[喪屍][人性?][政治?]在喪屍橫行的年代裏，我只想做一個人: 38 先入為主 (四)
「屌你老母死癲狗！」
「仆街死到臨頭都要拉人陪葬！」
「救命呀！救命呀！」
一片狼藉之中也分不清誰在說話，我在木柱上不斷扭動，掙扎，盡最後的努力逃出，但繩結綁的死死的根本動不了。反而杜嵐在不知那裡藏著一塊刀片，割開了自己手上的繩結，然後馬上為我割開繩索。
「你...... 」
「情況危急，有咩一陣先講！」她指著權叔等人的方向，「權叔佢哋交比你，我去另一邊！」
整個高台由木頭組成，底下堆滿了木柴，大概浸了不知易燃物，一點火整個高台便熊熊的燃起，一發不可收拾。權叔身上藏著另一把小刀，我用它割開了其他人的繩結，讓他們先行離去。
高台上愈來愈熱，全身不斷流汗，但汗水又馬上揮發所以粘糊糊的，底下木柴燃起的火舌像毒蛇般扭動，支撐高台的木柱正在燃燒，而高台的地板也已經起火，整個高台眼看不久就會倒塌。
「駱輝......點算呀？」
我一邊迴避地上的坑洞，跑到杜嵐身旁，赫然發現兩根木柱壓在白詠欣身上，那兩根木柱仍在燃燒，在她身體上刻下大片的燒焦的烙印。
「我......頭先呀嵐一幫家姐解開條繩，條木柱就向我呢邊冧落嚟......家姐為咗救我，推開我，幫我擋住，但冇幾耐又有另一條柱冧落嚟...... 」白詩婷哭得梨花帶雨，說話哽咽，身上的衣服好幾處被燻黑。呀禮和權叔身上繩索被解下後，也立即衝到白詠欣身旁。
「呀嵐，駱輝，我數一二三，之後一齊抬起條柱！......一，二，三！」
一發力，原本脆弱的木地板便穿了一個大洞，腳也險些踏了進去。我們沒有放棄，接連換了好幾個位置和姿勢，礙於地板被火烤了一段時間，一在上面發力便會踏出坑洞，這下子我們根本是束手無策。
「算啦，呀禮.....」
「你講咩呀......只要我切開呢兩條木柱，就可以救到你架喇......」呀禮脫去上衣，拍熄木柱上的火，用小刀一直割......
「你再唔走，我哋就會一齊死喺度架喇......咳咳......」
「唔好咁快放棄呀！」呀禮急得快要流下淚來，他使力一吸，控制自己不流淚，「白詩婷得番你一個家姐，你捨得就咁就走咗去，唔理佢咩？我哋一齊經歷咗咁多，一齊面對過咁多困難，你唔可以喺呢到就放棄呀！」
「......我好累呀。我受夠喇......我一直想扮到好堅強，咩都承受得到，係因為喺婷婷面前，我唔好可以咁軟弱......婷婷呢個傻女，由細到大都跟住我，以我為榜樣，如果我呢個家姐都捱唔住，我......我仲點樣保護佢？」
「家姐......」
白詠欣摸摸白詩婷的頭髮，「婷婷......家姐走咗，你識唔識得照顧自己？」
白詩婷點點頭，又隨即搖一搖頭，「我......我唔要你走呀......」
「你要記住......家姐走咗之後，你就得返自己一個，但無論遇到咩事都好，你都要堅強咁面對。家姐已經累喇，唔可以再陪你行落去......」
白詩婷把頭埋在白詠欣的胸口，哽咽道：「唔好死呀......唔好離開我呀......」
「雖然我唔知道之後會點，但係......大家一定會諗到方法脫離困境，呀禮同權叔會好好咁保護你。你一定要堅強咁生存落去呀......」
「......唔可以再拖喇。」杜嵐默默的站了起來，「我哋要即刻走。」
「唔得！就算死我都要同家姐一齊！」
呀禮還在用小刀割木柱，但不論他怎樣使力去割，都只能在木頭上遺下一個淺淺的刀痕。
白詠欣看著滿頭大汗的呀禮，柔聲道：「呀禮，你快啲走啦......」
「我唔想就咁睇住你死呀！」他憤而怒吼，淚水已經不斷在眼眶湧出，「我答應過你，如果有事嘅話，你可以依賴我......但而家我根本咩都做唔到！如果要我睇住自己鐘意嘅女人，就咁死喺自己面前，咁樣我——」
白詠欣輕撫著呀禮的臉頰，低聲道：「......唔緊要架，只要你盡咗力就得。你一直都好努力.......就好似，最初唔係你哋喺超市到救咗我同婷婷，我哋兩姊妹可能唔會生存到呢一日。婷婷病咗嘅時候，我有你喺身邊支持，所以......」她含淚而笑，即使身體早已撐不住，她依然沒有流露一絲痛苦的神情，「......已經夠喇。」
呀禮垂頭飲泣，哭得像個小孩。
「喂，你哋做咩仲唔落嚟呀？」遠方傳來小剛的叫聲。
「呀禮！再唔走你都會一齊死架！」強行拉走白詩婷的杜嵐也這樣叫喊道。
我搭著呀禮的肩膀，「......係時候走喇。」
呀禮拭去淚水，「我會好好照顧白詩婷......你唔洗擔心。」
「......多謝。」
她向呀禮微笑。那是一個很美的笑容。
高台的地板不少部分已經在燃燒著，我和呀禮不顧地板可能穿洞的危險，狂奔到高台邊緣，奮力的跳了下來，雙腳發麻，幾乎站也站不穩。
......大概五至六秒後，整個高台塌了下來，白詠欣的身影就此埋在那堆熊熊燃燒著的木頭之中。殘垣敗瓦前，白詩婷在杜嵐懷中泣不成聲。
剛才的高台上沒有發覺，四周的環境靜了許多。定神一看，只見遍地屍骸，當初在交戰的雙方竟然連一個活口也不剩......劉居殘缺不全的屍體落在屍堆之前。喪屍則在瘋狂地吞食地上屍骸。
呀禮，sam，小剛他們情況良好，只是杜嵐手上那著一份不知何來的文件，放在中央那火堆旁邊，與女孩對峙著，空中彌漫一股緊張的氣氛。
「sam，發生咩事？」
「......頭先班友打生打死，本來有啲人冇死到嘅，不過個𡃁妹派喪屍一下子掃哂場。本來個女仔想殺埋我哋，但呀嵐要脅個女仔，如果佢一郁手就燒咗份嘢。」