[喪屍][人性?][政治?]在喪屍橫行的年代裏，我只想做一個人: 80 大審判 上
由於先前的誤以為敵襲，許多喪屍控制者回到村裡，加上這可是審判前領導人的大事，連同長期駐外的喪屍控制者委任投票的代表，有投票權的全部33人全部列席，擔當陪審員，這是執政官選舉時也未曾出現過的情況。
法官由本身是律師的人類代表擔任，負責維持秩序和控制整個審判流程，等同兼任法庭書記，但最關鍵的判罪和量刑由眾人投票決定，而控方是黑沙圍的李忠浩擔任。程序上郭伊絲可以委任任何一人為她答辯，但她選擇自辯。
郭伊絲被帶到法官席前的一張小方桌前，身後就是一排排坐滿了人的木椅，紙袋被揭開的一刻，眼睛因為不適應而閉上，過了兩三秒後她才看清現場的情況。
法官先清一清喉嚨，朗聲道：「被告郭伊絲，被控於2018年11月12日，擅自離開黑沙圍所屬範圍，並於一星期後嘅11月19日，喺槍會山軍營假冒係黑沙圍執政官，代表黑沙圍，參與張蔭松少校同解放軍一方嘅和談。而家控方指控被告兩項罪名，分別係擅自離村同背叛罪。」
郭伊絲雖然上台前就知道自己要被審判，但真的身處被告席時，她也不禁緊張起來。她往後方一瞥，只見數十對眼睛同時望向自己，頓時渾身顫抖了一下。
「被告，你認唔認罪？」
現場瞬間靜了下來，郭伊絲輕聲回道：「唔認罪！」
法官點點頭，「根據程序，你有權選擇搵人為你辯護，但你選擇自辯，係咪？」
「冇錯。」
法官向李忠浩道：「控方，請作開案陳詞。」
「呃，嗯......」李忠浩微微一怔，「多謝法官閣下。首先，被告郭伊絲擅自離開呢一點已經係大家都好清楚嘅事實，我諗我哋唔需要再多加討論。我哋嘅討論焦點應該喺槍會山軍營嘅和約，以及被告冒認係黑沙圍執政官，代表黑沙圍『拒絕』和約呢件事上面。張蔭松少校同解放軍喺槍會山軍營上討論和談嘅事宜......雙方好唔容易提出一個可行嘅方案，即係實行所謂嘅黑沙圍模式，將香港交畀喪屍管治，人類一方由張蔭松管轄，而香港同中國會維持戰爭狀態，但呢種狀態，事實上又係一種平衡。假如唔咁做嘅話，中國就會威脅用核彈移平香港，因為張蔭松少校嘅存在嚴重威脅中國嘅政治正當性，但假如換成係喪屍管治香港，中國就唔再需要宣稱香港嘅主權屬於中國。當然，可能實行上嚟會困難重重，但起碼係一種解決嘅方式，甚至解決唔到嘅話，都不失係一個有效嘅拖延方式。呢個方案真係實行嘅話，好明顯黑沙圍會從中得益，但被告假冒成黑沙圍執政官拒絕咗呢個方案。咁樣做，唔單止損害黑沙圍嘅利益——假如和談失敗，香港又會再置於核平嘅陰霾之下，即係話，被告嘅所作所為不但危害黑沙圍嘅人民，甚至可以話係危害所有香港人。所以，雖然而家黑沙圍並無相關條文，但好明顯被告嘅行為已經構成叛逆，我認為最合適嘅刑罰係死刑......」
此話一出，原本安靜得一針掉地也能清楚聽見的村公所，頓時炸開了鍋，人們議論紛紛，想不到李忠浩推郭伊絲上法庭還不夠，竟然還想要她的命。當然，李忠浩並非毫無根據便這樣說。過往曾出現泄露情報的情況出現，引起其他喪屍控制者大舉入侵，但那是進入黑沙圍之前的事了。那一次導致不少的人類和喪屍死亡，為防止同類事情發生，制定了背叛罪，
