[喪屍][人性?][政治?]在喪屍橫行的年代裏，我只想做一個人: 81 大審判 下
「各位！我知道你哋肯定會覺得，我所講嘅嘢一定係偏幫郭伊絲，但我想講，雖然郭伊絲違反咗黑沙圍嘅法律，但絕對未去到背叛咁嚴重！」
原本的法官席和證人欄等的設備均已撤走，取而代之的是一張張長椅。坐在長椅上的陪審團瞇著眼睛，看著郭伊騏神情激動的演講：「冇錯，佢的確擅自離村，呢一點我唔打算否認，但話佢背叛就簡直係荒謬！家姐佢只不過係反對一個佢認為唔合適嘅和約！控方最大嘅理據都只不過係話，假如簽唔成和約香港就會被核彈毀滅，但呢一點根本無辦法證實！」
一人回道：「佢哋喺中環放咗粒核彈喎，擺到明係要脅啦。」
「你都識講係要脅，如果佢哋真係想毀滅香港，根本唔使要脅呀！」
「你根本唔明，中國係唔會容許有反對嘅人存在架！就算一獲熟都要同歸於盡，更何況係小小一個香港！佢哋會扔核彈將香港完全毀滅唔係咩出奇嘅事呀！」
「就算係咁，你都根本冇證據證明家姐拒絕，代表佢想黑沙圍嘅人死！」
「佢嘅拒絕本身就好大機會導致黑沙圍嘅毀滅！」
郭伊騏啐了一口，「荒謬！完全係荒謬！假如佢係執政官或者咁樣就講得通，但你哋唔係已經將佢罷免喇咩？咩樣佢講咩都唔會有法律效力呀！」
另一道聲音叫道：「所以法庭一開始就話佢係假冒執政官呀！」
「家姐佢從來都冇話過佢係執政官呀！」
「但除咗執政官，有咩人有權代表黑沙圍？即使佢冇自稱係執政官，但事實上係潛越執政官嘅權力呀！」
「就算係咁......」郭伊騏一時語塞，說不出話。此時杜嵐站了起來，說道：「我覺得你哋好似一直都搞錯一件事......即使郭伊絲答應，最後簽訂和約，香港就可以脫離被毀滅嘅命運呢？首先話郭伊絲拒絕就會令香港被毀滅，咁嘅講法完全站唔住腳，因為動唔動用核彈係由中國決定而唔係由郭伊絲決定。第二，根據嗰個軍官嘅講法，中國從一開始就堅持要張蔭松投降，美國人撤出香港，但佢哋最後得出嘅方案，根本冇辦法滿足中國嘅要求，但我唔明點解中國會突然答應......對中國而言，最優先選擇係張蔭松投降同美國人離開香港，其次係用核彈炸毀香港，最後先係接受和談，因為咁不但失去香港，而且戰爭仲會持續落去。咁到底係咩因素導致佢哋選擇睇上嚟最差嘅選項呢？我認為最可能嘅答案，係中國只係想拖延時間，即使我唔知係出於咩原因。」
一人高聲問道：「咁你話香港唔可以脫離被毀滅嘅命運，係咩意思？」
「意思就係，對中國而言和談只不過係拖延，等到時機成熟，必然會轉而選擇返第一或者第二選項，即係話，無論接受定唔接受和約都好，香港都仍然會受核彈威脅。既然係咁接唔接受都一樣，你就冇可能話係因為佢嘅行為導致香港被核彈威脅！」
即是情急之下作出的推論，論證過程難免有點粗疏。此時又有人高呼道：「就算真係咁，拖得一時得一時都好吖！」
「假如你真係要證明郭伊絲背叛，你要證明佢嘅行為係背叛行為，例如幫助外敵或者危害黑沙圍安全等等，關於呢點我已經講過，而家嘅證據根本證實唔到呢點！」
