就嚟midterm,所以我都要係咁易聽下書,雖則話我唔太著重成績,但起碼都要pass曬。

過幾日仲要交assignment,我真係屌出聲。

「remember you guys need to make a video and hand in before friday。」

make咩video呀屌,冇聽過嘅喂。

我睇一睇個outline,原來除咗交論文之外,仲要剪條片介紹香港美食,不過搵有咩美食簡單,剪片難呀屌。



捱咗成日又到三點半,終於放學,於是我就搭火車返粉嶺買餸煮飯。

係喎,今晚條𡃁妹又會上嚟。

「一斤菜芯。」

「見你咁靚仔,送多兩舊薑俾你!」

靚仔真係好。



「廿五蚊梅頭,要瘦啲。」

買多兩舊節瓜,應該夠餸嘅。

「婆婆,我返嚟喇。」

「婆婆?」

望一望廳,婆婆唔喺度,再睇一睇碌架床,原來婆婆瞓緊教,於是我就去煮飯,煮煮下飯,電話又響起。



「喂?」

「杰仔!你樓下密碼係咩呀!」

沛霖個衰妹又會咁快到,五點幾咋喎。

「R8964。」

「唔該!我到你樓下喇!而加上嚟!」

「好。」我收咗線,繼續煮飯。

我洗一洗手,就出去睇下婆婆。

「奇怪,瞓咁耐嘅。」



我摸一摸婆婆,發現佢好似冇乜氣息。

「婆婆!」

我輕輕搖一搖婆婆,佢都未醒。

唔係掛。

「婆婆!」我好大聲咁叫咗嚟。

過咗幾秒,婆婆先慢慢睜開眼。

呼,嚇死我咩。



我冇同婆婆講佢頭先瞓得太舒服,搞到我以為佢有咩事。

因為我唔想嚇親佢。

「係呀,一陣呢...沛霖會上嚟。」

「咁好呀...呵呵...真係乖.....」

我鬆一口氣,就起身去繼續煮餸,呢個時候有人㩒門鐘,應該係沛霖嚟。

卟嚓。

「hello!」沛霖同我揮揮手。

於是我就開咗門俾佢。



「入嚟啦。」

「婆婆!你好嗎!」沛霖除咗對黑色護士鞋,就坐咗喺婆婆隔離。

「霖霖..咁乖上嚟食飯呀...」婆婆笑得好開心。

「係呀!!呀杰叫我上嚟一齊食飯架!」沛霖望住我,笑咗一笑。

大姐,唔好屈得就屈,不過見佢又氹得婆婆幾開心,我都冇理到,就去煮埋啲餸。

二十分鐘之後我煮好曬所有嘢,就拎出廳叫佢哋嚟食飯。

一出廚房,見到沛霖同婆婆傾偈傾得好開心。



呢條女都幾犀利,有時真係不得不佩服佢。

「食飯喇。」我放低碟菜喺飯枱。

「婆婆!有得食飯喇!」沛霖捉住婆婆隻手,慢慢扶佢起身。

我有啲感慨咁笑咗下,就入去廚房拎埋啲碗筷。

見沛霖著住校服,應該係直接喺學校過嚟。

「婆婆,食舊瓜啦!」沛霖夾咗舊瓜俾婆婆。

「哎喲唔該唔該...你都食多啲呀....」

「霖霖你咁瘦,要食多啲先好睇架...」婆婆摸一摸沛霖塊面,搞到沛霖有啲怕醜。

「佢成日都唔食嘢。」我笑咗笑。

沛霖即刻睥住我,我唯有聳一聳肩,之後就繼續食飯。

「話時話,做咩唔返屋企換衫先上嚟。」我望住沛霖條校裙問。

「咁關心我嘅?」沛霖甜笑咗下。

「食s...冇,我都係問下啫。」

差啲爆咗句食屎出嚟,嚇死我。

「呵呵,冇呀我今日要補課同埋做pastpaper嘛!」沛霖側一側頭咁講。

哦,係喎佢今年中六,出年應該都要考dse,呢個時候開始操卷都差唔多。

「婆婆,食條菜。」

婆婆突然縮咗下,之後就話。

「你..你係邊個....」

我冇表現得好驚訝,反而沛霖就一頭霧水。

「我係嘉杰呀...你個乖孫呀。」我笑咗笑。

「嘉..嘉杰.....喔....乖孫.....」婆婆又認得返我。

間唔中會出現呢啲情況,我都見怪不怪。

沛霖伸個頭埋嚟我耳邊,靜靜雞問我。

「頭先婆婆唔記得你呀....?」

「係呀,有時會,我都慣咗。」

「七十幾歲啦,有啲腦退化,好正常。」

「哦...」沛霖有啲擔心咁望住我。

其實我預咗有一日,婆婆會完全唔記得我。

不過,趁婆婆仲知我係邊個,我要多啲陪佢。

呢個都係我選擇單身,唔拍拖嘅原因之一。

「我去洗碗啦!」沛霖食完飯就話。

「唔好啦...點可以要你洗架....」婆婆話。

「唔緊要架唔緊要架!我冇所謂架!」沛霖捉住婆婆隻手,雙眼眯成一條線咁笑咗笑。

「係咪呀?」沛霖望一望我。

「你..你想洗就洗。」

於是我就扶婆婆去梳化睇電視。

跟住我就出咗後樓梯食煙,諗住食完煙就拎部notebook出嚟剪嗰條所謂嘅美食video。

我食完煙返入屋,見到廚房入面嘅沛霖,覺得佢有幾分雪寧嘅影子。

又係好乖、好可愛、好孝順。

睇住佢有啲雞手鴨腳,洗洗下碗跌咗隻碟落洗手盤,擠洗潔精又擠得太大力,噴咗落條圍裙度。

「真係....」我搖一搖頭,笑咗出聲。

我打開notebook,諗住整嗰條片,但係我無從入手。

條片過幾日就要交,而我係完全唔識剪片。

「點搞。」我望住個movie maker,坐撚咗喺度。

「杰仔!你做緊咩呀?」沛霖洗完碗出嚟,用毛巾抹一抹對手,就烏低個身喺隔離望住我部電腦。

「做assignment。」

「睇下先....咩嚟架....你要剪片呀?」

「係呀。」

「你唔做嘅?唔識做呀?」

「呃..」我唔知點答佢好。

「噗,要唔要我幫下你呀?」沛霖問。

「你識呢啲嘢咩。」我望一望沛霖。

「哼!我梗係識啦!我讀ICT架!剪片呢啲濕濕碎啦。」沛霖好自信咁講。

於是我俾咗個outline沛霖睇,佢睇完之後就叫我讓個位俾佢,而我就企咗喺側邊睇。

「拿...搵咗啲相同短片先....跟住喺維基百科搵啲資料.....咁樣擺上去....」沛霖好熟手咁將所有嘢擺曬落去嗰條bar度。

本來以為佢係諗住教我,點知半個鐘之後。

「搞掂!你睇下得唔得!」沛霖拍一拍手。

唔撚是掛,佢竟然幫我剪咗成條片。

我呆住咗,因為我完全估唔到佢會幫我做曬。

「喂!做咩呆曬咁呀!」

「沛...沛霖...」

「嗯?」

「多...」

好難講出口,屌。

「多.....」




























「多...多謝你。」

「噗,洗乜客氣。」