而建議的刑罰，與謀殺一樣(殺死受法律保護的居民，不論該居民是人類或喪屍，而喪屍包括喪屍控制者及一般喪屍)，是死刑，畢竟不可能為了罪犯而浪費資源興建監獄；流放，又等同放虎歸山，因為不知道他會做出甚麼對這個群體不利的事，所以死刑是唯一合適的刑罰。
聽到他這樣說，郭伊絲毫無反應，郭伊騏卻怒得滿臉通紅，站起來向李忠浩破口大罵，法官要求肅靜的同時還要指揮庭警制止想襲擊李忠浩的郭伊騏，待到秩序稍為回復正常時，法官警告郭伊騏再這樣做會被驅逐出場，再向李忠浩確認陳詞已經結束，便開始傳召控方證人。
首先上場的是那名軍官。他臉上掛著輕蔑的笑容，顯然覺得這場所謂的審判十分荒謬。在和李忠浩一唱一和之下，軍官重新交代一遍和約簽訂的始末，強調和談是為了防止最壞的情況，即香港被核彈毀滅而展開，假如和談沒有成功，後果可想而知；另外他亦提到和談的參加者知道郭伊絲是黑沙圍領導人，但她已罷免的事還是和談進行了三天才得知，在此之前郭伊絲一直反對和約。
之後陸續傳召其他證人，例如郭伊絲逃走當晚負責駐守村外的喪屍控制者，其他與郭伊絲有關係的喪屍控制者等等，雖然郭伊絲可以選擇盤問證人，但她卻沒有這樣做。
「跟住傳召下一位證人......郭伊騏。」
現場的氣氛又再度活躍起來，眾人望向郭伊騏，等待他的反應。
法官向郭伊騏道：「證人，鑑於你係本案被告嘅直系親屬，你有權選擇拒絕出庭，但假如你選擇作供，你必須要如實作供。」
郭伊騏大叫：「我拒絕！」
法官點頭，看著手上的文件，「咁樣嘅話，下一位證人係......杜嵐。」
本來期待看一場好戲的群眾馬上又竊竊私語起來，望向手足無措的杜嵐。法官見杜嵐面有難色，遲遲不肯上前，便道：「證人，你必須出庭作證，呢個係你嘅義務嚟。」
這下子杜嵐不得不硬著頭皮站上證言台上。她望向被告欄上的郭伊絲，此時她也在面無表情看著杜嵐。在郭伊絲出走後，想不到下次的重遇竟是在法庭上，只見郭伊絲面色慘白，憔悴不堪，杜嵐不由得愣住了。
「證人，你同被告係咩關係？」
杜嵐不答，李忠浩又重新問了一次，杜嵐仍是不答，法官不得不說道：「證人，你必須回答控方嘅問題。」
「......郭伊絲係我嘅朋友。」
「喺11月12號嘅朝早，你係點樣得知郭伊絲失蹤嘅消息？」
「嗰日......郭伊騏過嚟同我講嘅。」
李忠浩取出郭伊絲留下的紙條：「呢張紙上面寫住『外出尋找終端，勿念』，你對張紙有冇印象？」
「郭伊騏話佢一起身就唔見郭伊絲，跟住就發現嗰張字條。」
李忠浩點點頭，向群眾說道：「相信大家都知道，郭伊絲喺逃走嘅前一日正式被禠奪執政官一職，而佢被質疑嘅原因，正正就係因為我哋認為佢嘅理念同黑沙圍嘅利益有巨大衝突，所以唔再合適做領導者。從結果嚟睇，我哋咁做係避免咗最壞的情況。然而我哋必須要明白郭伊絲點解要咁做，先可以對案情有全面嘅理解。」他再轉向杜嵐：「郭伊絲有冇同你講過佢去搵終端係為咗咩事？」
「......我唔知道。」
