[喪屍][人性?][政治?]在喪屍橫行的年代裏，我只想做一個人: 66 因為我必須保護你 下
約一小時前，駱輝剛進入病房後，呀禮和權叔之間彌漫一陣尷尬的沉默。權叔率先道：「......你今日有冇見過白詩婷？」
呀禮搖頭：「佢哋唔畀我見佢。」
昨日和白詩婷重遇後，呀禮把她送回紅磡站後，便趕回前線。隧道中的敵軍發現寡不敵眾，便向叛軍投降。雖然士兵和親屬的接觸被嚴格管制，然而呀禮回到槍會山軍營後，仍多次要求去見白詩婷，當然被拒絕。
「......」權叔沉默了一會，考慮該如何承接他想說的話題。雙方圍繞著這個議題曾爭執過好幾次，誰也不能說服誰。然而經過昨天一役，權叔認為呀禮或許有新的看法，於是他攪盡腦汁，想找出可以說服呀禮，而不是被認為是挑釁的說法。然而他想了好一段時間，仍然未想到該如何開口，倒是呀禮看穿了他的心思，冷冷說道：「你係咪又要講逃走去黑沙圍嘅事？」
權叔一怔，說道：「冇錯。戰爭已經漫延到呢到喇，你尋日都見到，班友唔係人咁品，見人就殺，手無寸鐵嘅老弱婦孺都照殺......白詩婷尋晚只不過係好彩咋，唔係我哋咁啱嚟到，佢一早畀人射死喇。」
呀禮神色冷峻，回道：「咁唔通黑沙圍就會比呢到更安全？嗰條畀喪屍統治嘅村莊？」
「就算係被喪屍統治，咁又點呢？起碼喺嗰到，冇人會迫你上戰場，亦冇人會迫你同家人分開！」
「你只不過係聽駱輝嘅片面之辭咋！你可以肯定嗰條村真係安全咩？」
權叔愣住，喃喃道：「駱輝唔會無啦啦呃我哋掛......」
「佢只係將佢見到嘅嘢講出嚟，唔代表佢見到嘅就係事實嘅全部呀！咩『拯救人類等同於拯救喪屍』，呢啲咁荒謬嘅嘢都講得出！駱輝自己都話，佢只不過喺條村到留咗一陣，亦都冇同過啲村民講過嘢，根本連實情係點唔知！」
權叔點點頭：「冇錯，去嗰到會發生咩事，冇人會知，但唔通你認為留喺到就係好？呢到班人當我哋係炮灰咋！去黑沙圍只不過係其中一條路，重點係——」權叔快速的看了四周一眼，壓低聲線：「重點係離開呢個鬼地方！」
「如果你想走，可以自己走呀。」
「你......」權叔一時語塞，呀禮得勢不饒人，又繼續道：「而家外面已經少咗好多喪屍，除咗室內，絕大部分地方都已經冇喪屍出沒......你係我哋咁多個之中身體最強壯，你絕對有能力自己一個生活——又或者可以返去黑沙圍。你點解唔自己去呢？」
「你條仆街！」權叔霍地站起，無視周圍的目光，揪著呀禮的衣領，喝道：「到底呢到有咩值得你留戀呀！你個腦係咪有問題呀！」
「......你確定呢到適合講呢個話題？」
權叔怒極而笑，拉著呀禮走到醫院外的馬路前，「我自己去當然冇問題，但我唔明白！我唔明白點解，明明你係畀軍方利用，你都唔肯走呀！」
「利用？你好似搞錯一件事......」呀禮甩掉權叔的手，惡狠狠的盯著他：「我哋只不過係互相利用。軍方推我哋上戰場，與此同時，幫佢殺人嘅話，起碼可以食得飽——仲可以養活白詩婷！出到外面，你可以過到咁嘅生活咩？」
權叔看著對方，感覺十分陌生。
「唔通......你甘心......你甘心幫佢哋殺人？打呢場毫無意義嘅戰爭？」
呀禮握緊拳頭，咧嘴而笑，似乎認為權叔所說的極為可笑：「有咩甘心唔甘心？只不過係一種生存方式。」
權叔猛然的搖一搖頭：「咁樣根本......你可能會死呀！而家我哋未死，只不過係好彩咋！如果......如果你死咗，咁邊個照顧白詩婷呀？仲有，對面已經打到嚟呢到，白詩婷仲差啲死呀！」
