《伙記唔該落單》: 第三十七章「激戰」

我哋慢慢行到排球場前面，沿途四圍觀察，都只係見到幾個街坊踢拖行嚟行去。

「九點二十分。」我睇一睇時間，距離約定時間仲有十分鐘。

子彈同我小心翼翼地行咗上球場，發現一個人都冇，我哋唔敢鬆懈，企咗喺球場中間留意住周圍嘅環境。

「喂，佢哋會唔會出現。」子彈細細聲咁問。

「唔知。」我擰一擰頭，就答子彈。



突然，一陣冷風吹過，有幾塊樹葉被吹咗落地。

「哈哈，幾準時喎。」

呢個時候，銘仔帶住傻豹同膠水，喺另一邊嘅樓梯慢慢行咗上嚟。

「果然係銘仔。」子彈哄咗埋我耳邊同我講。

「嗯，都係得佢想我死。」



銘仔拍一拍身上面嘅塵，然後擺咗副唔係咁滿意嘅表情出嚟望住我。

「不過你唔聽話喎，明明叫咗你一個人嚟，而加兩個人嚟咗，算點先？」

「你..你係咪捉咗沛..」我講到一半，發現都係唔好講沛霖個名出嚟，好似安全啲。

「你係咪捉咗我朋友？」

「屌，唔洗懶醒喇，唐沛霖呀嘛，起撚咗佢底啦，遲啲除埋佢條底呀！」



「哈哈哈哈！！！」佢哋三個互相望住對方大笑，睇到我差啲想衝上去郁佢哋。

「仆街...沛霖究竟係邊呀！？」我忍唔住行前咗兩步，子彈即刻拉住咗我。

「你估下囉，不過喺講你條女之前，講返我同你之間嘅恩怨先。」

「你..你要我講幾多次？我冇搞過你條女！」

「係？！點解我唔知嘅？」銘仔好似嬲嬲地，又行前咗幾步。

「不過你唔洗解釋喇，因為今日，你唔拎對手出嚟，你唔洗旨走！」

「啪啪！！」呢個時候，膠水拍咗兩下手。

突然，我聽到有好多急促嘅腳步聲，然後陸陸續續有拎住刀同木棍嘅蒙面男人衝咗上嚟，就咁睇起碼有二十五個人，可能更加多。



「上次龍哥條廢柴搵咗班二打六返嚟，十幾人都唔夠你兩個揪，仲俾埋兩把牛肉刀你哋，真係冇撚腦。」銘仔吐咗啖口水，然後坐咗埋一邊嘅石梯上面。

「不過今日算你唔好彩喇，你好似得把遮咋喎，我呢度廿幾人，睇你點死，哈哈！！！」

仆街，今次真係唔係講笑。

而加班刀手圍咗一個大圈，完全將我同子彈包圍，走就一定走唔到，唯有同佢哋死過。

「喂，而加走唔到喎，點搞呀。」子彈笑笑口咁問我。

「我冇諗過走，一日未問到沛霖嘅下落。」

「我係唔會走。」



「你驚嘅，你可以走先。」我笑咗笑。

子彈放低咗佢個斜咩袋，喺入面拎咗把縮骨遮出嚟，之後同我背對背咁企住。

「走？我都冇諗過喎。」子彈笑住咁講。

我望一望佢手上嘅縮骨遮。

「縮骨遮？你講笑咋下話。」

「挑，我唔會有事，同埋你把遮又好好咩，仲有。」

「你唔搵返沛霖嘅，我仲邊有機會見佢兩個靚女同學？」

「哼，話撚咗你嗒嗰兩條女糖架啦金魚佬。」



可能銘仔見我哋陰陰嘴喺度有講有笑，就忍唔住大喝咗句。

「屌！！你哋講撚夠未呀！！」

「郁手！！！」

我同子彈對望咗下，笑咗一笑。

「今日一戰。」

「大不了來生再見。」

「呀！！！！！」



班刀手開始發曬癲咁向我哋沖埋嚟，我哋一開始係咁捱打，我靠住把遮嘅長度，勉強捱幾到棍，子彈甚至比個刀手劈中咗膊頭。