「根據議程紀錄，」李忠浩拿出一本黑色的筆記本，上面由書記官記錄每次村公所會議的內容，「你喺郭伊絲召開嘅緊急會議上面公開質疑郭伊絲，而郭伊絲面對你嘅質疑，幾乎冇還手之力。你既然自稱係佢嘅朋友，點解要咁樣公開令佢出醜？」
「我唔係要佢出醜。」杜嵐低聲說道：「雖然我哋係朋友，但我不過係覺得佢嘅諗法太不切實際，所以先要咁講。」
「何謂太過不切實際？」
「喪屍本來就係要食人為生，假如必須要同人類為伍，就一定要劃分受保護嘅人類同要成為食糧嘅人類，最後只會有三種結果：人類被奴役，喪屍被滅絕，或者係兩者互相攻伐，產生一種動態平衡。郭伊絲希望黑沙圍停止對外攻擊，但又講唔出呢到嘅人應該何去何從，咁樣唔係不切實際咩？」
「即係話，你都認同郭伊絲嘅行為係損害緊黑沙圍嘅利益？」
「......」
「正如你啱啱所講，呢條村本身嘅存在就係要作出劃分，我哋要保護村入面嘅人，無可避免地要犧牲村外嘅人。槍會山軍營嘅和談提出嘅方案基本上就係由呢個概念發展出嚟，但郭伊絲阻撓和約簽訂嘅所作所為，可能令整個香港被核彈毀滅，黑沙圍唔可能倖免於難。如果咁都唔算係背叛，咁點先算係呢？」
「就算係咁，你都唔可能一口咬定，假如郭伊絲拒絕，就會導致香港被核彈攻擊呀！再退一步講，你唔可以因為郭伊絲拒絕，就因此話佢想背叛黑沙圍！」
「呢個唔係佢想唔想嘅問題，而係佢嘅行為本身已經構成背叛。」
杜嵐怒道：「你話佢背叛嘅所謂證據，只不過係嚟自於嗰個軍官嘅片面之詞！失驚無神走出一個咁嘅人出嚟，佢講嘅嘢可唔可信都已經係問題啦！」
「呢點由法庭同在坐嘅人決定，唔係由你決定。」他轉向法官道：「法官閣下，我冇嘢問喇。」
法官看了一眼法庭文件，「控方已經傳召咗所有證人，跟住就——」
「等等，我要盤問證人。」
所有人望向本來一直保持沉默的郭伊絲，只見她向法官道：「我有權盤問證人，係咪？」
法官因為郭伊絲一直選擇不盤問，她這樣說時，不禁一呆，隨即回道:「冇錯。」
郭伊絲轉向杜嵐。有那麼一小段時間，全場默然無聲，郭伊絲思索片刻，緩緩開口說道：「呀嵐......雖然只係過咗個幾星期，但好似同你好耐冇見咁......呢幾日真係發生咗好多事呀。」
「係呀......」
「你係咪已經適應老師嘅工作喇？」
「嗯......」
「你仲記唔記得，包圍黑沙圍，嗰個叫林紫葵嘅女仔？我喺出面撞返佢。我之前冇同你提過，但其實我同佢一早已經識......喺最初我決定去幫助人類嘅時候，佢曾經係我哋嘅一份子，只不過佢為咗佢妹妹，決定去搵令喪屍變返人嘅方法，所以我哋分開咗。」
「我知道......你哋決定分道揚鑣嘅時侯，我都在場。」杜嵐憶述當日的情況，郭伊絲不禁笑了起來：「原來係咁，點解之前冇聽你提過嘅？」
「嗰陣我見唔到你個樣，所以一直都諗唔起另一個人原來係你。」
「假如嗰陣我哋已經見面嘅話，或者後面好多事就可以避免，你亦都唔會變成而家咁樣......」
杜嵐苦笑一下，搖搖頭：「嗰陣我哋點會想像到，會有主動保護人類嘅喪屍？即使見面，都唔會加入你哋。」
「嗯......你咁講，令我諗返起最初嗰陣嘅辛酸。嗰陣又點會諗到，我哋竟然會發展到咁嘅規模，更加估唔到，自己竟然會被當初追隨自己嘅人審判。」
