《伙記唔該落單》: 第十五章「躲避」

今日雖則唔洗返工，但夜晚要去華明幫龍哥做嘢，所以我趁晏晝仲得閒，陪下婆婆。

「去飲茶好唔好呀。」我問婆婆。

「喔...好呀好呀。」

婆婆笑起上嚟，真係好可愛。

唔知呢個笑容，我仲可以望幾耐。



我換好衫，就同婆婆落去飲下午茶。

「女朋友仔呢...佢嚟唔嚟呀...」

「婆婆...佢唔得閒呀。」

「喔...唔緊要...」

睇嚟婆婆真係幾鍾意沛霖。



「想食咩呀？」

我拎起點心紙，開始睇下有咩好食。

「婆婆今日想食叉燒包...」

「叉燒包呀？好呀，嗌一籠大嘅俾你！」

只要婆婆想食，我都會盡量滿足佢。



「慢慢食呀。」我摸一摸婆婆背脊。

飲到四點幾，我就同婆婆去街市買餸，今晚同婆婆食埋飯，我就要出去。

希望冇咩意外。

返到屋企，婆婆話有啲攰，就上咗床瞓教，而我就出咗後樓梯食煙。

「嘶......呼..........」

其實有時我抖氣會好辛苦，啫係頂住頂住咁，我知係食煙累事，但我又戒唔到。

冇計啦，食咗咁多年，話戒就戒咩。

突然有人打俾我。



沛霖？

「喂。」

「杰仔！係我呀！」

「我知道係你，電話有寫。」

「呵呵，你做緊咩呀？」

「食緊煙囉。」

「又食煙..唔好食咁多啦...傷身呀...」



呢句嘢，讀中學嗰陣已經成日聽，嗰陣雪寧知道我有食煙都好唔鍾意，但係佢冇逼我戒，只係間唔中叫我食少啲。

「得啦，唔洗你操心。」

「喂喂喂，聽晚得唔得閒？」

「聽晚？得閒嘅，做咩。」

「可唔可以同我出街？」

「唔好喇掛。」

「明明你話我係你女朋友仔！」

「屌咩...嗰陣婆婆喺度呀嘛。」



「咁..咁..我唔理呀！總之你要陪我！唔係我就日日上去你度！之後同婆婆講你對我好差！」

出到呢招，你都幾仆街下。

「唉得啦，你鍾意，唔好搞我婆婆。」

「yeah！咁聽晚六點粉火等啦！」

「得啦，係咁，拜。」

「喂...！」

跟住我就收咗線。



老實講，真係唔太想再約女仔。

我好怕會再傷害人。

喺後樓梯企咗一陣，我就返入屋煮飯。

「婆婆，食得飯喇。」

「嗯...」我慢慢扶起婆婆。

食緊飯嘅時候，我就同婆婆講一陣要出去。

「婆婆呀，一陣呢...我約咗女朋友仔。」

「今晚好夜先返，唔洗等我門喇。」

我笑一笑，捉住婆婆隻手。

「去啦去啦...後生仔..拍下拖啦...」

「幾時再帶霖霖上嚟呀...」

「呃..過幾日啦過幾日。」

「嗯...婆婆我好掛住佢喔...」

真係冇曬符，早知唔應承沛霖俾佢上嚟。

而加真係一發不可收拾。

七點半，我就出發去華明。

「喂？」

「咩料。」

「八點華明喎。」

「行緊出嚟啦。」

「喺鋪頭等埋一齊再行過去？」

「是但。」

「咁鋪頭見，拜。」

子彈真係好驚我會賣甩佢。

七點四十五分左右，我就喺鋪頭見到子彈。

「喂。」

「而加過去？」我問。

「食枝煙先行過去。」

我同子彈食咗枝煙，就過咗球場。

「覺唔覺條街冇咩人？」我問。

明明只係八點，但係街上面嘅行人少得有啲奇怪，發生咗咩事。

「啲人喺屋企食緊飯掛。」子彈聳一聳肩話。

我哋好快就行到華明球場，通常呢個球場喺七點就會熄燈，所以球場漆黑一片。

「龍哥呢？又話叫我哋做嘢。」

「應該就到掛。」子彈都唔知。

我同子彈企喺球場其中一邊嘅龍門後面，因為呢個係五人場，所以好細個，而且得兩個入口。

而入口正正就係嗰兩個龍門。

「喂，嗰度係咪有個箱？」子彈話。

隱隱約約咁見到球場中間，擺咗個紙皮箱。

「去睇下係咩嚟。」

於是我同子彈望一望周圍，就行咗埋去。

子彈企喺度睇水，而我就踎低打開個箱。

打開咗之後，入面有兩把牛肉刀。

「唔係要劈友掛？」我問。

「但龍哥冇咩仇人，都唔會主動同人哋開拖。」子彈同我講。

咦，咪住。

「箱入面仲有一張紙。」

我就拎咗張紙出嚟睇。

咚咚咚咚咚咚咚............

突然兩邊龍門後，傳出一陣急促嘅腳步聲。

Enjoy the game


「弊，中伏。」