我慢慢睜開雙眼,發現子彈已經唔喺度。

「醒拿杰少?」嫻姐拎咗碗麵俾我。

「子彈呢?」

「佢半個鐘之前走咗喇,我叫佢返屋企休息下。」

望一望鐘,原來已經八點。



而加返學都返唔切,索性走堂返工。

「嫻姐,我今日留喺度幫手啦。」

「你唔洗返學咩?」

「要呀...但都遲到...唔緊要啦。」

嫻姐望住我笑咗笑,之後就話。



「傻仔,你都返去抖下啦,雖然琴晚唔知你哋發生咩事,但你應該都好攰架喇。」

「有我同雄哥喺度,放心。」

「咁好啦,多謝嫻姐。」

我食完碗麵,就行返屋企。

臨走前我特登換咗件擺喺鋪頭嘅衫,掉咗琴晚嗰件血淋淋嘅t-shirt。



費事俾婆婆見到啦。

已經攰到仆街,仲醒起原來今晚約咗條𡃁妹。

「唉屌,返去再瞓過。」

唔瞓唔知身體好。

「乖孫...今日放假呀?」

「嗯...係呀,食咗早餐未呀婆婆。」

「頭先落咗去買粥食嘍....」

老人家日日都可以自動早起,好佩服。



於是我沖咗個涼,然後攤上梳化瞓教。

瞓到四點幾,就俾個電話嘈醒咗。

「喂.........」

「Hello!係我呀!」

「啊...咩事........」

「點解你好似咁攰咁嘅?」

「琴晚劈友嚟....」



仆街,做乜講咗出嚟。

「下?劈友?咩劈友?」

電話另一邊嘅沛霖似乎好驚訝。

不過,劈友喎屌,係人都驚訝啦。

「哦冇..我話劈酒啫...」

「嚇死我咩...你成日去飲酒架?」

「一時時啦....」

「哦...唔好飲咁多啦....對身體唔好架..」



「嗯.....」

「呀係喇!你記得今晚約咗我架可?」沛霖帶點興奮咁問。

「嗯。」因為好攰,冇咩力講太多嘢。

「咁就好喇!一陣六點粉火見啦!唔可以甩我底架!我會好唔開心架....」

「唉得啦得啦..一陣搵你,拜。」

「喂...!」

我又cut咗佢線,一嚟我好撚攰,二嚟我覺得無謂講其他嘢啦。



「洗個頭先。」

喺廁所入面,我一直反覆思考龍哥為乜要陷我同子彈於不義。

而且,我又唔識龍哥,點解會燒埋我嗰疊。

諗咗好耐都係諗唔明。

「婆婆,我今晚約咗人呀,呢度二百蚊,你一陣想食咩就買啦。」

「喔...好呀...約咗霖霖呀...」

「係呀。」

「去啦去啦!拖實女朋友仔呀!」

我搖頭笑咗笑,就換衫準備出去。

六點零五分,我就行到粉火天橋,沿途見到個老伯伯乞衣,就俾咗十蚊雞佢。

我知有可能會俾人呃,但係我覺得佢哋好慘。

幾十歲仲要出嚟坐成日,喺度乞食。

「喂!杰仔!」沛霖已經到咗。

我冇應佢,係咁易點咗下頭。

今日沛霖著咗件米白色t-shirt同黑色長牛仔褲,加埋對new balance,十足十啲乖學生咁。

「噗,咁mk嘅你件衫。」沛霖掩住嘴笑我。

「冇計,我係得呢啲衫。」

「嗯...一係咁!食完嘢同你去買衫!」

「唔洗啦,我大把.....」

我都未講完,沛霖已經翹住咗我,然後行落商場。

「我哋去食咩好呀?」

「你鍾意,我冇所謂。」

「咁呀...嗯....食壽司?」

「好,你想食就食。」

之後沛霖就拉咗我去元氣。

「咁多人嘅....要等十張枱...」

「你想唔想等。」我問。

「其實..我有啲肚餓嘻嘻,不如去隔離食茶餐廳?」沛霖問我。

「好,你喜歡就好。」

去到茶記,都叫做有位坐嘅,所以我哋就坐低咗,然後沛霖就開始睇menu。

「你唔睇下食咩嘅?」沛霖問。

「我食揚州炒飯。」我托住頭咁講。

「咁快諗好嘅...我仲諗緊...」

「慢慢諗啦,至少你未叫個伙記埋嚟寫嘢。」

沛霖放低個menu,然後嘟起嘴望實我。

「喂呀..唔好咁啦...嗰陣我都唔想架嘛...」

屌,佢而加呢個內疚樣,其實都幾得意。

「講笑啫,我冇擺喺心。」

「係咪架...唔可以偷偷哋憎我架喎...」

我反咗下白眼,然後就係咁點頭。

「伙記,唔該落單!」