郭伊絲低頭想了一會，自顧自地簡述林紫葵重遇的經過後，再道：「......我終於同終端見面，但最後佢嘅回答，就同各位所希望嘅一樣，人同喪屍注定要互相殺戮......假如黑沙圍要繼續存在，就必定要有外面嘅人犧牲......你之前咪同我講，你希望去搵終端，去解答你一直都諗唔通嘅問題嘅？你唔需要去搵佢喇，因為佢解答我嘅問題時，同時都答緊你嘅問題:喺終端眼中，人同喪屍係成對嘅概念，只有透過互相殺戮，兩者嘅意義先會得到完滿。」
「......」
郭伊絲微微一笑：「所以，其實我要問既只有一個問題......呀嵐，假如終端講既係真既話，咁樣，你認為自己係喪屍定係人類呢？」
「......我唔知道。」
「我鍾意呢個答案。」 郭伊絲轉向法官：「法官閣下，我問完喇。」
至此，控方已經完成舉證。在幾乎所有證據都對郭伊絲不利的情況下，法官宣告郭伊絲需要答辯。
「辯方，請作開案陳詞。」
「......我擅自離村嘅原因，我頭先已經講得好清楚。至於槍會山軍營嘅談論，我都係去到先知有件咁嘅事。當時我嘅諗法係，如果佢哋達成和談，不論香港由咩人控制，黑沙圍就必定會成為佢哋下一個目標，所以必須要有人去參加呢場會議......即使我因為堅持人同喪屍有和平共存嘅可能而被褫奪職務，即使原來黑沙圍嘅存在，竟然要以他人之死做代價......我仍然想去追尋嗰個可能唔存在嘅答案，因為一旦我唔咁做嘅話，等同合理化我哋殺人嘅行徑，呢樣絕對唔係我當初決定去建立呢個團體嘅目的。」
郭伊絲表示要親自作供，在台下的群眾的低聲議論中，她走上證人席。李忠浩凝視著她兩三秒後，才說道：「郭伊......被告，你係喺咩時候，知道中環軍營被擊中嘅事？」
「和談會議上面。」
「和談會議之前，你知唔知呢件事？」
「唔知。」
「你點解會身處槍會山軍營？」
「因為我答應林紫葵，如果有用暴力以外嘅方法去解決人同喪屍嘅矛盾，林紫葵就幫我手，去調停戰爭，同時林紫葵可以用呢個方法去喪屍病毒嘅解藥；否則我就會幫佢手，直接用喪屍去要脅佢哋攞解藥。」
「結果係點？」
「結果係我要幫林紫葵。」
「去到槍會山軍營，先知道佢哋已經因為核彈嘅事展開和談？」
「冇錯。」
「你點解要介入和談？」
「因為......我覺得呢個係機會，即使最後冇成果都好，起碼呢個係機會畀我哋同外面嘅人互相理解。況且佢哋真係停戰，黑沙圍必然成為下一個目標，所以必須要有人喺入面發聲。」
「你當時係以咩身份參加和談？」
「......我入去會議室嘅時候，對方已經知道我嚟自黑沙圍。我並冇話我係黑沙圍嘅領導人。」
台下發出窸窸窣窣的議論聲，李忠浩繼續問道：「對方向其他人介紹你嘅時候，或是稱呼你嘅時候，係用點樣嘅詞彙？」
「黑沙圍嘅代表。」
「你參與和談嘅日數有幾多日？」
「大約三日。」
「跟住發生咩事？」
「佢哋話我假冒黑沙圍嘅領導人，於是困住我。」
「好。」李忠浩低頭看一眼手上的文件，「當時和談會議上面，提出點樣嘅方案？」
「......就同頭先嗰個軍官講嘅一樣。」
