[喪屍][人性?][政治?]在喪屍橫行的年代裏，我只想做一個人: 36 先入為主 (二)
「小姐，快啲放低把槍啦，小朋友唔適合玩啲咁危險嘅嘢㗎。」劉居又高舉雙手，神色囂張，冷笑連連，「而且，你唔係諗住你響咁遠都射得中我下話？」
「嘭！」
杜嵐又開一槍，剛好命中劉居大腿，劉居應聲跪地，緊按著血如湧泉的大腿，狀甚痛苦。
「邊個都唔准過去！唔係我立即殺咗劉居！」
「你哋......唔好過嚟......」神父舉起那顫抖的右手，叫止打算上前的教徒，「你......你去放咗佢哋......」他向著守衛這樣說，眼睛一眨一眨的好像傷口很痛的樣子。
「快手啲呀！」見教徒們解開繩結的速度慢得可以，杜嵐不住催促他們。
杜嵐目不轉睛的看著廣場中的動靜，若果有人稍有異動她便馬上喝止。因為神父那尊貴的性命在杜嵐手上，所以他們也不敢輕舉妄動。
呀禮被解開束縛之後，馬上脫下自己上衣讓白詠欣穿上，白詠欣卻沒有理會自己衣不蔽體，而是趕到白詩婷那邊察看她的傷勢。權叔見台上人人神情頹靡，滿身傷痕，白詠欣更不知何故赤身露體，忍不住怒吼道：「你班人口口聲聲話我哋係惡魔，你哋嘅所作所為先係惡魔！有咩理由要喺眾目睽睽之下除哂個女仔啲衫呀？又有咩理由打到個細路女咁樣？佢仲病緊㗎，你班仆街！」
「自從你嚟咗之後，呢條村一日安寧都冇！明明我哋係被天父保佑，冇喪屍夠膽入嚟，佢哋一入村，就馬上有成堆喪屍攻入嚟喇！呢班人，睇落係女人仔，細路女咁，事實只不過係惡魔嘅偽裝！我哋已經發現咗喇，嗰個女人已經受到感染......」
「夠喇！」我向那名站起來的村民怒吼道：「你哋全部都畀劉居同神父呃咗喇！因為神父佢本人就係喪屍，佢有能力去控制其他喪屍，所以先會冇喪屍入侵咋！劉居佢明知到呢一點，反而仲同神父聯手去奪權！村入面反對劉居嘅人，全部都被當成係食物，入咗神父個肚到喇！你班人仲好似豬欄啲豬咁慒盛盛，事實上同惡魔勾結嘅係劉居呀！」
儘管杜嵐和權叔來營救，表面上一時間控制著局面，但要我們全身而退那可不容易。村民是其中最大的不穩定因數，要安全撤離的話就必先要令村民了解事情的真相。
「你......你有咩證據呀？」
「只要你哋去村公所嘅地下室就會明白！地下室到有唔止有村長嘅屍體，雪櫃到仲有其他人嘅屍體！最大嘅證據就係，地下室仲有食剩咗嘅人肉！」
此話一出，群情洶湧，眾人竊竊私語，針對我們的指責聲頓時少了一半。只是劉居仍然看似一臉輕鬆。
......該死，我忘記了，運我們過來之前，他有充足時間消滅證據。
「睇嚟要洗刷污名，就只有叫人去村公所睇吓喇。」劉居嘿嘿的冷笑著。
「去到都冇用，你已經毀屍滅跡喇。」小剛高聲說道，不知是否因為被sam打過的關係，他的聲音有點模糊。
地上室的證據已經被消除，那麼唯一的人證，sam，也可能已經遭遇不測。他長期待在神父身邊，要是他出面指證的話，威力比我們大許多，知悉此點的劉居，大概就是免生枝節，而先行「解決」掉sam。
「我反而好奇，到底係邊個想毀屍滅跡。」神父轉而向村民道：「各位，我要宣佈一個沉痛嘅消息：神父佢已經死咗喇，兇手就係佢，」劉居指著小剛，「梁啟剛！」
