[喪屍][人性?][政治?]在喪屍橫行的年代裏，我只想做一個人: 42 密碼 (三)

呀禮發了瘋似的趕過去，抱著已經失去意識的白詩婷的大腿，聲嘶力竭地哭道：「唔好！唔好死！我求吓你！」然後向我們喊叫：「仲企喺到做咩呀！解佢落嚟！同我解佢落嚟呀！」

我們七手八腳地把她放下來。

「喂！醒吓呀！白詩婷！喂！」

「我求你......唔好死，好冇？」

呀禮抱著白詩婷瘦削的身軀，頭愈垂愈低：「我應承過佢架，我話過會好好照顧你，點解你要......」





「咳......」

正當我們以為白詩婷已經回天乏術時，她突然輕輕咳了一聲，慢慢醒了過來。

「白詩婷！」呀禮輕輕叫喚著，「你點解要......你點解要......」

「......有咩意義？」白詩婷凝視著呀禮，「咁樣嘅人生有咩意義？」

「我......我唔知道，但就算係冇意義嘅人生，唔代表要去自殺呀！」





「咁自殺有咩問題？我咁做有錯咩？」白詩婷看一看我們，又盯著呀禮，乾燥破裂的嘴唇正在滲血，「......我已經受夠喇。我唯一嘅親人已經死咗，之後仲要喺到，冇嘢食，冇水飲，喺到等死......你講呀，咁樣落去有咩意義？」

「你仲有我呀。」呀禮低聲說道：「雖然我唔係你親人，但係......根本就唔重要！因為我已經應承過白詠欣要好好照顧你，所以......我絕對唔會畀你死！」

白詩婷虛弱的笑了一下，「......點解我連死都唔可以？」

「婷婷，唔可以咁快放棄希望呀。」杜嵐走到白詩婷旁邊，蹲跪下來，「一定有方法架！只要繼續生存落去，就一定會有轉機！」

「會有......希望？」





「嗯！」杜嵐不住點頭，「會有架！一定會有！所以......」

白詩婷默默望著天花板，「......如果你呃我，我就殺死你。」

杜嵐握著在流淚的白詩婷的手，眼睛含淚的說道：「咁你一定要努力生存落去，起碼生存到殺死我嗰一日......」

呀禮把白詩婷抱上床，又到外頭找了些藥品為她頸上的抓痕包紮。為了防止再有意外，呀禮索性睡在白詩婷的房間內。

一直默默看著我們的sam，在杜嵐經過時，輕輕吐了一句：「......騙子。」

杜嵐陡然停下，想說甚麼，但終究沒說，快步離開了。

「駱輝，你咁樣望住我算係咩意思？想幫你個可愛女朋友辯護？」

「佢唔係我女朋友。」我頓一頓，「我只係好奇，咁神父佢係咪騙子？」





sam緊抓著我衣領，臉脹得通紅：「你！......」

「你心底應該清楚知道，佢哋所做緊嘅嘢，事實上係一樣。」

一樣都是在販賣希望。

「......」sam充滿血絲的眼睛緊盯著我，冷笑一聲，逕自離開了。




第十天。

水已經所剩無幾。所有人都虛弱不堪。天氣熱得像火爐，連一絲風也沒有，即使如此，我幾乎連一滴汗也沒流，因為身體已經沒多餘的水份去調節體溫。與此相對的是，感覺身體就像一整個火山，燥熱不堪，欲欲想要爆發，但無處發洩。全身上下像被火燒般焦躁。所有人失去說話的意欲，只讓靈魂在空虛踏沓的時光中游走。





這晚我睡不著。我走到天台，打算透一透氣時，發現權叔也在這裡，正抽著煙，凝視外面景物。

我默默走到他旁邊的欄杆前，遠眺屋外的景色。萬里無雲，明月高掛，繁星閃爍，要不是被困在此處，心煩意亂，我想這是一片值得駐足細看的景色。喪屍依舊填滿了大街小巷，甚至連圍牆外也有不少。如果你每日上到這裡，期待奇蹟出現，喪屍自己撤去的話，你只會一次又一次地失望。