「我唔認同。我認為只要證明到郭伊絲有背叛嘅意圖就可以入罪，就算佢嘅行為未足以危害黑沙圍。」人群中，一男子緩緩站起，杜嵐記得他是李忠浩的黨羽，只見他面向群眾，侃侃而談：「首先，有一件事郭伊騏都不能否認，就係郭伊絲係擅自離村。就算佢係想自己去搵終端，咁點解唔同議會講，而要偷走？佢出現喺軍營已經係一星期後嘅事，當中到底發生咩事只有佢自己先知。仲有，無論和談失敗會唔會導致核彈轟炸，但有點係毫無疑問，就係黑沙圍錯失一個擴張嘅機會。即使解放軍唔會核平香港，但從張蔭松馬上求和嘅態度睇，戰爭打落去張蔭松好大機會失敗，到時黑沙圍亦必然會被攻擊，而我哋基本上冇可能有還手之力，一來實力根本唔可以相比，二來解放軍根本冇必要留我哋喺到。假如和談成功，其中一點非常重要，而我哋似乎遺忘咗嘅，就係我哋將會同中國處於一種『戰爭中嘅和平』，而呢種和平得到雙方默認......只有槍會山嗰場和談先有可能達至呢種和平。話郭伊絲係背叛者，原因就係出自呢到：現時黑沙圍只有透過張蔭松同解放軍嘅戰爭先得以存在，而兩者嘅戰爭始終會有終結嘅一日；假如槍會山嘅和談成功，代表喪屍同人類組成嘅呢個政治體，處於一種戰爭中嘅和平，一種動態平衡，呢個先係長久嘅和平，但郭伊絲卻反對呢種和平，甚至從中阻撓，導致黑沙圍面臨嗰場必然嘅戰爭，戰爭對手係張蔭松或解放軍其中一方。」
杜嵐大叫道：「所以我就係話，你講嘅嗰種長久和平根本冇可能存在呀！」
杜嵐和那男子展開激烈的辯論，互不相讓，有人喊道：「你哋咁拗落去都唔知拗到幾時，不如投票表決啦！」
這提議有不少人響應，而郭伊騏一開始就搶佔先機，讓討論不斷延續，就是他不確定支持郭伊絲的人是否足夠，然而當他思索該如何是好時，人們已經自發地展開投票。
與杜嵐辯論的那名男子走到長桌前，原本是證人席的地方，朗聲道：「首先係第一項控罪，擅自離村，認為郭伊絲有罪嘅請舉手。」他自己也舉起了手，「......總數係33人。我可以理解為郭伊絲擅自離村嘅罪名成立。有冇人反對？」
一片沉默中，男子再說道：「第二項控罪，背叛罪，認為郭伊絲有罪嘅請舉手。」
郭伊騏吞一吞口水，只見眼前黑壓壓的一堆手在空中懸擱，一時間也看不清到底有多少人在舉手。郭伊騏暗暗握著杜嵐的手，杜嵐抬頭看著對方，只見他眼中流露的是驚恐，手輕微顫抖著，掌心一片冰冷。
郭伊騏和杜嵐一看眼前數十隻擱在空中的手，不禁抽了一口涼氣，雖然當中也似乎有沒有舉手的人，但數量足以令控罪不成立嗎？
「......總數28人。而家，認為無罪嘅人請舉手。」
連同杜嵐和郭伊騏，只有5人舉手。杜嵐長長吐了口氣，雖然未達有效的30票，卻已經相當接近。
「我唔明白。」杜嵐瞪著眼前其中一位表態認為郭伊絲背叛的人，「你真係......真係覺得郭伊絲會背叛？」
「佢唔係講得好清楚喇咩？佢話『黑沙圍嘅存在本身就係錯誤』！佢嘅意圖已經好明顯啦！」
眾人點頭稱是，杜嵐著急起來，不由得提高聲量：「當時佢只不過係一時意氣先咁講咋！你哋竟然憑一句說話就覺得佢係背叛，太過武斷喇！」
「當然唔只係用一句說話就下到結論，但綜合佢之前嘅行為，的確有背叛嘅嫌疑。」
「你哋口口聲聲話佢有嫌疑，但一切只不過你哋主觀嘅猜測！」郭伊騏叫道：「由喺外面流浪開始，周圍去搵有需要幫助嘅人類，召集志同道合嘅喪屍......搵地方住，搵食物，對付其他有敵意嘅喪屍控制者，直到嚟到呢條村，日日處理村嘅事務工作到夜晚，為咗得到情報次次搞到自己痛苦不堪，佢做嘅邊樣嘢唔係為咗呢條村著想呀！而你哋就竟然走到聽一個陌生人講，甚至想判家姐死刑！」