小剛一愣，還未意識到發生何事，一名村民揚聲大叫：「殺人兇手！」
這一聲像是燃點藥引一樣，村民的怒氣又再度爆發。
「你點解要殺咗神父呀！」
「神父對你咁好，你點樣落到手呀！」
「冇咗神父，我哋仲點對抗惡魔呀？」
小剛急了，高聲辯解道：「因為神父係喪屍，而且殺死我老豆，我先嬲到去殺咗佢咋！」
村民中一道尖聲尖氣的聲音問道：「咁你即係認你殺咗神父啦？」
小剛一時為之語塞：「我......」
「殺人兇手！」
「殺人兇手！」
「殺人兇手！」
村民的聲浪大得震耳欲聾，怒氣在這直徑不到二百米的廣場，不斷發酵升溫。在一片指責聲中，有人甚至激動得想衝上高台，幸好被守衛阻止了。一切的始作俑者劉居，此時傷口已經由守衛包紮好，正冷笑地看著我們。
「喂，咁樣唔係辦法。」呀禮低聲向我和小剛說：「唯有叫杜嵐同權叔控制場面，同叫班群眾開路。」
「呀嵐！呀嵐！」一來群眾的聲浪太大，二來她自已也是看呆了，完全想不了局勢竟然發展成這樣，我接連吼了好次她才反應過來，我再道：「你快啲諗吓辦法控制場面呀！」
她點點頭，然後想了一會，向天開了兩槍，群眾才慢慢靜了下來，但仍然怒氣沖沖的看著我們。杜嵐朗聲道：「無論點都好，劉居條命依然喺我手上，如果唔想佢冇命嘅話——」
劉居凜然一笑：「太遲喇。」
本來權叔和杜嵐全神貫注留意廣場動靜之餘，理論上還不至於不發覺有人靜悄悄接近她們，豈料事情發展太出人意料，加上群眾的怒吼聲掩蓋，到她們發現背後有人時，已經是被制伏後的事。
在村民的歡呼聲之下，他們兩人也被扣押至廣場中心。由於場中木柱數量不夠，兩人只是用麻繩綁住，站在一旁，而我們亦重新被縛。
「死𡃁妹咁夠膽射我？」神父摸著自己大腿上的傷口，狠狠的掌摑杜嵐，「你以為你有槍就好勁？可以對抗我？死靚妹都唔睇下自己有幾多斤兩！」神父雙目怒睜，每說一句便摑她一下。
「摑夠未呀！」我忍不住叫道，但旁邊的教徒一棒打在我肚子，我險些吐出來。
「......」杜嵐被兩名守衛按到在地上，雙頰通紅，但她依然一臉倔強，雙眼緊緊盯著面彎下腰，臉目猙獰的中年男人，不發一語。
「望乜撚嘢呀？講嘢呀屌你老母！」神父見杜嵐全程沉默不語，神父像發了瘋似的不斷毆打她，群眾不斷叫囂叫好，似乎她被打得愈慘他們就愈高興。
這時，一名守衛走到劉居身旁，低聲說了不知甚麼，劉居一邊聽一邊皺眉。他不再找杜嵐麻煩，向群眾揮手道：「唔需要再審判喇！證據確鑿，呢班人係罪有應得！」
杜嵐被守衛帶到我旁邊，鮮血在她鼻孔緩緩流出，臉頰紅腫，我低聲道：「你流鼻血呀。」
「係咩？」她鼻子抽動幾下，嘗試阻慢血流，但無補於事，轉而對我笑道：「除咗細個瀨尿畀呀媽打之外，我咁大個女都未試過比人打得咁慘。」她凝視著我，輕聲道：「你都比人打得好傷呀，塊臉又腫又流血。」
「......點解仲要返嚟？」
「為咗救你呀。」
「救我？你知道，咁樣只係大家一齊死......你應承過我要好好生存落去，咁快就唔記得咗？」
「我記得呀。」她向我嫣然一笑，轉而望向天空，「......但如果人只係為咗生存而活喺世上，咁嘅人生又有咩意義？」