「細路，訓唔著呀？」

「嗯。全日無所事事，日頭都已經訓夠喇。」

權叔淡淡一笑：「我都係。」

我們沉默了好一會，我問道：「你有冇諗過自殺？」

「......每日都係煎熬，有咩可能冇諗過？只不過，經歷咗咁多事，努力生存到而家，我唔想就咁放棄。」





「你覺得，我哋仲有希望？」

「唔係希望。」他轉身，「只不過係唔甘心啫。」說罷，他搖搖晃晃地回去了。我在天台站了一會後，也轉身回去了。

「嗚......嗚......」在三樓走廊走過時，我聽見某扇門後傳出飲泣的聲音。我走到那扇門旁。門是虛掩的，我記得杜嵐就是睡在這個房間。

「我受夠喇......」

「點解要咁樣對我？.....」

「好想死......」

不行了吧。

杜嵐在房間低聲啜泣。這時入去固然不合適，但就此離去我又擔心她會做傻事，所以我選擇靜靜地守在門旁。





當房內的哭聲已經停止，我以為她已經睡了，打算回去時，門突然被打開：「......駱輝？」

「呃，我，我只係啱啱喺天台落返嚟......」

月光經由走廊上的窗戶照射而入，她雙眼哭腫了，眼角還掛著一顆晶瑩的淚珠。她擦一擦眼睛，聲音有點沙啞的說道：「你......你聽到哂？」
「嗯。」

「......我就係咁樣嘅人。」她低著頭，「我以為自己可以堅持落去，但係......」

「呀穎佢話我從來都有放棄過希望......你知唔知點解？」她抬起頭，臉上是一個悲傷的笑容，「因為我唔咁做嘅話，我就一定會去自殺......」

「呀嵐......」

她轉而看著窗外，一顆淚珠劃過她蒼白瘦削的臉頰，滑入初秋仍帶暑氣的孤獨夜晚。她臉上泛起一個淺淺的笑意：「......到頭來，我都只不過係個軟弱無能嘅人。」

我輕輕摟著她，杜嵐吃驚似的抬頭看了我一眼，又慢慢垂下頭來，把頭靠到我胸前。

「你唔係軟弱無能嘅人。當初如果唔係你嘅話，我已經死咗喺葉劍南手上，當我仲喺隧道嗰陣，係你力排眾議，要返去搵我......仲有，喺村中廣場，唔係你出現，我哋早就被劉居燒死咗。所以......」

「但係我......」她聲音在我懷中糊成一團：「我應承過婷婷，只要生存落去，就一定會有轉機，而我都開始懷疑，呢一切係咪真係仲有希望......」
我低聲說道：「......當我仲喺隧道嘅時候，我以為你哋全部人都已經死咗。當時我想走出去，但發現所有出口都已經畀喪屍封死，嗰陣係我最絕望嘅時刻。我一路行嘅時候，我見到有個士兵強姦緊個女人。你知唔知我跟住點做？」

杜嵐不答，我繼續道：「我呀，開槍殺死個士兵。嗰個女人怪責我，因為佢話只要佢畀個士兵搞，個士兵就會帶埋佢走。我覺得個女人好煩，所以就殺埋佢，仲強姦埋佢條屍。」

杜嵐吃驚想推開我，我卻把她摟得更緊了：「你聽我講......我知道我自己有幾不堪。呢個已經崩潰嘅世界，荒謬嘅世界......就算係咁，呢一切，因為有你喺呢個世界，呢一切先變得有意義。你係我見過最勇敢嘅人，因為......即使世界一次又一次咁沉默，一次又一次咁擊潰我哋，你仍然有勇氣去微笑，去反抗呢個荒謬嘅世界......呢個或者就係我鍾意你嘅原因。」

我鬆開了杜嵐，她垂頭不語，大概是我嚇壞了她，令她不知如何反應。我搔搔頭：「哈，好似講咗啲好奇怪嘅說話，哈哈哈。對唔住，講埋啲無聊嘢阻到你休息。」我放放下了手，看著仍然沉默不語的她：「......早抖喇。」

