[喪屍][人性?][政治?]在喪屍橫行的年代裏，我只想做一個人: 45 然而，然而......
她當時這樣說是甚麼意思？
……她說，她喜歡我。
那句悄悄話，就似有一把大錘猛擊我的心臟，我根本反應不來，接下來的時間，腦海一直縈繞著她那一句說話，耳邊像是一直感覺到，當時邊在我耳邊說話時，風吹著，癢癢的感覺……
「……」
時近黃昏，微風吹拂，夕陽西斜，昏黃的陽光把屋內各人的身影映在牆上，又細又長，如鬼似魅。
現場鴉雀無聲。杜嵐宛如石膏像，持牌的手懸空，一動不動。
我突然在想：神存在嗎？
祂創造了人，這獨一無二的生物，智慧冠絕所有物種。
但是，祂把我們置於人畜之間，以性命相脅，要我們選擇一邊，樂於觀看我們為此掙扎的樣子。
如果沒有上帝，那麼事情就簡單了——如果沒有上帝，那麼一切也是被容許的。
包括我們現在所做的事。
「你選擇係？」Sam向杜嵐不知所云的問道。
「……」
杜嵐低頭不語，可能是不知他問題的意思，或是知道但不想回答。
「我係話…… 」sam輕咳兩聲清清嗓子，但聲音依然沙啞：「你……想自己嚟，定係我哋郁手？」
我明白他的意思了：他問杜嵐想自殺或是被殺。
原來如此。
「……」杜嵐依舊沉默不語。
我的思緒一片混亂。
「講句嘢啦仆街！大聲反對啦！你唔撚係想睇住佢死下話？」我內心如此吶喊著，但雙腿如同被釘在地板上，想跟我鬥氣似的不能挪動半分。
我知道！我知道她對我有多重要！我喜歡她呀！
但這樣一來投票的意義在那？公平選出犧牲者，被選中的就要死，誰也不能有怨言，怪就怪自己的運氣……可以選擇自殺或是被殺，但對不想死的人而言，這種選擇毫無意義。
啊，對，這是原本說好的。我因為自己不喜歡就推翻它，這合理嗎？更重要的是，我推翻了它，那麼還要繼續抽籤嗎？那麼杜嵐參與抽籤的理由何在？如果被抽中的是別人，我會考慮這麼多嗎？大概已經在饑腸轆轆的等吃吧。
「喂，呀嵐，你到底想……」
「……你唔好迫佢呀。」權叔沉聲斥責。
Sam不理，繼續道：「如果你繼續唔出聲，咁我唯有……」
「sam呀，不如你……不如你比少少時間佢諗下先啦。」
「我屌！」他失聲怒吼道：「你哋咁算點呀？哦，即係我做哂衰人，你哋做哂好人咁喇喎！屌你老母！提出話要咁做嘅又係我，說服你哋又係我，連實行嘅都係我！食屎啦仆街！我就做比人屌比人鬧嘅角色，你哋就扮撚哂嘢做好人！真係要做好人嘅，一開始唔撚好抽籤自己餓死啦仆街！」
「係你勸我抽籤我先抽咋喎……」
「咁我叫你去死你又會唔會去死呀？我有用把槍隊鳩住你個頭要你抽籤咩？」
呀禮低聲道：「sam冷靜少少好無——」
「我激動？」他一呆，然後乾笑幾聲，愈笑愈響，「哈，我激動？我好激動咩？我要咩反應先啱？係咪要笑騎騎咁『咁呀，你唔想死呀，咁我哋再抽過籤啦』咁樣呀？！」
「你都強詞奪理……」權叔咬牙道，「呀嵐佢又冇話，佢唔肯……我哋只不過係想你比啲佢啫，畢竟而家係要佢犧牲……喺人生最後嘅時光，你咪放過佢唔好迫得佢咁緊囉，比著係你抽中你都唔會咁快下到決定啦。」
「我都求下你哋放過我啦。」sam甩手冷笑道，「咩衰嘢都係由我嚟做，你哋就喺度屌鳩我扮好人……如果唔係我做壞人，話要食人嚟解決當前困境，你哋而家仲戇撚鳩鳩。等死咋！喂，大佬，你估我真係好想咁做呀，我真係好想食人，好想殺人？我係唔撚想坐喺度餓死咋！」
呀禮嘗試安撫sam：「呢樣嘢我明，我相信大家都明，否則都唔會坐喺度啦……我同權叔只係想你比少少時間呀嵐決定啫。」
「你話比時間佢，咁你睇下佢有聲氣未？」
杜嵐仍然垂頭不語，甚至連坐姿也沒改變，只是持牌的手已經放下。
「性命攸關，佢要多啲時間諗下都好正常啫……」
