我哋。」
我背脊發涼：「你真係......」
「你就準備去感受下村民嘅怒火啦。」