[喪屍][人性?][政治?]在喪屍橫行的年代裏，我只想做一個人: 68 犧牲者 下
第二天早上，前線部隊帶著食物和屍體回來。屍體會分成兩種，損毀嚴重的會直接用來當作食物，而其餘的——通常是傷重而死的士兵，就會成為喪屍，然後被讀取記憶。黑沙圍的情報來源除了屍體的記憶外，當然還有擄獲的文件，還有喪屍負責監測前線活動，但發掘士兵和軍官的記憶，經常會得到其他途徑得不到的情報。
「嗄嗄嗄......」
「家姐，你冇事吖嘛？」
跪在地上的郭伊絲用手背抹去嘴角的唾液，喘著氣地回道：「我......我冇事......」
「你根本唔需要自己親自去睇佢哋嘅記憶。」郭伊騏看了那些剛變成喪屍的屍體一眼，扶起了郭伊絲，「前線部隊已經匯報過佢哋見到嘅嘢，你只需要落決定就得。」
「唔親眼去睇，根本唔知道呢場戰爭有幾咁慘烈......況且，如果連呢啲事都承受唔到，我根本冇資格坐呢個位！」
村公所的地下室內，放在木桌的半截蠟燭，搖曳不定的火光映在兩姊弟臉上上，一人神色痛苦，一人憂心仲仲。數隻被命令原地待機的喪屍，則站在木桌的對面。
「仲......仲有一個......」郭伊絲踉蹌走到最近牆的喪屍前。那隻喪屍看著只有不過三十歲，身穿破爛的軍服，兩眼無神的看著郭伊絲。
郭伊絲把前額貼到喪屍的前額——這樣讀取記憶，消耗的能量最少。一瞬間，喪屍生前的記憶如同潮水般湧入大腦。郭伊絲再度臉容扭曲地跪了下來，低聲的抽泣起來。
郭伊騏扶著她到椅子坐下，過了一會才緩緩道出自己看到的記憶：「個男人被調返去槍會山軍營，先知道自己老婆死咗，死前竭盡全力生個BB出嚟，點知係死胎，而佢老婆冇幾耐都死埋......個男人甚至連老婆最後一面都見唔到，條屍一早被火化......佢......佢最後一戰，係自己行入去喪屍群入面自殺架......」
郭伊絲的說話斷斷續續而且不清不楚，郭伊騏只有柔聲安慰：「你要分清你自己嘅記憶同其他人嘅記憶呀。」
郭伊絲奮力搖一搖頭：「呢種事......呢場戰爭一日唔結束，呢啲事只會不斷發生！」
「你又嚟喇......就算你話要佢哋停戰，但又做到啲咩呢？」
「只要我哋要脅到交戰嘅雙方......」郭伊絲抹掉眼淚，「而家佢哋嘅兵力，同開戰嘅時候相比，已經少咗好多......如果呢個時候，我哋要求佢哋停戰，否則正式介入戰爭，佢哋可能會聽我哋講。」
「家姐，你仲未肯放棄呢個念頭呀？」
郭伊絲搖搖頭：「你幫我召集嗰班人類代表同所有喪屍控制者，我有嘢要宣佈。」
了解姊姊想幹甚麼，但郭伊騏在她的連番催促下只有照辦。等待期間，來的早的人你看看我，我看看你，再看看沉默不語的郭伊絲，猜不出她葫蘆裡賣甚麼藥。過了不久，包括前線部隊在內的所有喪屍控制者，加上所有人類代表，全部聚集在村公所內。這個時侯，郭伊絲才表明她想令雙方停戰，並提出她自己的建議。
此話一出，群情洶湧。雖然她之前已經提出過類似的想法，但眾人猜想她不過是忽發奇想而已，誰也想不到她隔了一段時間竟然再度提出，而且看來真的想要實行。眾人低聲議論，大多表示反對，這不出郭伊絲所料——事實上，反對人數已經比她想像中少。
一名喪屍控制者問道：「咁請問，同用武力迫佢哋停戰有咩分別？」
「唔一定要開戰——」
「假如真係要開戰呢？」
「......」郭伊絲沉默不語，其他人也安靜下來，等待她的回答。
「我哋只係調停戰爭，唔會真係開戰。」
