《伙記唔該落單》: 第三十四章「回到過去」

自從除夕嗰晚，已經半個月冇見過沛霖，沛霖都冇搵過我，可能係嗰晚嘅事令佢覺得好尷尬。

就算開咗學，都未見到沛霖嘅身影，平時沛霖佢哋坐嗰張圓枱，都俾嗰三個油頭毒撚佔據咗。

「唉，點解會搞成咁。」我一邊抹枱，一邊嘆氣。

「做咩呀你，同霖霖嗌交呀？」子彈走咗過嚟拍我。

「唔係。」



「咁發生咗咩事？」

「好難解釋俾你聽，總之就奶咗嘢。」

「嗯...你唔講就由佢，唔逼你。」

經過嗰一晚，我每日就喺度諗究竟我同沛霖仲會唔會有機會喺埋一齊，但係我又好驚最後沛霖會變咗第二個雪寧。

所以真係唔知點算。



「唔該..收錢..」嗰三個男仔企咗起身埋單。

「一百二十三。」於是我就去收銀收錢。

「話時話..點解呢幾日女神..都戴口罩嘅？」毒撚A問。

「我都唔知...可能唔舒服掛...」毒撚B就答佢。

「冇得睇女神嗰樣，好慘呀...」毒撚C都附和起嚟。



我望住佢哋三個，諗緊究竟佢哋講緊乜春。

「喂..走喇走喇..」毒撚A見我係咁望住佢哋，就拿拿聲叫佢兩個同學走，可能我個樣太得人驚，嚇走咗佢哋。

「個個都驚咗我，真係慘。」

去到晏晝五點幾，冇咁忙嘅時候我同子彈就出咗去食煙。

「點呀你。」子彈點起咗枝煙就問我。

「咩點。」

「同霖霖點呀，兩個禮拜冇見過佢哋嚟喇喎。」

「係咪發生咗啲咩事。」



我見子彈咁關心我，都費事瞞佢，就和盤托出除夕嗰晚嘅事。

「原來係咁，都好正常呀。」子彈點點頭。

「真係正常咩？半個月唔見人喎...」

「喂大佬，俾著我係個女仔，已經準備好獻上自己嘅時候，無啦啦俾一個電話打斷咗喎。」

「你嗰陣仲要鼠入廁所聽，擺明有古怪啦，我係霖霖都唔敢再見你啦係咪先。」

「你都講得啱嘅...」

「不過你仲想搵返人嘅話，咪whatsapp下佢囉，我都覺得咁樣錯過一段關係好可惜。」



「睇下點啦...」你估我唔想搵佢咩，但係真係好尷尬，而且就算搵返沛霖，我哋都唔知仲有冇可能。

夜晚返到屋企，得返自己一個人，覺得好孤單。

以前婆婆喺度，沛霖會成日上嚟，就算婆婆走咗，沛霖都會上嚟，即係代表沛霖好想見我。

不過唔知呢一刻仲係唔係。

我拎起電話，諗咗好耐。

「究竟搵唔搵返佢好。」

其實問下沛霖考mock考成點都得掛，話曬一場朋友，我都想知道下佢嘅近況。

於是我打開whatsapp，㩒咗入去沛霖個對話度，發現佢竟然在線上。



「唔係同緊第二個男仔傾偈掛...」

唔理了，都係搵一搵佢好啲。

「hi 你幾好嗎」

過咗幾分鐘，沛霖就覆咗我。

「幾好呀 你呢」

「ok啦 冇咗你有啲唔慣:-(」

「係咩」



呢句「係咩」就好似係對我嗰晚聽咗雪寧電話，無聲嘅控訴一樣。

「你份mock考成點#oh#」

問完呢句之後，沛霖就offline咗，冇覆過我。

睇嚟我哋已經返唔到去之前咁樣。

都係放棄吧。