「......嗯。」

搞垮了。

但我只不過是對自己和對她誠實而已。



第十一日的早晨，天氣依舊那麼悶熱。我被一道噪音弄醒。

「權叔，閂咗個收音機佢......」這一句說話卡在喉嚨，出來的只是一團不知所云的呻吟。

我睜開眼皮，映入眼簾的卻是杜嵐的臉龐。

噪音正是由她手上的手提電腦發出的。


「......ok。呃......呢到有唔少人都係加入咗冇幾耐，或者對嗰種病毒唔太了解，我花少少時間同你哋解釋清楚先......一般而言，一般嘅病毒由外層嘅蛋白質包住，裡面裝住DNA...... 呃，其實講係病毒唔係好正確，你可以將佢哋視為一種生物電腦，一嚟呢種病毒係人工合成，二嚟佢有一般病毒冇能力......內裡嘅DNA序列經過設計，除咗可以好似一般病毒咁樣入侵細胞，自行複製之外，更重要嘅係佢可以進行運算......利用形成DNA分子嘅四種purine同pyrimidine配對嘅統一性，即係adenine只能同thymine配對，而cytosine只會同guanine配對，形成類似組成電腦運算最基本嘅boolean algebra入面0同1嘅概念，即係代表一bit啦，然後三個配對好嘅nucleotide形成一個6 bits嘅genetic code——」

「但係點解呢種生物電腦，會令人出現我哋所見到嘅各種唔尋常嘅病徵？」

「咁就要由呢種病毒嘅感染機制講起。事實上，喪屍病毒本身設計成一種噬菌體，我哋姑且叫佢做Z啦。最初呢種病毒被傳播嘅時候，佢係以改造過嘅百日咳桿菌為宿主，當人感染到嘅時候，首先會呈現一般百日咳的徵狀，但呢個情況唔會持續好耐，因為噬菌體繁殖嘅時候會持續咁破壞百日咳桿菌......同時，呢種噬菌體會進入病人嘅脊髓，再進入腦部，由呢到開始，事情變得有趣。」

「噬菌體Z進入腦之後，會開始攻擊大腦細胞並自我繁殖，就好似一般噬菌體嘅傳播機制一樣：Z喺腦細胞上面登陸，然後將自己嘅遺傳物體注入細胞，遺傳物質會喺細胞中自己複製，並且製造新嘅蛋白質，去形成新嘅噬菌體外殼——先係頭部，尾部，再如此類推。問題就係，形成頭部嘅其中一種蛋白質，係錯誤折疊嘅朊蛋白，scrapie prion protein，PrP-Sc。你應該記得，正常朊蛋白，cellular prion protein，PrP-C，嘅三級結構中應該係以alpha helix為主，而致病嘅朊蛋白以beta sheet為主。本來呢種情況唔會引起大礙，因為你知道，PrP-Sc只可喺腦細胞表層開始感染，因為兩者嘅primary structure係一樣，問題出喺喺腦細胞外，負責注入遺傳因子嘅嗰個Z噬菌體。當呢個喺外面嘅Z噬菌體嘅頭部接觸到腦細胞表面，就會導致腦細胞表面嘅朊蛋白重新折疊：由alpha helix轉為beta sheet，呢個過程係會不斷自我複製。」

「最後大量腦細胞會死亡，而當初喺腦細胞中自我複製嘅Z噬菌體嘅遺傳因子會流入大腦皮質。我上面已經提到，佢本身可以想像為生物電腦......佢可以阻礙大腦皮質神經突觸之間嘅電流，更有趣嘅係佢可以釋放電流嚟強化某啲神經突觸，強化人體感管好似嗅覺咁。另外，我哋發現噬菌體Z可以吸附喺口腔中某幾種細菌上面，導致被患者咬嘅話，都會被傳染。」