此話一出，眾人更是議論紛紛。有人說這根本是自討苦吃，毫無意義；有人懷疑郭伊絲的背後目的；有人直接認為她瘋了。幾乎所有人都擔心，這樣做戰爭會直接波及黑沙圍：的確，黑沙圍事實上早就已經介入戰爭，即使只是幹些偷襲的勾當。解放軍和叛軍當然知道黑沙圍的存在，但一來黑沙圍的攻擊導致的損失不算太大，二來黑沙圍在戰爭爆發不久後，就轉為雙邊都襲擊的方針，以免被其中一方認為黑沙圍是幫助另一方，因此黑沙圍一直被視為某個勢力龐大，兩不相幫的土匪集團——對雙方而言，剿匪可能導致重大損失之餘，更可能令對方乘虛而入。
一名人類代表又問：「我就當你真係有能力可以終結戰爭......咁請問，你哋喪屍......」
他欲言又止，但所有人都知道他想問的是甚麼。喪屍控制們亦十分關注此問題，此時所有人望向她，猜想她的回答。一時間，村公所內又寂靜無聲，郭伊絲雖然一開始神色嚴肅，但漸漸臉露難色，最後低聲回道：「......我唔知道。」
此話一出，一時間鴉雀無聲，過了數秒後，眾人紛紛揚揚，高聲議論；一開始期待她會提出甚麼嶄新見解，誰知她根本沒有想過；本身已經瞧她不起的人，更是嗤之以鼻。一名人類代表不禁罵道：「你有冇搞錯，你咁做咪即係等同將我哋之前所做嘅嘢全盤否定？你咁講之前到底有冇用過個腦諗過——」
「喂！」坐在郭伊絲身旁的郭伊騏由一開始已經神色不善，當眾人開始高聲談論時更已是明顯的臉露不滿，此時他見有人出言頂撞姊姊，忍不住喝止了他，等到那人識趣的閉嘴，所有人靜了下來時，他繼續道：「你哋人類搞清楚一點：你哋今日見到嘅一切，都係由我家姐開始先，呢條村先會有今日......唔好因為我家姐畀你哋入嚟議事就得寸——」
郭伊絲伸手打斷了弟弟：「算啦，伊騏。」她環視眾人一眼，又道：「我知道，我話要阻止戰爭，你哋覺得我好魯莽，先唔講我有冇能力，呢條村本身嘅存在就係建基於戰爭之上——人類喺呢到得到庇護同食物，喪屍提供保護，而喪屍嘅食物喺戰場上面取得——終結戰爭，等同打破平衡。我當然知道。但我發現，呢條路根本行唔到落去。如果人同喪屍嘅矛盾解決唔到，咁樣......要令呢條村持續落去嘅前提係，戰爭持續落去——或者最起碼，令喪屍嘅食人本性得到滿足。無論如何，都係有人要因此而犧牲。我......我召集其他喪屍，周圍去搵倖存者，最後定居喺呢條村，一切都只係出於一個天真嘅念頭：『拯救人類等同拯救喪屍』......但我發現，拯救到一批人，代表另一批人必然被犧牲......各位，呢場戰爭總會有完結嘅一日，到時呢條村應該如何自處呢？為咗維持統治，去殺村外嘅平民？如果真係咁做，我哋就係下一場戰爭嘅始作俑者......我唔想咁樣。阻止而家呢場戰爭，或者咁講，去調停戰爭，我唔知道有咩方法，但係......我只係覺得，我哋必須畀世界知道，喪屍唔係剩係識食人。我唔知道有咩方法可以解人同喪屍嘅矛盾，如果我知道嘅話，我一早就講咗出嚟！但我諗，呢個唔單止係屬於呢條村嘅問題，更係屬於所有人類同所有喪屍嘅共同課題......調停戰爭，畀全人類知道喪屍嘅存在唔一定只會帶嚟殺戮，大家再搵出一個人同喪屍共存嘅方法......我希望大家明白。」
眾人沉默不語，除了那些最初便追隨郭伊絲，有思考過她理念的人之外，所有人都暗暗嘲笑她的天真和幼稚——她的天真和幼稚，大家早就心裡有數，只想不到其程度竟然如此之深，幾近愚蠢。事實上，甚至連那些支持她的人——數量很少——也覺得她太過魯莽，儘管她的理念有可取之處，但太難實行的話就沒有意義了。
「如果你執意要拯救全人類，最後就係連而家追隨你嘅人都拯救唔到。」所有人望向發言者，發現竟然是杜嵐。理論上所有喪屍控制者都有參加會議的權利，但杜嵐在這個群體畢竟是生面孔，她發言之後，所有人都低聲議論，談論她的來歷。