「仲需要諗咩？佢要犧牲已經係必然嘅事，而家都不過係考慮到底要自殺定由其他人落手……根本唔需要諗咁耐呀。」
「靚仔，你都係心平氣和咁等下啦，唔會阻你好多時間啫。」
「……等！咁萬一佢話佢又唔想死又盛咁，我哋唔通又抽過籤呀？」
「屌，佢都冇咁講……」
「係呀！咁如果佢又一直唔出聲咁我哋又點算呀吓？」
「總之，你等下先啦……」
Sam和權叔你一言我一語的針鋒相對，呀禮在適當的時機說一兩句附和權叔。兩人愈說愈激動，依然僵持不下。
白詩婷仍然瑟縮一角，眼前的鬧劇彷彿與她毫無關係。我則默默注視著杜嵐——由最初目光掃到她身上，我雙眼就再沒有離開過。感覺就似，如果我一移開視線，她就會在世上徹底消失。
沒錯，就這樣沉默下去吧，這樣就對了。
「哦，咁我明喇，如果係我抽中嘅話，你哋就唔會咁樣維護我啦！因為我冇咩功績丫嘛！」
「唔好無理取鬧好冇？問題根本唔喺呢度……」
「唔喺呢度？咁你話……」
「大家，我……我決定好喇……」
杜嵐終於打破沉默。儘管她說話的聲音極輕，卻令原本鬧得臉紅耳赤的兩人陡然閉口。
權叔低聲問：「你話……」
「……我會自殺。」
「對唔住。」呀禮閉目，嘆了口氣。
杜嵐緩緩踱步到中央，撿起軍刀——抽籤開始前，商議好誰抽中，誰就用那把刀自殺或者被殺。
「冇啲更加大把嘅刀咩？」她把玩著軍刀，有點開玩笑似的問道。
為甚麼你還可以笑的出來？
刀鋒抵著項頸，她深呼吸一下，用力一拉——
「咦……？」
「……其他人都算，但唯獨你，我唔可以眼白白咁睇住你死。」
在她舉刀的時候，身體像突然解開束縛，我想也沒想就衝前緊握著她持刀的手。
原本我還在猶豫應否阻止這一切，但到她真的要舉刀自殺時，我身體宛若脫韁野馬，在我思考之前已經行動。
「但係，我抽中咗…..」
「係，但我唔在乎。」
其實這把軍刀是呀禮最初交給我作旁身之用。用作給犧牲者自殺或者被殺的武器，是因為這把刀雖然是旁身之物，但我從未用過，換言之，被害人不會因為傷口接觸喪屍的體液而受感染。
受感染就不能吃了，對吧？
「駱輝，你咁做係咩意思？」
面對sam冷冷的提問，我心想既然事已至此，和他翻面已經板上釘釘的事，所以也懶得解釋，索性冷言道：「我就係唔想佢死。」
「屌你老母……」大概明白和我爭辯無濟於事，他轉向權叔和呀禮，「喂，咁即係點呀？傾咗咁耐，而家佢話唔鐘意一下子推翻哂喎！咁算點呀！你兩個出句聲啦！」
「情理上駱輝係有唔啱，但係……」
「但係咩呀？」sam搖著權叔的肩膀，但權叔只是說了一半就沒有說下去。見權叔不答，他轉向呀禮。
「我都冇辦法呀……」呀禮不置可否的擺手搖頭。
「……白詩婷？」他幾乎是以絕望的聲線問她，但換來只有白詩婷輕輕的搖頭。
如同宣告自己的勝利，我淡然道：「睇嚟冇人支持你呀。」
杜嵐輕聲道：「駱輝，你自己都好清楚呀，如果冇人犧牲嘅話，大家最後都要死。」
「呢點我好清楚。」我鬆開手，接過她手上的軍刀，「但係……我唔希望你係被犧牲嗰個。」
「你……」她不解的搖一搖頭，向我嫣然一笑：「真係任性。」
「屌你老母打情罵俏夠未呀？」sam搔搔頭，「好，好呀……最後冇人死，好呀，皆大歡喜呀。」他頓一頓，又吼道：「咁即係點呀！你哋答我呀！你哋想點呀？」
「再諗下其他方法啦。」呀禮答道。
「……唔咁做都冇辦法啦。」sam嘆了口氣，轉向杜嵐，「呀嵐，我有嘢同你講。」
我斜眼睥睨著他，心想有甚麼就在這裡說。像是看透我在想甚麼，他沒好氣道：「屌，望住我做咩呀，你估我會食咗佢咩。」
杜嵐輕聲道：「放心啦……只不過係傾兩句，唔會有事嘅。」
