自從上次我同子彈俾龍哥跣完一鑊,之後都冇咩大事發生,嗰三條𡃁妹keep住嚟食lunch,沛霖有時又會上嚟同婆婆傾下偈。

生活都尚算平靜。

唔經唔覺,原來都識咗沛霖三個幾月,十六歲之後都好似冇試過同女仔咁多接觸。

「喂?杰仔?你今日得唔得閒呀?可唔可以陪我出街?」沛霖喺朝早九點嗰陣打嚟問我。

「我今日唔得閒喎,有啲嘢做。」



「係呀...咁唔緊要啦!遲啲再約你!」

「你下個月唔係考mock喇咩?仲有心情出街。」

「咁讀書之餘都要輕鬆下架嘛!」

「係..喂唔講住喇,我要出去。」

「好啦!拜拜。」



講明先,我唔係有心推佢,我今日的而且確係有嘢做。

最近婆婆唔記得我嘅次數多咗,有時仲會唔記得沖廁,又話睇嘢開始有啲朦。

於是我趁今日放假,陪婆婆去咗北區醫院做身體檢查,雖則話人老咗自然會多毛病,但始終我都係有少少擔心。

「婆婆,凍呀著返多件衫。」我喺衣櫃拎咗件羽絨出嚟俾婆婆披住。

其實十二月中唔算好凍,我著兩件衫都覺得夠,但老人家身子弱,著多幾件衫好啲。



「其實唔洗去檢查...我哋呢啲老嘢...」婆婆沿途就不停同我講佢唔洗做身體檢查。

「唔得,要定期做下檢查先好架。」我扶住婆婆,慢慢由上水火車站行去北區醫院。

十一點左右,我哋就到咗醫院。

「唔該..book咗十一點半做檢查,姓黃嘅。」我同詢問處個姑娘講。

「好等等呀...坐低等嗌號碼。」姑姑俾咗張號碼籌我,我就同婆婆坐低等。

「黃妙雲。」

「婆婆,入得去喇。」

入到房,坐咗個大約四十幾歲嘅女醫生。



我哋坐低咗之後,醫生就係咁易循例問咗幾句,之後醫生就叫婆婆照X光呀、驗尿呀之類,都係嗰啲大路嘢。

而我就喺側邊陪住婆婆。

一個鐘之後就check完,但要等三個禮拜先知結果。

臨走前,婆婆話想去廁所,於是我扶完婆婆去廁所,就企喺走廊等佢,咁啱個醫生出咗嚟。

「梁生?」

「係。」

「方唔方便講兩句。」



「可以,隨便。」

醫生望一望女廁,之後就細細聲咁話。

「你係黃女士個孫?」

「係呀,做咩?」

「如果你唔介意嘅話,我想問一問黃女士除咗你之外,仲有冇其他親人?」

「冇喇,得返我一粒孫。」

未聽過老母話佢有兄弟姊妹,不過老母可能有提過,只係我唔記得。

「咁樣....就咁嘅...就....」



「有嘢可以直接講。」

「呃..黃女士佢身體情況有啲唔樂觀。」

老實講,頭先醫生口窒窒咁款,我都估到佢係想同我講呢樣嘢。

「我明白。」

「嗯,所以我先問一問黃女士有冇其他親人。」醫生雙手插袋,皺起眉頭。

「好坦白講,黃女士有機會喺呢一兩個月之內,完全唔記得你。」

雖然我都有定心理準備,但我聽到「完全唔記得」呢五個字,個心都痛咗一下。



因為我唔想呢一日咁快嚟到。

「呼,我知道,我都預咗會咁。」

「嗯...我都相信你係啲識諗嘅人,咁啦,份詳細報告出咗,我就會再約你哋嚟。」

「唔該醫生。」

醫生拍一拍我,就入返房。

婆婆去完廁所,我就同婆婆搭的士返屋企,我怕佢出咗街咁耐會太攰。

二十分鐘左右,我哋就返到屋企,我扶婆婆去碌架床坐低,然後幫佢除褸。

「婆婆,今晚想食咩呀。」

「嗯...冇所謂......」婆婆好似有啲攰。

我嘆一嘆氣,就捉住婆婆隻手。

「咁啦,你瞓下先,我去買餸好唔好?」

「好.......乖孫....」婆婆摸住我塊面,欣慰咁望住我。

婆婆瞓著之後,我就落咗街買餸。

我點起一枝煙,挨住後樓梯道門。

又諗返起細個婆婆辛辛苦苦湊住我嗰個樣。

生老病死,係人生必經階段。

每人都終有一別。

呢個係事實,從來冇人改變到。

我只係希望呢一日,唔好咁快嚟。

俾我陪你耐多一陣。

可以嗎,婆婆。