「我哋冇話過佢冇為黑沙圍付出，但佢嘅行為處處都顯示有背叛嘅嫌疑！如果唔係有企圖，點解要偷走？點解假冒係黑沙圍嘅和談代表？點解要拒絕明顯對黑沙圍有利嘅方案？」
「因為佢當初建立呢一切嘅時候，唔係想建立一個用戰爭嚟維持自己存在嘅群體呀！」
「咁仲唔係背叛？」那人凜然道：「黑沙圍嘅存在基礎就係戰爭，郭伊絲不但否定呢一點，仲身體力行咁去實踐，咁已經係背叛。」
郭伊騏破口大罵：「荒謬！」
「仲要拖到幾時呀？」
「分明係有罪啦.....」
郭伊騏和那人爭辯，而旁邊的人則鼓譟不止。兩人吵得不可開交之際，原本由在外頭被鎖上的大門忽然打開，三十三雙眼睛同時望向大門，只見李忠浩站在門外，身後是兩三名捧著一大箱食物的村民。
「我相信各位已經有相當深入嘅討論，但一時三刻的確好難搵到共識.....而家已經到咗晚飯時間，不妨稍為休息一下，食完晚飯之後再繼續討論啦。」
當審訊完成時下午也已經過了一半，陪審團退庭商議後，你一句我一句下，一晃眼就到了晚上。那些負責分派食物的村民手腳麻利，先把蠟燭點好放到桌上，再分別為人類代表和喪屍代表端上合適的食物。由於最近停戰，加上大部分喪屍控制者已經回村，喪屍們今頓只能吃用鹽醃過的，本來是當作儲糧的人肉，而人類代表則吃從附近採集的水果和農作物，還有從森林和河捕獵的野豬和河魚。
村公所中，本來繃緊的氣氛此時消失無蹤，人與喪屍談得興高采烈，內容大多是圍著和談之後的想像。杜嵐拿著那片肉，仔細地端視著：肌肉的紋理依舊清晰，上面鋪了一層薄薄的鹽巴......肉不知被醃了多久，不知是來自甚麼部位，也不知道這人是男是女，經歷過怎樣的人生。郭伊騏一邊想著姐姐的事，兩三口把肉吞下，目光移到杜嵐手上紋風未動的肉塊。
「你做咩唔食，呆咗咁企喺到呀？」郭伊騏低聲問道：「你......仲係食唔慣人肉呀？」
「我......我冇事......」杜嵐苦笑一下，小小的咬了一口人肉，勉強的吞了下去。除了過鹹之外，味道就跟平常吃的人肉差不多，她不是早已經習慣了嗎？然而她看著眼前的人和喪屍若無其事地交談著，偶爾還傳出幾下大笑，她胃中一陣不適，嘔吐感愈來愈強烈，最後終於按捺不住，衝入廁所把所有東西都吐了出來。回來時人們除了好奇地看了她兩眼外，沒多說甚麼。
郭伊騏輕輕嘆了口氣，「你果然仲係唔習慣。」
杜嵐皺眉搖搖頭，沒有回答。
晚飯過後，再度展開討論。那個屬李忠浩的黨羽，沒經眾人點頭同意就自顧自地舉行投票的男子，此時高聲道：「為咗令議事過程更有效率，我有個提議。既然大部分人都認同郭伊絲有罪，只有少數人唔同意，我認為嗰少數人應該向大家講吓點解唔同意。」眾人點頭稱是，男子又道：「頭先投票認為郭伊絲無罪嘅人，請再舉手。」
連同杜嵐和郭伊騏，人群中偶爾有一兩處伸出了手，稀疏得有如汪洋中的孤島。
「杜嵐同郭伊騏已經充分咁講過佢哋嘅意見，所以——」
「你真係當咗你自己係主席？」郭伊騏猛然站起，「你憑乜嘢唔畀我發言？」
「冇話唔畀你發言，只不過如果你冇新嘅觀點，點解唔畀其他人講吓呢？」