「唉。」我不禁又輕嘆一聲，「呢一切好快結束。」
「點解你哋明明畀劉居用高壓統治緊，你哋唔反抗不特止，仲要為虎作倀？」一直默不作聲的誠哥，突然高聲這樣說：「你哋諗吓，自從劉居掌權之後，你哋喪失咗幾多嘢？原本有家人嘅被迫要分開，去強制勞動，一個星期先準見一次面；大人細路被迫背最後聖殿嘅教義，背唔到要被懲罰；所有書都被人沒收，只準睇宗教書；每一個人都要互相監視......生活喺咁樣嘅社會，你哋點解可以忍受落去？」
守衛想去制止他發言，但被劉居伸手擋住。群眾中有人道：「你知道啲咩呀？神父喺我哋最無助嘅時候出現，拯救咗我哋，劉居就重建咗村入面嘅秩序......」
「阿安，劉居係咪吩咐你混入村民入面，負責最先開口去帶風向？」
那個叫阿安的男子頓時結結巴巴，「你.....你唔好含血噴人呀......」
小剛冷笑一聲，不去管他：「我知你哋希望心靈有所依靠，但劉居所做嘅係要你哋嘅自由去換取一時嘅安穩。今日佢要求你哋同家人分開，一星期只可以見一次，下次就可以連見都唔畀見。今日你違反規條，被罰去強制勞動，下次就可以變成下一個神父嘅食糧。你哋所謂嘅安穩，聽日就可能毀於一旦，只不過係因為你越過咗劉居心入面嘅紅線......」
「收聲啦！你識啲咩呀！」
「我哋失去咗幾多嘢，換取今日嘅安寧，呢點你知道咩？」
小剛不為所動，繼續道：「我點會唔清楚？但事實係，村入面經常有人失蹤，就算你哋唔信係畀神父食咗，你都唔可以否定呢樣事實！」
「失蹤嘅人，你有咩證據證明同劉居有關？」
「為咗秩序，嗰少少犧牲係在所難免架啦！」
「劉居係我哋擁護佢取代村長架，你講到好似佢係奪權咁！」
「神父同劉居係為我哋好先做咁多架咋！」
「我哋生活得好哋哋，點解你係都要搞搞震？」
劉居只是在一旁冷冷看著，不管是守衛或是群眾中，有無數為劉居和神父辯護的聲音，為他的高壓統治塗脂抹粉。守衛一方姑且不提，即使劉居在群眾中安插自己的人去帶風向，但人數會有那麼多嗎？不是為劉居做事的人，他們是真的相信劉居所作的一切是為他們好？相信我們是所謂的惡魔？我已經甚麼也搞不清了。
這時劉居一副勝利者的模樣，對我們說：「我教佢哋，我哋所做嘅一切都係偉大光明正確。」
小剛咬牙道：「唔係每個人都相信你講嘅嘢......」
「咁又點？就算佢哋心入面有懷疑，佢哋都唔會反抗，因為佢哋知道，一反抗，只會連現有嘅嘢都失去埋。甚至有人根本唔相信我講嘅嘢，知道我所做嘅就係徹頭徹尾嘅獨裁，反而同我歌功頌德，只為求可以加入權力派對。人類本來就係自私，軟弱，追求安全，甘於現狀，充滿奴性......如果你執於奪回人嘅自由，佢哋只會反對你，因為佢哋只渴求弱者嘅幸福。你哋輸咗喇，輸在太睇得起佢哋。而家，我就要燒死你哋。」
這時，群眾中傳出一片低聲議論聲，很快再演變成騷動。本來他們或坐或站地在廣場外圍成大圈，只時大圈卻在不斷收窄，他們向廣場中心前進，直至在火堆前才不得不停下，有些人甚至站到高台上。劉居和守衛凝神戒備，人浪中如摩西分紅海般打開了一個大缺口，當晚坐在樹上的那個女孩，在已經包圍我們的喪屍中步出。