杜嵐和sam並肩走到窗前，兩人背對著我們，也聽不見他們在說甚麼，只見sam不斷向杜嵐說著甚麼，但杜嵐只是搖頭回話。雖然不知道說話內容，但相信沒甚麼問題。
我察看著手上的軍刀：雖然刀身不長，但拿上手能清楚感受它的重量。刀柄黝黑，刀鋒異常鋒利，晃動時還隱隱透著藍光，寒氣懾人。雖然這把軍刀是佳品，但實在是太短，用它，和喪屍對抗很危險，因此我一次也沒用過。
說起來，隱約記得在呀禮家時他拿出的是兩把軍刀，一把在我手上，另一把大概在呀禮手上吧？
……唉，接下來要如何收場？的確，食人似乎是唯一方法，但我卻一時衝動救了杜嵐。必須要想其他方法，那方法亦不可有犧牲者，否則又發生像現在的情況時就糟糕了。
但真的有其他方法嗎？
「喂！！！」
權叔？他在叫甚麼？
「sam你做乜撚嘢呀！！！」
呀禮？sam？
權叔和呀禮在我身旁直奔而出，我回頭一看——
Sam割開了杜嵐的項頸，鮮血噴射而出。
為甚麼？
「碰！」
雙腳在這緊急關頭突然使不上力，我一往前邁步，便腿一軟，整個人倒下。
鮮血如噴泉一樣，我從未見過這種情境。血泉噴灑在牆上，地板上，形成宛若雨點的圖形。
臉上溫溫的……啊，對，我爬到已經倒地的她面前。我按緊她頸上的傷口，鮮血噴灑而出的壓力把我瘦弱無力的手指推開，鮮紅的血液穿過我指間不斷滲出。
「呀……嵐……」
喉嚨極度乾燥。
杜嵐雙目半開半閉，氣弱游絲。
「呀嵐……你……」
醒一下吧，說些甚麼呀…….
「呀嵐，唔好死……我求下你……」
開口的時候，臉上的鮮血流到乾裂的嘴唇上。
「……輝……」
「駱輝……」
「係！我喺度！我喺度呀！」
「我……我見……見唔到你……」
「我喺度呀！我喺你身邊呀……我唔會走……我唔會走…..」
「駱輝……對唔住呀……」
「你講咩呀！我…….我要同你止血，你……流咗好多血呀…….」
「唔好走……」
「我應承咗你……要生存落去……對唔住呀。」
「……」
「喂，呀嵐……」
「喂，講句嘢呀……」
「醒下呀……」
「求下你，醒下呀…….」
開玩笑而已…….她會醒來的……..
她會……她會的……
可不是嗎？
因為她絕少跟我開甚麼玩笑，所以我才會被她騙倒而已…….一定是這樣……
「......要同佢止血呀。」我站了起來，但不知為何，腳軟倒下。我費力地重新站起，走到一旁的急救箱中，摸出一卷繃帶。
我用繃帶把她頸上的傷口包好，但血液瞬間便把繃帶浸透。我抬頭想找權叔和呀禮幫忙，見他們兩人把sam制服在地，我便道：「喂，唔好理佢住啦，幫我手......唔知點解，點樣包都止唔到血呀。」
「駱輝……」呀禮走到我面前，「呀嵐佢……佢已經......」
「佢訓著咗……但佢會醒……只要我哋救返佢嘅話......」
「駱輝……睇開啲啦……呀嵐佢已經死咗喇……」
「你講乜撚嘢呀！佢冇死！佢冇死呀！」
我使勁的搖著呀禮，他只是把頭別到一旁，沉默不語。
「……」
我站了起來：「……sam呢？」
「權叔……權叔打到佢半死，制服咗佢……」
「咁呀……」
「你……你拎住把刀做咩呀？你唔係想殺sam下話？」
「你喺度講咩呀…….我點會咁做？」
「駱輝......」
「哈，哈哈哈！」不知怎的，我失控狂笑：「佢都話唔會搞呀嵐呀！你睇佢做咗啲咩！」
被權叔按在地上的他，趁權叔不為意時站了起來。我持刀想衝向sam的時候，權叔制止了我，喊道：「呀禮，你去禁住sam！」
「你點解要阻住我呀！」
「……駱輝，我明白你心情，但係……」
「權叔，讓開！讓開呀！」
「你殺咗佢，呀嵐都唔會復活呀！」
「……讓開呀！」
眼前的老人，低頭思索一會，終於放棄維護sam，默默走開。
我搜索著sam的蹤影時，發現他爬上在陽台的石欄，呀禮站在他面前，想勸阻他，但又不知如何開口。