「我唔會咁輕易就死。呢場戰爭打咗咁耐，而一直都走喺最前面，我到而家都未死！況且，唔通我哋走出去就唔會死咩？喪屍，缺水缺糧......日日擔驚受怕，呢種生活我受夠喇！白詩婷雖然差啲出事，但唔通外面就會比呢到安全？起碼呢到會有人保護佢！只要我......只要我去上戰場，佢就可以喺到生活！」
權叔冷冷道：「所以你甘願去殺人？」
「佢哋罪有應得架！」呀禮吼道：「呢一切都係佢哋搞出嚟架！唔單止製造病毒，仲要屠殺平民！仲有，白詠欣交託白詩婷畀我，我就有負責畀詩婷最好嘅生活！只要佢得到保護同溫飽，要我上戰場我都冇所謂！」
「死喺我哋槍下嘅，同我哋一樣，都係強徵返嚟嘅平民呀！」
「放屁，你要咁計就根本沒完沒了！」呀禮別過頭去：「呢場戰爭要結束，就只有打到另一方完全被殲滅為止，只要我哋仲喺香港，就必定會被波及......你話走，到底可以走去邊？每條街都有士兵看守，而呢一區所有嘅高樓大廈都已經被佢哋掃蕩哂，根本冇哂資源......駱輝只不過係好彩走得甩，但佢返到嚟之後，都係畀人困住，如果唔係咁啱開戰，佢可能已經死咗喇！如果我哋逃走畀人發現，下場可能一樣，甚至當場處決！如果留喺呢到......冇錯，我哋的確係畀人當成炮灰，但只要生存到落嚟，佢哋起碼會畀飽飯我哋食。我知道呢場戰爭係無意義，但咁又點呢？你只有接受佢係無意義！」
權叔咬牙切齒，根本不知要如何說服他，喃喃說道：「我已經厭倦呢種生活......每日上戰場殺人，咁樣根本毫無意義......」
呀禮輕笑一聲：「你唔好再扮嘢喇，你只不過係偽善。」
權叔雙眼一瞪，呀禮冷冷一笑，繼續說道：「你有冇計過你一直殺過幾多人？兩隻手都數唔哂，係咪？如果你真係有所謂嘅罪惡感，你點解生存到而家？如果我係你，我應該一早就自殺。你冇咁做，係因為你呃你自己，『一切都只不過係為生存，包括殺人』。你唔想承認呢點，你唔想承認自己竟然暗地裡接受呢種想法，於是你不斷遊說我逃走——你真係想走？你想我覺得，你因為唔想殺人，接受唔到以咁嘅手段換取溫飽，所以先不斷叫我走。如果你真係想走，你自己一早就——」
權叔怒髮衝冠，猛然衝向呀禮，抓著他的衣領：「你講夠未呀！」
「因為畀我講中，所以老羞成怒？你太易畀人睇穿喇，就連我呢個識你唔到一年嘅都睇得穿你。你就咁著緊你嗰個『正義感』嘅形象？」
權叔咬牙切齒看著對方，感覺如果打下去的話就真的代表對方說中了——不行，要想想如何反擊——
「咁你呢？」權叔忽然神經質的笑了起來：「你明知道場杖係無意思，明知道白詩婷留喺度都唔會安全，你點解仲執意留喺到？」
呀禮嘲笑似的搖搖頭：「唔好學我，你學唔嚟架......」
「你口口聲聲話為咗白詩婷，事實上你只不過係為咗你自己。無論係白詠欣畀人強姦，定係佢被燒死，你根本就咩都做唔到！你只可以眼白白咁睇住佢畀人傷害，自己乜撚嘢都做唔到！咩『保護白詩婷』，笑撚死我！你只係想證明自己唔係廢物咋！」
呀禮強顏歡笑：「繼續吹，睇你吹到啲乜......」
「仲有，你係幾時將白詩婷當成白詠欣？尋晚你做乜撚嘢無啦啦錫白詩婷？因為保護唔到白詠欣，所以用白詩婷嚟代替？你幾時將佢哋兩個人混淆？佢只係得十歲，就算佢哋幾似樣都好，你都冇理由將佢哋當係同一個人——」
呀禮不知何處生出一股力量，猛然推開權叔。呀禮想說甚麼反駁的話，他像看著仇人似的瞪著權叔，一時間卻說不出話。