當然，佢點解可以做到上述嘅嘢，詳細情況就要靠大家繼續努力。」

「......我知道大家有好多問題要問，我哋自己都有好多問題諗唔明，上面嘅講法只不過係目前最可靠嘅假設啫。最後一樣，亦都最令人驚訝嘅發現......呢種病毒可以令到成個人腦成為一部電腦。正如頭先咁講呢種病毒可以控制大腦皮層嘅資訊傳遞，即係話，可以控制人腦嘅活動，令到人腦成為一種類似電腦嘅物體，以致記憶，知識，都可以用特定嘅方法讀取。正如你哋所見，我帶咗一個患者嘅腦過嚟。」

「各位都睇到患者大腦變成海綿狀，呢個就係佢被朊蛋白感染嘅證明之一。而家，只要連上電線......呢到就係呢個患者一生嘅記憶總量，大概係10^13 bits。佢見到嘅，摸到嘅，諗到嘅，佢記得嘅同唔記得嘅，一切已經放在嘅呢個folder，情況就好似你用usb咁，不過呢個人腦usb嘅儲存量比任何一隻usb都要大。佢嘅記憶已經根據唔同年份排好，有興趣睇下？」

「冇人想睇？咁呀......哎呀，先講到興起，唔記得咗講。好耐之前已經發現有部分感染體，即使受到感染都冇喪失智力，仲可以控制部分感染者。雖然唔知點解會咁，但我哋已經知道當中運作嘅原理：呢種病毒可以令患者嘅腦電波大大增強，甚至媲美無線電波嘅強度，當附近嘅感染者嘅大腦中嘅病毒接受到信息就會根據指示行動......至於點樣產生呢種無線電波，頻率，可以傳遞嘅距離以致點解有啲患者會唔受病毒嘅影響，我哋暫時未有頭緒。」

此時終於有一道並非上面屬於講者的聲音問道：「呃，我有個問題......受咗感染嘅人有冇辦法可以回復原狀？」

「暫時冇方法。」

「咁呀......」

「好，情況就係咁，你哋有咩嘅就——」

完全靜默。我甚至搞不清楚錄音是何時完結的，因為剛剛的錄音的資訊量實在太多，直到我漸漸搞清楚發生何事，才發現錄音已經結束。
「呀嵐......段錄音已經完咗喇？」我對自己的聲音如此沙啞而震驚。

「嗯。」

「你係點樣......」

「......我之前喺電腦入面發現另一份好似呢份咁，只有亂碼字母嘅文件。將兩份文件上面嘅字母換成數字，再將得出嘅數字加廿六......得出嘅數字根據對應嘅位置減返一開始得到嘅文件，上面嘅字母轉換為數字的數目。最後將得出嘅數目做fourier transformation，就可以得到頭先嗰段錄音。」她頓一頓，「另外我仲喺電腦到發現另一個同病毒有關嘅文件，好似係講緊點解會有呢種病毒，但我睇唔明......」

接著她打開了另一文件，上面抬頭寫著「中共中央办公厅」，署名人的名字已經用黑色油墨筆劃去，文件編號是2017年103號。左上角寫有「机密」字樣。

「
生物天网系统是我国集生物工程，电脑科学与电子工程的一项伟大成就，可以利用此技术实行全面，统一，有效的维持稳定的工作。此项技术已经进入测试的阶段，而阶段将分为三部分：

一：在新疆教育转化培训中心逐步推行，辅助学员有关爱国爱党方面的情操，去除思维中的极端主义倾向，加强教育学员有关新中国国情历史的知识，建立良好守规的品格，协助学员认真学习，贯彻习近平新时代中国特色社会主义思想精神。

二：将于全国各大城市进行试点测验。可选择的城市包括：上海，石家庄，西安，乌鲁木齐，拉萨，南京，深圳，重庆，天津等地。各级市委官员需尽全力配合政策实施。

三：在全国推行，深化并加大力度进行全国安全措施的改革，认真实行全国维持稳定的主要方针。文件似乎還有下一頁，但想去看時電腦畫面突然一片漆黑。

「......冇電？」我嘗試重新打開電腦，但毫無反應。

「駱輝，嗰篇嘢到底係講緊咩？」

「我都唔係好明......一份中共嘅機密文件，講緊咩生物天網系統，都唔知係咩來頭。」

「即係話，始終冇關於病毒疫苗嘅訊息啦。」