郭伊絲輕輕搖一搖頭：「我冇話要拯救所有人類。我邊有能力咁樣做？」
「但你嘅『拯救人類等同拯救喪屍』，背後邏輯就係咁。點樣拯救喪屍？因為喪屍需要人類作為糧食。要拯救喪屍，就有人類被犧牲；相反亦然。你嘅理論天生就矛盾。如果將你嘅理論推展，只會有三種結果：第一種結果，人類被喪屍全面控制，只有喪屍被拯救，人類最好嘅命運都只不過係被圈養嘅家畜；第二，人類殺哂所有喪屍，只有人類被拯救，喪屍最好嘅命運大概係成為實驗室入面嘅標本；第三，回歸最初嘅情況，喪屍同人類互相攻伐，維持一種微妙嘅平衡......無論係邊種情況都會有一部分人被犧牲。」
所有人饒有趣味的看著兩人。只見郭伊絲雙嘴唇緊閉，而郭伊騏則不知所措的看看郭伊絲，又看看杜嵐，一邊因為杜嵐公然挑戰姊姊而驚怒交集，一邊又擔心姊姊就這樣被駁倒。
只見郭伊絲深呼吸一下，緩緩道：「我選擇第四條路：喪屍同人類共存，但喪屍唔食人。」
此話一出，所有人嘲諷似的看著她，像在是看甚麼瘋子。本來一直支持她的人也暗自搖頭，覺得她已經完全被駁倒，開始胡言亂語了。
杜嵐悲傷的看著她，沉聲道：「你應該知道，呢條村曾經出現過一個咁嘅人。佢自己一個忍受饑餓同孤獨，但最後被極權所利用。假如唔想咁嘅話，住喺呢到嘅人類就要忍受恐懼，同一隻饑餓嘅喪屍共處嘅恐懼。你想要人類同喪屍違反佢哋嘅本性，為咗你所謂嘅拯救？」
郭伊絲搖一搖頭：「根本冇所謂嘅『本性』......問題在於你肯唔肯去做。」
杜嵐憤然的甩一甩手，「我就當真係有人做到......但咁樣嘅人一定好少。有幾多人可以忍受饑餓同孤獨？到最後只會有好多人被你離棄。你願意咁樣咩？」
郭伊絲默然不答。杜嵐又繼續道：「問題在於，你太過執著於嗰啲被你犧牲嘅人。唔通呢條村嘅存在，唔係已經代表有人被拯救喇咩？你點解想要犧牲而家呢一切？呢到嘅人同喪屍因為你帶嚟秩序同糧食而去追隨你，但你而家不但想收返糧食，仲要將自由歸還畀佢哋，但又希望佢哋自己壓抑自己嘅本性？你咁樣做並唔係拯救，而係離棄呀。」
郭伊絲沉默不語，良久才低聲道：「我有啲唔係好舒服，今天就到此為止啦。」說罷，就站起離去了。餘下的人談論著郭伊絲的理論和剛才的討論，內心充滿不屑，嘲諷她的愚蠢和天真，就連她最忠實的支持者，對她剛才的表現也忍不住數落幾句。在一片議論聲中，杜嵐悄悄地退了出去，追上剛離去不久的兩人——
「郭伊絲！」
兩人像被透明的牆擋住似的忽地止步，郭伊騏回過頭來，神色哀傷，流露困惑的眼神的雙眼盯著杜嵐，顫聲道：「你過嚟做咩？」
「我......」杜嵐別過頭去，欲言又止。
「你頭先講嘅，真係你所相信嘅嘢？」郭伊絲沒有回頭，背著杜嵐這樣說道。
杜嵐低聲道：「只不過係根據你嘅邏輯去推導嘅結論，談唔上相信定唔相信呀。」
「我知道。」她頓了頓，「所以，『拯救人類等同拯救喪屍』，呢個想法係錯嘅？」
「......我只係話，呢個想法本身就係矛盾。」
「如果真係咁，咁呢條村到底係為咩而存在？我又到底係為咗啲咩而一直堅持到而家？」
杜嵐黯然道：「我唔知道。」
「我都係。」
郭伊絲拋下這樣一句就離開了，只剩下杜嵐一人，站在道旁，心情複雜的看著郭伊絲遠去的背影。就在同一日，傳出郭伊絲被彈劾的消息。第二天的村公所會議中，在六二票對兩票的情況下，郭伊絲正式被褫奪執政官一職，而當晚，郭伊絲靜靜地離開了村子——這時距離中環軍營發生那件驚動全世界的另一件事，尚有一星期。