「畀我講中咗嗱？」權叔得意的笑道：「你只不過係唔願意面對自己無能嘅廢柴——」
「你講緊你自己？」呀禮也笑了笑：「當初保護唔到家姐嘅你，唔係暗地裡鬧自己無能？你最後選擇逃走，就好似你而家嘅選擇一樣！唔需要再扮到好正義咁款喇，你只係出於內疚嘅偽善者——」
「你講乜撚嘢呀！」權叔再按捺不住怒火，上前揍了呀禮一拳：「我......我唔撚準你講我家姐！」
「我係話你虛偽呀，白癡！」
「你呢？你都只不過係想喺白詩婷身上尋找慰藉。你夠膽講你冇幻想過，白詩婷大到咁上下，你就可以扑佢？你都只不過係被人擺佈嘅廢物，同嗰啲喪屍有咩分別！喪屍都好過你，因為你係自願被擺佈——」
「你講撚夠未呀！」倒地的呀禮也衝上前，和權叔扭打一團。
「你講我就算，點解要拖埋白詩婷同白詠欣落水！」
「係你講我屋企人先！」
兩人打了一會，忽然聽到一道稚嫩的叫聲：「唔好再打喇！」
剛剛和華嬸一起從伊利莎白醫院，推著一大箱醫療用品過來的白詩婷，從遠處便看到在打架的兩人，便放下手推車上前勸阻，然而兩人打得興起，甚至好像連自己的聲音也聽不見。無可奈何之下，只好衝到兩人之間，他們這才發現自己的存在。
「你哋......你哋點解突然要打交呀？」
兩人各自瞪著對方，一邊輕輕的喘氣。呀禮雙眼滿佈血絲，一字一句從他嘴裡吐出：「總之，我唔會走......要逃避嘅話，你自己去！」
「你真係無藥可救......」權叔冷冷拋下這樣一句後，揚長而去，完全摸不著頭腦的白詩婷想追上去時，卻被呀禮叫停。站在路中心的白詩婷，看著權叔遠去的背影，又看了一下呀禮，垂下了頭。
呀禮深呼吸一下，嘗試冷靜下來：「......白詩婷，過嚟。」
白詩婷低著頭走到呀禮跟前，咕噥說道：「你哋到底發生咩事呀？」
呀禮蹲下來，柔聲道：「我哋只不過係......睇法上有少少唔同。佢堅持要逃走，但係我話走出去都冇用，況且根本冇可能走得甩。」
白詩婷抬起頭來，雙眼通紅，眼泛淚光，哽咽道：「咁點解，你哋要打交呀？」
呀禮腦海閃過權叔對他的指責，他微微一怔，別過頭去：「......佢根本就不可理喻！係佢郁手先，我只不過係還擊！」
「我......我唔明白！」白詩婷跺腳，「我哋本來相處得好哋哋......自從嚟咗呢到之後，你哋個個都變哂！」
「我，我冇變呀！」呀禮抓著白詩婷的肩膀：「我會保護你，就好似一直以嚟咁樣！」
淚眼汪汪的白詩婷，凝視著呀禮，不發一語。呀禮伸手去撫摸她的秀髮，想講幾句安撫的話時，卻被對方擋開了手。白詩婷瞪了他一眼，忽然想起了華嬸，但不見她的蹤影，便料想她必定是已經進入醫院，於是就向那邊走去。
「白詩婷——」
「唔好跟住我！」
呀禮頓時止步，呆呆看著白詩婷進入醫院，搞不清自己到底做錯甚麼。
這一切都是為了你，不論是留在軍隊，或是上戰場——權叔不明白就罷了，為甚麼連你也不明白？
這樣想著的呀禮像觸電般從沉思中驚醒，他走向醫院，想找白詩婷解釋清楚，然而他在醫院內卻怎也找不著白詩婷。
稍早之前，白詩婷一踏入醫院，就聽見華嬸的叫聲：「白詩婷！呢邊呀！」
白詩婷連忙趕過去，和華嬸一起推著手推車。
「頭先打緊交嗰兩個人，就係權叔同呀禮？」
白詩婷輕輕的點點頭，華嬸再問道：「吓，咁佢哋做咩要打交？」
白詩婷沉默半响，才道：「我都唔知......好似話係，權叔想離開呢到，但呀禮唔願意......但我唔明點解佢哋會打起上嚟......」