「呢個方案有咩人贊成？」
「張蔭松，美國代表同中國代表。」
「咁有咩人反對？」
「......我。我反對。」
台下議論紛紛，法官不得不再次要求肅靜。李忠浩再問：「呢個方案係喺會議邊一日提出？」
「第一日。」
「呢個會議得唔到通過，係因為咩原因？」
「因為我。」
人們交頭接耳，郭伊騏則低聲咒罵著：「根本冇必要咁答！就算唔出聲都好過咁答啦！咁同認罪又有咩分別呀！」
「被告，呢三日入面，你係咪堅持唔接受佢哋提出嘅嗰個方案？」
「冇錯。」
李忠浩凝視郭伊絲，只見對方雖然神色憔悴，但眼神依舊堅定，不由得嘆了口氣。
「我一直都諗緊一個問題......你喺當選執政官嘅時候就已經講過，你希望搵到令外面嘅戰爭停止嘅方法，當時我哋冇人認真看待你講嘅嘢，直到你突然召開緊急會議，我哋先知道你係認真。你點解突然間會有咁嘅諗法？」
「因為我喺讀取前線送過嚟嘅喪屍嘅記憶時，先見識到呢場戰爭有幾咁慘烈......你哋都應該知道，當你嘗試讀取記憶時，對方生前嘅所思所想會毫無保留咁進入你腦海，令到你感受到佢哋死前係幾咁痛苦同絕望。我唔希望同見到咁嘅畫面，所以先會咁樣講。」
「如果只係因為咁嘅原因，你可以將讀取記憶嘅任務交畀其他人做，你根本唔需要獨自去承受。」
「咁樣同逃避現實有咩分別？」
「黑沙圍要存在，就必然要犧牲其他人！」
「呢個唔係我建立呢條村嘅目的！我決定去保護人類嘅時候，我係希望藉住咁做去同人類表達，並唔係每隻喪屍都會攻擊人類！」
「所以呢個唔係就係問題所在喇咩？當你話要去『保護』嘅時候，唔係就假設咗一個會受攻擊嘅群體，即係人類，同埋另一個會攻擊人類嘅群體——喺戰爭爆發前係喪屍，戰爭爆發後就係唔止喪屍，仲有人類。如果冇敵人嘅存在，根本就唔存在保護呢回事。亦即係話，黑沙圍嘅存在本身係要以敵人嘅存在為前提，如果你執意要令『敵人』消失，咁即係要令黑沙圍消失，因為僅僅係黑沙圍存在嘅呢個事實，就已經會不斷咁製造新嘅敵人！」
「咁樣嘅話......」郭伊絲咬著牙，「咁樣嘅話，黑沙圍嘅存在本身就係一個錯誤！」
此話一出，眾人嘩然，直至法官不得不要求眾人肅靜，這才慢慢的安靜下來。李忠浩要的就是這種效果。他像得勝者般，微笑地向法官道：「法官閣下，我冇嘢問喇。」
「辯方，請作結案陳詞。」
「......我當初去召集其他志同道合嘅人嘅時候，只係想好好咁運用控制喪屍嘅能力去拯救人類，我希望用咁嘅方法，可以創造出一個人同喪屍共存嘅空間......但我冇諗過，最後呢個空間嘅存在，反而就係造成人同喪屍衝突嘅源頭。或者呢一切都要歸因於喪屍必須要食人為生嘅事實......如果我一早就了解呢一點，而我可以選擇嘅話，我寧願做一隻普普通通，冇任何思考能力嘅喪屍。」
法官引導陪審團後，村公所的大門將被鎖上，讓在內的議會成員在不受干擾的情況下討論。關於背叛罪，由於案情十分嚴重，所以採用超級多數制，要郭伊絲罪名成立或不成立，均需要九成，即30票或以上的有效票數。陪審團會議上，為了無罪判決，郭伊騏正費盡唇舌，不斷游說陪審團。