「婆婆,我返工喇。」

唔知呢句說話,我仲可以講幾耐。

因為醫生提早咗聯絡我,

話婆婆有肝癌,而且,

係晚期。



呼。


















最近天氣開始轉涼,街上面嘅行人都著多咗幾件衫,但我都係就咁一件短袖加一件外套。

沛霖佢哋依舊中午一點鐘就嚟食嘢,收銀隔離張圓枱基本上日日都係佢哋三個霸住。



今日嚟咗個客,熟口熟面。

但我又嗡唔出佢係乜水。

「唔該寫嘢。」

「食啲咩呀哥仔。」

「嗯...有冇雞扒腸仔飯?」

「有,飲咩?」

「飲可樂呀,唔該。」



我幫佢落完單之後挨咗喺收銀,望一望個男人嘅身型,有啲似運動員。

呢個時候午間新聞咁啱播到體育快訊。

「香港超級足球聯賽第七輪,太陽飛馬作客以五比零大勝港會,卓樂言連中三元,大演帽子戲法,加上大衛拉菲爾.......」

喔?個七號咁似頭先雞扒腸仔飯嗰個男人。

我再睇清楚啲,原來真係佢嚟。

「喂喂喂...佢咁似我哋個師兄嘅?」敏怡喺呢個時候指住個男人。

「就係嗰日周會,師姐分享嗰個男仔?」沛霖問。

「係咪佢嚟架?大隻咁多嘅?」嘉瑩又問。



原來雞扒腸仔係佢哋師兄嚟,不過粉嶺有幾大,嚟嚟去去都係嗰幾間中學。

「聽日考數學喇...點算好...」嘉瑩托住下巴,表情就好似唔見咗張中頭獎嘅六合彩飛一樣。

「我都未溫曬哈哈。」沛霖笑一笑。

「車,你叫杰少教你囉,係咪呀?」敏怡望住我問。

「關我咩事...」

「你知唔知呢...其實沛霖數學好屎架咋..」

「喂呀唔準講出嚟呀!!」沛霖即刻掩住敏怡把口,兩條女玩完一大輪先肯停手。



我無奈咁笑一笑,就出咗去食煙。

「喂。」子彈都出咗嚟。

「你又出埋嚟?」我望一望鋪頭。

「有嫻姐睇住,唔怕啦,想同你吹下水啫。」

「屌你可唔可以唔好咁撚gay。」

「sorry sorry~」

呼。

「唉。」我挨住牆,嘆咗一口氣。



「做咩呀又。」

「我婆婆就嚟唔得。」

「........」

「個心有少少嗱住嗱住。」

「我明喎。」子彈拍一拍我。

「你又明啲咩。」我已經有啲忍唔住想喊。

「早兩年我呀嫲又係咁,腦退化,落完街唔識返屋企,有次搵咗佢成日先搵到。」

「後來仲驗到有cancer,幾個星期就走咗。」子彈呼一口煙,望住馬路苦笑。

「嗯。」

「老人家係咁架喇。」子彈笑一笑就話。

「所以,都冇得太擔心。」

我點點頭。

「總之你有咩需要,就搵我啦。」

「............」我望住個天,好無助。

「嚟啦,返入去做嘢。」

收工之後,我拎咗啲餸返屋企同婆婆食。

「今日辛唔辛苦呀.....」

「唔辛苦呀,放心!」

「咁就好喇.......」

婆婆最近唔太想食嘢,瘦咗好多,有時又會無啦啦嘔。

「婆婆..食..食多舊肉啦..」

「喔...乖孫.....」

望到婆婆個樣,我有啲想喊。

但我盡量忍住。

「呼...婆婆呀,你有冇咩地方想去?聽日我攞假陪你去好唔好?」

趁婆婆仲記得我,趁婆婆仲行到路,我想同佢去多啲地方。

「嗯....冇呀.....」

「但係呢...婆婆想食砵仔糕.....」

「聽日去買俾你好唔好?」我捉住婆婆隻手問。

「好...好..梗係好啦....」

大約十點幾,睇住婆婆瞓著之後,我先夠膽出去後樓梯喊。

我坐喺樓梯上面,一個人默默咁流眼淚。

好無助,好無助嘅感覺。

「...........」

電話突然響起。

「...喂...?」

「杰仔!好攰呀我...啱啱做咗兩個鐘頭數呀....係呢!你做緊咩呀?」

「我......冇...冇做咩。」

「你...冇嘢嘛?你喊緊...?」

聽到呢句之後,我忍唔住大聲喊咗出嚟。

「嗚.......嗚............呼....嗚....」

「杰仔...你...你冇事嘛....?!」

我抹一抹鼻涕,深深吸咗一口氣。

「嗯..咳...冇..冇事。」

「真係....?我而加過嚟睇下你啦....」

「唔洗喇...你聽日考試,早..早啲休息。」

「...真係唔洗我過嚟..?」

「嗯,你溫書啦,我冇嘢。」

「咁...咁好啦...你有咩記得同我講喎...」

「嗯。」

我收咗線之後,坐咗喺後樓梯一個鐘。

望住個垃圾桶,唔知自己仲可以做啲咩。

突然,有人推門入咗嚟。

「沛...沛霖?」我抬起頭。

「杰仔...」

「你對眼紅曬喇...仲話冇事....」

「..........」

「你又會知我喺度....」

沛霖嘆咗一口氣,就行過踎低嚟攬住我。

「傻仔,頭先打電話俾你,聽到個背景聲好空曠,所以我估你喺後樓梯。」

「嗚........」我攬住沛霖,身體不停抽搐。

「做咩呀,係咪有咩唔開心呀。」沛霖摸住我個頭,好溫柔咁問我。

「.......婆婆.......婆婆佢......」

「佢就嚟要走喇.....嗚...嗚....」

沛霖冇應我,淨係輕輕掃我背脊。

隔咗陣,沛霖用額頭貼住我塊面。

「唔好唔開心啦,婆婆佢都唔想佢見到你喊架,知嗎。」

「你要努力,陪婆婆繼續行落去。」

「應承我,好唔好?」沛霖放開我,用紅咗嘅雙眼望住我。

我望住沛霖,輕輕地點頭。

「嗯...好....好。」

「我一定會.....」

沛霖摸一摸我塊面,然後就話。

「只要你需要我,我會一直喺度。」

點解,點解你會對我咁好。












「嗯,多謝你。」

我哋再次互相攬住對方,靜靜咁過咗五分鐘。

五分鐘之後,我鬆開咗沛霖。

我送咗沛霖返華明,沿途醒起啲嘢。

「你聽日唔係考試?」

「嗯,係呀!」

「咁你仲過嚟。」

「我擔心你呀嘛...頭先見到你喊...我真係嚇親...」

「點解。」

「未見過你喊囉,呵呵。」

「..........」

「不過你流眼淚個樣,都幾吸引。」

「嗯。」我笑咗笑。







「喂,杰仔。」

「嗯?」

「你數學叻唔叻架?」

「level5,算唔算叻?」

「唔知你可唔可以......」

「唔可以。」

「喂呀!我都未講你就話唔可以....」

「噗,講笑,你屋企冇人嘅我冇所謂。」

「真嘅?咁你上嚟教我做數啦!!」

「我呢!有好多嘢都唔識....概率啦...二次方程啦...三角函數啦............」

結果我上咗沛霖到教佢做數。

就當係報答佢專登過嚟安慰我。

哈哈。