華嬸雙眉一揚：「噢。」
「佢哋雖然成日鬧交，但從來唔會好似而家咁打起上嚟......」
華嬸摸摸白詩婷的頭頂：「傻妹，唔使喊嘅，男人成日都係咁架喇。」
白詩婷抬頭問：「成日都係咁？」
「係呀。有咩講唔啱就打到對方認衰為止，而家呢場戰爭都係咁架咋。」
白詩婷迷茫的看著前方，不發一語。華嬸又問道：「但係你有冇諗過逃走吖？」
她一愣，隨口喃喃回道：「我冇諗過呀......逃走？可以去邊到呀？」
華嬸裝著在思考的樣子，沉吟片刻後，隨口答道：「例如，美國？」
白詩婷抬起頭，呆呆的看著華嬸。以為她會說出甚麼地方，想不到她竟然說一個距離香港上千公里，在太平洋彼岸的國家。白詩婷對這個地方的知識，除了面積很大，說英文的，有幾個學校的外國老師都來自那邊之外，其他都忘記得一乾二淨。儘管如此，她也知道這地方要坐飛機才能到達，為何華嬸會說這樣說呢？
見白詩婷眼中的疑惑，華嬸連忙道：「哎，我只係隨口嗡咋。」
「......」
見白詩婷沉默不語，華嬸再試探性的問道：「但係，如果真係可以去美國，你會唔會去？」
「......咁呀禮呢？」
「佢想留喺到吖嘛。」
白詩婷輕輕的搖一搖頭，沒有說話。華嬸隨即笑道：「哈哈，講下笑啫，美國老練咁遠，有咩可能去到呀。」
白詩婷的小小腦袋在有的沒的胡思亂想，表面卻是不動聲色，華嬸見好就收，免得再說下去引起她的疑心。華嬸似乎對這邊頗為熟悉，白詩婷隨著她穿過一條又一條的走廊，甚至乘搭醫院中唯一一部仍然運作的升降機，來到醫院十四樓。一步出升降機，數步之遙的開外有一道大鐵門。華嬸到門邊的傳呼機低聲說了幾句，很快便有一名年若六十歲左右，蓄山羊鬍子，頗為英俊的男子走出來。鐵門被推開的瞬間，一段悶熱又夾雜動物膻味的空氣撲面而來，門外傳出各種動物的叫聲，直到大門被關上的一刻，所有聲音像斷線般戛然而止。看見白詩婷好奇的樣子，男子向白詩婷友好的微微一笑，這卻讓白詩婷下意識的抓著華嬸的手。
「陳博士，你要嘅嘢我帶咗嚟喇。」
「嗯。」陳博士先是看了白詩婷一眼，又快速的瞥一瞥貨物清單，轉而蹲下來向白詩婷道：「小妹妹，你叫咩名呀？」
「......」白詩婷抬頭看著華嬸，華嬸只是向她微微一笑，便向陳博士冷笑道：「佢叫咩名，關你咩事呢？」
陳博士微微一怔，又馬上回復滿臉堆歡的表情：「咁又係。」然後他走到華嬸身旁，裝著要親自推手推車的樣子，同時低聲問：「你想點？」
華嬸搖頭，低聲道：「我聽日會再嚟。」
陳博士微微頷首，又回復正常聲線：「華嬸，你幫我推開道門。」
華嬸睥睨著陳博士，過去為他推開鐵門。陳博士又友善的看了白詩婷一眼，便推手推車入內：「唔該哂呀，華嬸。」
「唔使......」
兩人快速的交換一個意味深長的微笑後便別過了頭。白詩婷有點好奇又害怕的看著門後一片漆黑的世界，和對面盡頭隱約透著亮光的小房間，直到鐵門漸漸合上，門後世界慢慢收成一束再隱沒，她才不由自主的長長吐了一口氣。
等待升降機時，白詩婷忍不住問：「華嬸......嗰個男人係咩人呀？」
「佢叫陳一凡博士，係美國嚟嘅科學家。」華嬸不動聲色，表情沒有任何變化，只是稍一停頓後，問道：「你係咪覺得呢個人好奇怪？」
白詩婷嚅囁道：「佢......佢成日向住我笑......」
華嬸忍不住的乾笑一聲，回道：
「佢可能只係鐘意小朋友啫。」