「咁又點？呢件事關乎我家姐嘅性命，你憑乜咩唔畀我講！」
眾人有些笑了起來，覺得眼前的是一場鬧劇，又有些明顯不悅，認為郭伊騏只是在拖延時間。正當眾人不知該如何是好時，其中一名舉手的人喊道：「可唔可以畀我講呢！」
循聲望去，發言者是個二十多歲的女人。確認所有人的目光都集中到自己身上，她才說道：「......喺未遇到郭伊絲之前，我到處去到處去搵人肉，甚至曾經為咗食人而殺人。變成喪屍，就算幾唔願意都好，為咗生存都係冇辦法。但自從遇到郭伊絲，我先知道原來喪屍唔一定要殺人，仲可以保護人。郭伊絲一直親力親為咁為條村服務，所以我始終都唔相信佢會背叛呢條村，背叛佢親手建立嘅呢一切事物。」
眾人低聲討論著，那名主導會議的男子問道：「郭伊絲當初係點樣同你講架？」
「佢話『拯救人類等同拯救喪屍』，因為喪屍冇可能脫離人類而獨立存在，人類同喪屍一定要搵出一個共同生活嘅方法，否則就只會永遠咁互相殘殺落去。」
「咁而家佢嘅目的唔係已經達成喇咩？」男子微微一笑，「在坐各位當中，既有喪屍，亦都有人類。頭先晚餐時間，喪屍食嘅係人肉，但在坐嘅人類不但冇對此而感到厭惡，反而同喪屍談笑風生。我唔係要譴責呢種態度，完全相反，我認為咁係呢條村成立嘅理念得以實踐嘅證明。郭伊絲所講嘅和平共存，頭先唔係已經顯示，佢講嘅和平已經完美咁實現喇咩？每一位相信『拯救人類等同拯救喪屍』嘅喪屍，唔係已經透過同人類建立關係，將自己由純粹嘅食人怪物轉為人類嘅保護者，從而喺呢個社群入面搵到自己嘅位置喇咩？我哋追隨郭伊絲係為咗建立一個人同喪屍共存嘅社會，而郭伊絲反而喺呢個社會建立出嚟之後，反而第一個就走出嚟反對，而且唔係純粹口頭反對，仲有實質行動，咁唔係背叛又係咩呢？」
「但係，你始終都冇好確實嘅證據，證明郭伊絲實際上做過危害黑沙圍嘅事呀！」
「佢喺槍會山嘅表現已經顯示佢對黑沙圍有實質嘅危害喇！再退一步講，即使佢冇做到，亦難保佢之後唔會做呀！」
眾人點頭，郭伊騏再也按捺不住，猛然站起，衝到台上，毫不猶豫的往男子的臉上揍了一拳，男子頓時倒地，杜嵐呼喊著叫他住手，但郭伊騏繼續往男子的臉多打了幾拳，才被三四名離講台最近的人七手八腳地拉開，按在地上。一直在外面等候消息的李忠浩，馬上派人把已經不醒人事的男子和被五花大綁的郭伊騏帶走。杜嵐從郭伊騏猛然站起的一刻就知道會發生甚麼事，但她根本無力制止，只有默默地看著郭伊騏被帶走。兩人被帶走後，村公所一度陷入混亂，人們熱烈地討論應否中止會議，杜嵐也極力要求中止議事，待到兩人的情況合適回到村公所，這才合乎程序，但最後大多數人卻傾向於繼續會議。有人提議不要浪費時間，馬上進行投票，獲得了眾人響應。
場中一道聲音叫道：「......認為郭伊絲背叛罪罪成嘅，請舉手。」
杜嵐閉起雙眼，不忍去看。混雜在舉起了手的眾人當中，她看來就像個異類。一道清楚的聲音鑽入她大腦：「總數30人。而家，認為郭伊絲無罪嘅請舉手。」
儘管這毫無意義，儘管甚麼也改變不了，杜嵐仍然緩緩的，幾乎是顫抖地，舉起了手。在那一刻，她忍不住流下淚來。
「總數1人。認為郭伊絲背叛罪成嘅有30人，達到所需票數30票。我哋將呢個結果轉告法官，成件事就告一段落喇。」