《伙記唔該落單》: 第二十八章「照顧」

「好攰....」行咗十分鐘，終於返到屋企。

雖然沛霖好輕，但係孭住佢，由聯和墟行返華心邨都有少少辛苦。

到門口嗰陣，因為我孭緊沛霖所以冇手拎鎖匙開門，所以我諗住用右手托住沛霖一隻大脾，再用第左手開鎖。

點知一鬆開隻左手，沛霖突然跣咗一跣，我情急之下，唔小心一嘢揸住咗佢個屎忽。

「啊..」搞到沛霖呻吟咗下。



仆街，對唔住。

搞咗一大輪，終於入到屋，我放低沛霖喺梳化，呢個時候佢仲未好清醒，於是我就去廁所濕條毛巾幫沛霖抹下塊面。

「做咩會飲到咁醉架你...」我一路幫沛霖抹面，一路望住佢個樣。

其實沛霖紅卜卜個樣，真係幾可愛，換咗係第二個男人，可能已經忍唔住吞咗沛霖。

「嗯....啊......啊.....」沛霖好似醒醒地。



「喂，你見點呀。」我輕輕拍一拍沛霖軟綿綿嘅面豬登。

呢個時候沛霖慢慢張開眼，然後望一望天花板，再擰轉面睇住我。

「啊..呵呵..杰仔....你喺度嘅..哈哈..」沛霖突然遞高隻手，摵一摵我塊面。

「梗係啦...呢度係我屋企嚟....」

「嗯..啊...點解我會..嗚..噁..噁...」



喂，你唔係嘔呀嘛。

我即刻沖入廚房，拎咗個垃圾桶出嚟，擺喺梳化前面，然後兩隻手捉住沛霖嘅胳肋底下面，抬起佢成個人，放咗佢喺地下。

佢而加攬住咗加垃圾桶，好似準備要嘔。

因為沛霖著緊件白色絨毛外套，我費事佢嘔到成身都係，就幫佢除咗件衫。

「做咩呀你...哈哈...」沛霖傻更更地咁望住我笑，然後又開始作嘔。

「嘔喺呢度呀喂......」

「噁...噁...」我見沛霖皺曬眉頭，好似好辛苦，想嘔又嘔唔出咁嘅樣。

於是我慢慢掃佢個背脊，沛霖就㩒住個心口，開始嘔到啲嘢出嚟。



「噁....噁.....噁....噁...」

「咳....咳....」

「係咪好辛苦呀.....」我一路掃佢背脊一路問。

「啊...啊.....嗯...」

呢個傻妹，第一次去酒吧飲酒就劏到咁款。

沛霖嘔咗幾分鐘，見佢好似嘔曬我就拎咗幾紙巾幫佢抹嘴抹鼻水，再去斟咗杯水。

沛霖而加微微張開眼，伸直咗對腳坐喺地下，然後挨住咗張梳化，於是我就餵佢飲水。



「慢慢呀....唔好濁親....」

「咕嚕...咕嚕.....嗯啊.......」

「點呀，嘔完有冇舒服啲。」

沛霖輕輕點點頭，再望住我喺度傻笑。

呢條女真係癡線。

「洗唔洗去沖個涼？」

沛霖搖搖頭。

「咁我抬你上碌架床瞓。」於是我就踎低抱起咗沛霖，擺佢上床，再幫佢除鞋除襪。



幫沛霖冚好被，處理好啲嘔吐物，我就坐喺碌架床隔離，睇佢住瞓著。

突然我醒起啲嘢，於是就拎咗佢部電話出嚟，發現佢爸爸又搵咗佢幾次。

好彩呢個世代有touch id呢樣嘢，我捉住沛霖隻手指，㩒落個home制嗰度解鎖。

「我去了同學的家 過一晚夜 明天回來」

始終覆一覆沛霖爸爸好似好啲，唔係佢實擔心死沛霖。

過咗陣，沛霖已經瞓得好冧，於是我就喺廁所食咗枝煙，就去沖涼瞓教。