當我步向陽台時，sam喝道：「企喺度！」
我沒有理會，冷冷道：「你有種就跳落去。」
sam淡淡一笑。
「我終於發現，原來上帝真係存在。」
他看著我，平靜的表情沒有一絲漣漪。
「......而上帝咁殘忍，係佢因為愛人類。」
說罷，他縱身一躍，我們趕去，往下一看，只見他落到喪屍堆上，不消一會便被喪屍群分屍而食。
但他由此至終也是微笑著。
「呀嵐……個壞人死咗喇……你肯起身未？」
杜嵐的表情是那麼安靜，我怎麼能相信她真的死了？
我靜靜凝視著她的睡相。
那頭曲髮依然是那麼蓬鬆，輕柔……眼睛輕輕合上，嘴巴半閉，柔風吹過，眼睫毛輕輕晃動，好像那充滿稚氣的臉龐上，她雙眸會突然打開，靈動的雙眼狡黠的打轉，她衝著我甜甜一笑，宛若惡作劇成功一樣，開懷笑道：「登登！我冇事呀！……係咪嚇咗一跳呢！」
但我所渴求的情景沒有出現。
我輕輕抱起她上身，整理著因血液凝結而黏在她臉上的頭髮，一邊在等，一直在等。
依然沒有，她沒有醒來。
我握著她的纖弱的雙手，像是要把自己雙手的體溫傳遞過去。
但她雙手和身體漸漸變冷，身軀開始變得僵硬。
我還在等。
——在商場初次見面的時候，一名少女被另一個藍衣男子拖著飛奔，來到我面前時，她不慎滑倒。
「我......我扭親呀......」少女怯怯的說，一邊摸著裸露腳踝，嘗試重新站起。
我向她伸手道：「嚟啦，我揹你。」
「我叫杜嵐......」少女低聲在我耳邊道，「你叫咩名呀？」
「......駱輝。」
——在呀禮家，月光傾瀉的露台前，杜嵐安慰著剛剛偷竊物資回來的我。說著說著，她竟然自己哭了起來，我笑道：「好喇好喇，唔好喊啦。」
「對唔住呀，想要安慰你，但自己反而喊起上嚟.....」她擦擦眼睛，勉強的笑了起來，「總之！駱輝你要打起精神呀！」
「......嗯。」
——身在葉劍南陣營時，她是唯一還相信我的人。
「我相信你！我相信......你並唔係為咗自己而咁做！」
我追出去，不顧在冷笑的葉劍南，跑到身處牢房的她面前：「你憑咩信我？」
「......因為我覺得你唔係咁嘅人。」
——被異變的葉劍南抓住項頸時，我艱難地吐出一句：「我相信你......就好似......你一直相信我一樣！」
......不知過了多久，我緩緩醒來，馬上感受到頸上的疼痛，而第一眼映入眼簾的是杜嵐眼淚鼻水一把流的樣子
「駱輝！」一見我悠悠醒轉，她立即緊緊的摟著我......
——石屋後方的草地上，清晨的山嵐如同薄紗般輕蓋著刺眼的陽光，太陽在霧的後方形成一團柔和的光球，和煦的陽光穿透薄紗照耀著我們。
「呀嵐，你要連埋呀穎嗰份，堅強咁生存落去。」
「嗯。」
她含淚的眼睛看著我，輕輕握著我的手，微笑點一點頭。
——村中廣場，杜嵐她們失手被縛。
我問：「......點解仲要返嚟？」
「為咗救你呀。」
「救我？你知道，咁樣只係大家一齊死......你應承過我要好好生存落去，咁快就唔記得咗？」
「我記得呀。」她向我嫣然一笑，轉而望向天空，「......但如果人只係為咗生存而活喺世上，咁嘅人生又有咩意義？」
——最後，她輕輕握著我的手，湊到我耳邊極輕，極輕的說了一句：
「……因為我都鐘意駱輝你呀。」
過去發生的種種，像菲林般一幀一幀在我腦海播放著。
她依然在睡。
回想著過去的事，我漸漸明白，她不肯醒來的原因。
「因為之前發生太多令人傷心嘅事，所以你先一直唔肯醒……係咪？」
真狡猾……但要是這樣的話，你就好好的睡吧。
睡吧，你不用再面對這些傷心事了——
因為現實，太過殘酷。
「駱輝，你……」
我舉起食指，湊到唇邊。
「……呀嵐佢已經好累，比佢好好咁休息啦。」
......睡吧。