《伙記唔該落單》: 第十八章「了解」

喺等嘢食期間，沛霖就撩下我傾偈。

「你而加有冇讀書架？」沛霖托住下巴，眼仔碌碌咁望實我。

「有，讀緊大學。」

「真架？你都讀到大學？」沛霖好似好驚訝咁。

不過都正常嘅，睇我個樣都唔似啲會讀書嘅人，但事實我又真係考到大學。



「係呀，係咪好唔似。」

「少少啦，你個款咁似啲古惑仔，你話你讀到大學，我都猶豫咗兩秒，嘻嘻。」

我笑咗笑，因為都慣咗俾人咁講。

「咁你？讀緊中幾。」我問沛霖。

「中六！喺華嶺中學讀緊！」



「我知，見到你套校服。」

我中學都喺華嶺中學嗰頭，但係隔咗幾條街。

「不過你唔似中六喎。」我打量咗沛霖幾眼。

「邊忽唔似呀...明明我咁成熟。」

身材係幾似嘅，但個樣好細個。



「你鍾意啦哈哈。」

沛霖有啲無奈咁睥住我，然後鍊咗我隻手一下。

過咗陣，啲嘢就嚟咗，我哋就開始食飯。

食食下，我忽然諗起一個問題。

「你係咪冇男朋友？」

其實應該係冇嘅，沛霖咁主動想識我，又上嚟我屋企食飯，如果有仔都唔會咁。

不過都係要確認下，以免有咩誤會。

「冇..冇呀..做咩？」沛霖突然有啲面紅。



「哦，得個知字啫。」

「你...想做我男朋友？」沛霖望住我問。

「唔係...純粹問一問，冇咩特別意思。」

沛霖有啲失望咁點咗下頭。

其實同佢做朋友都還好，但下一步發展就免啦，我真係唔想再hurt多個女仔。

「呀...係呢，你平時...鍾意做啲咩架？」

「瞓教同返工。」我飲咗啖奶茶就講。



「冇其他興趣咩？唔悶架你？」

「冇喎，都慣咗。」

我由細到大都同班飛仔周圍躝，唔係去波地踢下波，就係坐喺停車場後樓梯吹水食煙。

邊到有咩興趣。

「嗯...好啦！」沛霖瞇埋眼笑咗笑。

都幾佩服佢肯主動了解我，平時學校啲同學見到我咁得人驚，講唔夠兩句就調頭走。

「食飽未呀，同你去買衫！」

「都話唔洗....」



「要嘅要嘅！嚟啦我哋去隔離睇下！」

之後沛霖就拉住我去睇衫。

「baleno...？唔好喇掛...」

啲衫好毒啫，出街又易撞款。

「哎呀睇下先啦！！你而加著嚟著去都係嗰啲mk衫，唔係黑色就灰色，係女仔都驚你啦！」

我都唔care，不過佢一番好意，就姑且陪下佢癲。

「過嚟過嚟！呢件好唔好睇？」沛霖拎起咗一件衫，雙手揸住兩個袖，好似啲sales咁問我。



「不了。」

「嗯...咁嗰件呢！」佢又拎咗第二件衫。

「唔靚。」

「呢件啱心水喇掛！」

「..........」當我小學生咩大姐。

「喂呀...件件都唔鍾意....」沛霖嘟起嘴，有啲唔開心咁講。

本來我想話叫佢唔好咁麻煩。

但係見到佢個樣好無辜，又肯花時間幫我揀衫，咁樣話佢又好似好衰咁。

「呃...一係...要嗰件啦。」我求其指咗件衫。

「呢件！？好呀你快啲笠上去試下！」沛霖又笑返，然後拎咗件衫俾我試。

我照一照鏡，發現都唔錯，不過人靚著咩都靚，呵呵。

「都幾靚仔呀....」沛霖好似個呀媽咁，企喺我前面幫我整下件衫，又拍下我心口，拉下啲衫領咁樣。

「係咩，咁我要呢件啦。」

「你除出嚟！我幫你拎住先！你再睇下有冇其他衫想要！」

究竟佢真實身分係咪一個sales嚟。

最後我買咗五件衫，洗咗四百蚊。

點解會咁。

「有新衫著開唔開心先！」我同沛霖行返華明，沿途佢就笑住咁問我。

「ok啦，我好少出街，唔洗要咁多衫。」

「你唔洗約朋友架咩？」沛霖有啲好奇咁問。

我搖搖頭。

「我冇朋友。」

沛霖望咗我幾秒，然後若有所思咁皺起眉頭。

「咁就等我做你第一個朋友！」

唔係掛，我有冇聽錯。

不過都冇壞嘅，做朋友啫，又唔係做情侶。

「你鍾意嘅我冇咩所謂。」

沛霖雙手擺喺心口，甜笑咗下。

乜而加啲女仔咁易開心。

「你到喇，我返去。」

我轉身走嘅時候，沛霖叫停咗我。

「喂...！杰仔！」

「咩料。」

「聽晚...我可唔可以上去你度...」

「.........」又嚟，吾系甘牙。

「得唔得呀....」沛霖好似個細路女咁望實我。

「唉你鍾意啦....」

「真嘅？！好耶！！！」

都冇得say no啦，我覺得就算我話唔好，佢都會自己上嚟。

反正婆婆又幾鍾意佢，俾沛霖上嚟食個飯都冇壞嘅。

「係呀係呀....拜拜。」我頭也不回就走咗。

因為沛霖仲自high緊，都費鳩事理佢。