《伙記唔該落單》: 第十四章「訪客」

雖然唔知沛霖到底有咩企圖，不過都係上嚟食餐飯，應該冇事掛。

收工之後，我就帶住沛霖返屋企。

「你住邊架？」沛霖問我。

「華心邨。」

「哦...都幾近我！」



「你住邊？」

「我住華明！嘻嘻！」

又真係幾近嘅，五分鐘路程。

「喂，沛...沛霖。」

「嗯？做咩呀？」



「我想問好耐，點解你好似...」

「突然之間變咗第二個人咁。」

第一次見沛霖嗰陣，明明成個人散發住一種好串嘅氣質，但係過咗幾日，又變到好易相處咁。

「變咗第二個人？點解咁講？」

「咪..你第一次嚟食嘢嗰陣。」



「明明好巴渣，又好串嘴。」

「後來又變到而加咁..咁..」

屌，唔知應該點樣形容。

「喔？原來指呢樣...」

沛霖摸一摸下巴，若有所思咁話。

「嗯...其實係因為你。」

因為我？關我咩事。

「本來我覺得你好黑人憎。」



「句句窒住曬咁。」沛霖望一望我。

對住你，好難唔句句窒住曬啫。

「但係！」

「有一日我見到你扶住一個老人家。」

「好細心咁照顧佢。」

唔通沛霖講緊婆婆？

「咁所以呢？」我問。



「所以咪覺得...你..」

「你..你都唔係想像中咁壞啫..」

哦，原來係咁。

但其實我真係好壞，又打交又食煙。

「所以你就覺得我好好仔，想溝我。」

對唔住，我份人係咁直接架喇哈哈。

「咩喎，我想了解多啲你咋嘛...」

「點知俾埋個電話你都唔搵我。」沛霖扁住嘴，扮曬無辜咁望住我。



大姐，如果個個都俾個電話我，我咪好忙。

「咁係因為...」講到一半，我又冇講到。

可能係唔想同佢坦白我嘅身世。

「都係冇嘢。」

「因為咩啫，講啲又唔講啲。」

「喂到街市喇，我要買餸。」

沛霖見我唔想講，就冇再追問落去。



「你平時都係咁樣買餸煮嘢食比婆婆架？」

「係呀，我同婆婆兩個人住。」

我一路睇下有咩菜靚，一路同沛霖講嘢。

「哦...咁你都幾孝順喎。」

「還好啦，我唔煮嘅話婆婆邊有嘢食。」

我留意到沛霖偷笑咗下，唔知笑乜。

「你有冇嘢想食？」我問沛霖。

「我冇所謂呀，你決定！」

於是我就買咗一斤白菜，雞翼同一磚豆腐。

「你諗住整咩食呀？」

「上到去你咪知。」

可能太耐冇同女仔一齊行，有啲唔慣。

返到屋企，我就見到婆婆睇緊電視。

「婆婆，我返嚟喇。」

「喔..乖孫...咦..呢個係邊個嚟架..」

「佢係..」

當我想話沛霖只係我一個普通同學嘅時候。

「婆婆你好！我叫沛霖呀！」

沛霖坐咗去婆婆隔離，搭住佢喺度笑。

之後沛霖就不停撩婆婆傾偈。

「婆婆！你好鍾意睇電視劇架？」

「我都有睇架！」

「你鍾意睇邊一套呀！」

洗唔洗咁熱情，你究竟係想同我食飯定想同我婆婆食飯。

不過見佢哋傾得幾開心，我就費事出聲。

跟住我就去咗煮飯。

煮到咁上下，沛霖就入咗廚房。

「做咩入嚟，唔係同婆婆傾得好開心咩。」

「想睇下你煮成點呀嘛嘻嘻。」

「你煮咩呀？」沛霖哄埋嚟問。

「烚菜、雞翼同蒸豆腐。」

「幾好呀，清清淡淡。」

過咗陣，我就煮好曬所有嘢。

「婆婆，食飯喇。」

「喔..霖霖..我哋粗茶淡飯..唔好介意呀..」

「揀杯嘢飲都揀十秒嘅人。」

「難講。」我笑咗笑。

沛霖聽到我咁講就睥咗我一眼。

「婆婆！食條菜！」沛霖夾咗條菜比婆婆。

「喔...唔該...」

「好唔好食呀婆婆！」沛霖笑笑口咁問。

「好食...梗係好食...」

沛霖望一望我，又繼續同婆婆傾偈。

食咗一陣，婆婆突然問咗條好爆嘅問題。

「乖孫..幾時識咗個女朋友仔架..」

我聽到女朋友仔呢幾個字之後打咗個突，本來諗住解釋清楚。

但係見婆婆好似幾鍾意沛霖咁，如果我話沛霖唔係我女朋友，可能婆婆會唔開心。

於是我就冇澄清到。

「呃..早幾日囉..」

我好無奈咁望住沛霖，呢個衰妹就對我伸一伸脷。

「咁就好囉...」婆婆笑住咁講。

好耐都未見過婆婆笑得咁開心。

呢個沛霖究竟有咩魅力。

好快就九點，婆婆都要沖涼，我就話送沛霖落去。

婆婆企喺門口，望住喺走廊嘅沛霖。

「霖霖..多啲上嚟呀...」

「佢唔係成日都得....」

個閒字都未講到出口，沛霖就打斷咗我。

「冇問題！婆婆鍾意嘅話！幾時上都得！」

我真係屌你。

「喂，你唔係真係諗住成日上嚟掛？」我挨住部𨋢問。

「婆婆鍾意都冇計架～」

「.........」

最後，我送咗沛霖去華明商場。

「今日多謝你。」沛霖微笑咁同我講。

「得啦得啦，我走喇。」

「喂！咪住！」沛霖拉住咗我。

「拎你部電話比我！」

「你想點....」

沛霖突然喺我褲袋拎咗部電話出嚟，然後打咗比佢自己。

「搞掂！咁我就有你電話！呵呵！」

好撚賤。

「咁都得.....」

「車！邊個叫你唔主動搵我。」

「......」