《伙記唔該落單》: 第三十五章「匿名信」

冇得見沛霖，本來已經唔係太開心。

呢排唔知做乜，連嗰三個油頭毒撚都唔見埋，得返啲睇落中三中四咁上下嘅學生嚟食飯。

「幾位呀，入嚟坐啦。」我望住門口著住校服嘅一男一女，睇落十五、六歲咁。

「兩位。」佢哋拖住手，似係情侶嚟。

「坐呢度啦。」我指住收銀隔離嗰張吉咗嘅圓枱，然後叫佢哋坐低。



睇佢哋件校服，好似同沛霖讀同一間學校，唔知佢哋有冇見過沛霖，不過有都唔出奇。

幫佢兩個落完單之後，我就挨喺收銀，順便聽下呢對小情侶講緊咩。

「覺唔覺啲中六唔喺度，學校靜咗好多？」個男仔問。

「覺呀，但有少少唔慣囉。」個女仔點點頭回應。

中六唔喺度？即係咩意思。



我決定問下呢對小情侶，咩為之「中六唔喺度」。

「hello。」我有啲尷尬咁對佢哋揮揮手。

佢兩個好似俾我嚇咗嚇，有啲愕然咁抬起頭。

「係..」個男仔有少少驚咁望住我。

「冇呀我想問你哋係咪讀華嶺中學？」



「係呀。」佢兩個對望咗下，個男仔就點頭。

「你哋頭先話..中六唔喺度？即係點？」

「哦，而加中六開始study leave啦嘛。」個女仔微微笑咁同我講。

Study leave？二月中就study leave咁快架咩，咁我以後仲有冇得見沛霖。

「唔該你哋。」

問完嗰對小情侶，佢哋就開始食嘢，見佢兩個互相餵對方，有講有笑咁樣，就覺得有少少心酸。

曾幾何時，我都試過呢種滋味，不過已經冇機會再去體驗。

做到晏晝五點幾，我就同子彈去咗食煙。



「嘶.....呼......」

「慣咗未呀。」子彈突然問我。

「咩慣咗未....」我擰轉頭望住佢問。

「霖霖囉，冇見人兩個月有多喇喎。」

原來已經兩個幾月，呢段日子，沛霖冇搵過我，我都冇搵過沛霖，最後一次對話就係我whatsapp問佢考mock考成點，但係沛霖都冇覆我。

「可以唔慣咩。」

「唉！你鍾意啦！反正你大把女埋身。」



「people come~people go~」呢個子彈，無啦啦講英文，真係吹脹。

「喂，子彈。」

「咩？」

「你覺唔覺呢排嫻姐怪怪哋？」

「少少啦，好似有啲攰咁囉。」

「唉佢平時負責收夜，朝早又要返嚟開鋪，係咁架喇，唔洗太擔心喎。」子彈笑笑口咁拍一拍我。

「都係....」

「你擔心下自己仲好啦，哈哈！」



「....」屌你老味。

食完煙，我哋就入返去做嘢，夜晚唔算好忙嘅，一個時段同時坐九個客左右，算係比較輕鬆。

大約七點幾，我見到有個客起身埋單，就去咗收銀收錢。

「多謝你四十六。」

收完錢，我又諗返起沛霖佢哋第一次嚟食嘢，比錢嗰一幕。



有少少掛住沛霖添。

突然，啱啱俾錢嗰個客遞俾我嗰兩張廿蚊中間跌咗張紙出嚟，我抬頭一望，個客已經唔見咗。

我再睇返張紙講咩，嚇到我打咗個冷震。



唔撚係掛。

究竟係邊個咁大整蠱，我個腦即刻浮現咗兩個人名，一個係龍哥，一個係銘仔。

龍哥同我冇乜兩嘴，應該唔會係佢。

咁即係話，係銘仔，上次喺聯和墟，唔係子彈同佢個friend及時出現，我已經俾佢郁咗。

「喂！睇咩睇到入曬神呀。」子彈突然行咗過嚟拍我，嚇到我即刻收埋張紙。

「冇..冇嘢。」

「挑！都唔知係咪...」子彈搖搖頭就行開咗。

銘仔....唔會真係捉咗沛霖掛？