《伙記唔該落單》: 第二十九章「相信」

「咁重嘅...咩事...」

我慢慢張開眼，見到眼前有個人樣喺度。

「醒拿！」

「嘩屌...嚇撚死我咩.....」

沛霖已經醒咗，佢跪咗喺地下，然後趴喺我心口上面望住我。



「我有冇咁得人驚呀。」

「晨早流流一mark大眼見到有對眼望住自己，俾著你都驚啦....」

「哼！」沛霖企返起身，然後就入咗廚房。

我發現佢拎咗我啲t-shirt同短褲嚟著。

過咗陣，佢拎咗兩碟嘢出嚟。



「去刷牙食早餐啦！」

唔知係我錯覺定咩，點解而加咁撚似嗰啲一夜情完之後，條女起身煮早餐俾仔食嘅情節。

但係明明我乜都冇做過。

「哦...」之後我就去咗刷牙。

點解沛霖飲醉酒之後，喺第二個男仔屋企瞓完都好似完全唔驚咁，仲可以淡淡定定煮早餐。



「點呀？好唔好食！」沛霖炒咗兩隻蛋同煮咗個麵俾我，食落又唔算太差。

「都唔錯嘅。」

「我煮得好辛苦架！你要食曬佢！」沛霖用手指篤一篤我塊面。

「得啦，點呀你見好啲未，琴晚你好醉。」

「嗯！而加冇咁暈喇！」

「仲有，你爸爸琴晚搵你。」

「我知道呀，你仲幫我覆埋添，嘻嘻。」

「梗係啦屌...唔見咗成晚，係人都擔心你。」



沛霖伸一伸脷，就繼續食嘢。

食食下，我發現今日原來要返工。

「仆街，唔記得返工。」我即刻沖咗去著鞋。

「喂！我幫你打咗俾子彈喇！佢話叫你喺屋企抖下！佢話鋪頭有佢就得喇！」

唔係掛，呢條女係咪癡撚線。

「好...唔該曬你...」咁我唯有繼續食早餐。

「杰仔呀...」



「咩料。」

「琴晚...多謝你...」沛霖有啲面紅，然後慢慢抬起頭望住我。

「哦，唔洗客氣，我係見你飲到醉曬，送你返華明好似唔太好，先帶咗你上嚟。」

「我呢..唔係講緊呢樣呀...」

「我係話你琴晚喺酒吧門口...救咗我...」

原來我同銘仔佢哋講嘢嗰陣，沛霖仲有意識嘅。

屌，咪住。

咁佢咪聽到曬我同銘仔講啲乜？



「咁..你琴晚有冇聽到啲乜？」我有啲緊張。

沛霖突然唔出聲，靜靜哋咁望住我，搞到我好撚驚，佢唔會以為我真係勾二嫂呀話。

「我琴晚...聽到...個男人話你勾二嫂....」

屌，酒醉果然點都有三分醒。

「你唔係信呀嘛。」我放低手上嘅筷子，好激動咁望住沛霖。

「嗯..本來我聽到都嚇咗一下嘅。」

「但諗深一層，當中肯定有咩誤會。」



沛霖笑一笑，然後拉住我隻手。

「因為我知道杰仔你唔係啲咁嘅人！」

梗係啦，如果我係嗰啲人，琴晚你仲有得淨咩。

「今日你唔洗返工，即係可以陪我成日啦！」

「你唔洗搵friend咩。」

「唔洗，呵呵。」屌，都唔知係咪。

我睇一睇電話，聽日就係除夕，即係聽晚又會見到沛霖。

不過，我唔介意嘅，哈哈。