於是我同子彈即刻分開，子彈用佢把縮骨遮不停左右揮，擋住啲棍同刀嘅攻擊，而我就用把長遮一路擋班刀手嘅揮擊，一路搵機會插落啲刀手嘅眼同鼻。

「呀！」有個刀手俾我插中咗隻眼，跌咗落哋，我就即刻衝前搶咗佢枝木棍嚟用。

另一邊子彈都成功搶咗一把牛肉刀，本來一直捱打嘅我哋，佔返少少優勢，戰況由一面倒變成六四開。

「屌！你呀叔我十五歲就揸木棍扑到人爆缸，我洗撚驚你！」我已經唔理身上捱咗幾多棍，有幾多傷痕，我好似開咗奧義咁，起勢追撚住啲刀手嚟扑，子彈就喺後面用把遮牛肉刀掩護我。

雖然我同子彈打到著曬火，但對面始終人多，我同子彈已經成身血，我feel到手臂仲俾人劈咗一嘢。

「仆街...」我掩一掩手臂嘅傷口，點算，咁搞法我哋實冇命。

我同子彈開始退到球場嘅另一邊，而銘仔佢哋仲坐喺石梯上面圍觀。

「唔通我哋真係白白嚟送頭...」

正當我同子彈無路可退嘅時候，有五、六個人喺球場嘅另一邊衝咗上嚟。

「呀！！！」我認得帶頭嗰個好似叫恆爺，係子彈嘅兄弟嚟。

「搞我兄弟！未撚死過呀！！」佢哋一人拎住兩枝啤酒樽衝咗埋嚟，班刀手嚇到調轉頭對付恆爺佢哋。

不過頭先有幾個比我同子彈打到趴咗喺地，有幾個驚到已經棄械投降走咗佬，所以而加我哋勢均力敵。

「幫手啦仲望！」子彈同我一齊衝咗上去，同恆爺佢地反包夾返班蒙面刀手。

我哋開始打到佢哋落荒而逃，走嘅走，傷嘅傷，呢個時候銘仔同傻豹佢哋都企咗起身，諗住走佬。

「想走！？」我即刻沖前拉住銘仔，兜頭扑咗佢一棍。

「卟！」銘仔即刻掩住頭瞓咗喺哋，我就㩒住咗佢，再回頭一望，班刀手已經走曬，連傻豹同膠水都走埋。

「銘仔呀拿！」我又扑咗佢一嘢。

「你班所謂兄弟都係大難臨頭各自飛咋！」

「劈友呀拿！」我再扑咗佢一嘢，佢個頭已經開始標血。

「唔好打喇！唔好打喇！」銘仔縮埋一舊，護住個頭，成條蟲咁捲埋自己。

「喂，夠皮喇，再打出人命。」子彈同恆爺佢哋行咗埋嚟，我就掉咗碌棍。

「講，沛霖喺邊？」

「你唔講，我就請你飲啤酒。」我示意恆爺遞樽啤酒俾我。

「我...我唔知呀..咩都唔知呀...」

「唔知？你唔係捉咗沛霖？」

「冇呀...冇呀！冇捉佢呀！！日光日白點捉人呀！！！對唔住呀！對唔住呀！！」

睇到銘仔而加呢個死樣，我條氣終於順返啲。

嗞嗞...嗞嗞...電話突然震起嚟。

沛霖？沛霖打俾我，即係佢真係冇俾銘仔捉到。

「算你好彩，咪再諗住搞沛霖，唔係你死撚硬。」我鬆開銘仔，銘仔即刻gut下gut下咁跑走咗。

「喂？沛霖？你喺邊呀！」

「杰..杰仔？咳..咳..我喺屋企呀...」

「頭先打俾你冇人聽嘅？」

「咳，呢排溫書溫得太夜，好似病咗..啱啱頂唔順瞓咗陣..你搵我有事...？」

呼，好彩沛霖冇事。

「呃，冇，太掛住你所以打俾你...不過你冇事就好啦！你瞓啦，唔阻你休息。」

「嗯..好啦..」

我同子彈對望咗下，然後笑咗笑。

「沛霖冇事。」

子彈同我即刻坐咗喺地下，再摸一摸自己啲傷口。

恆爺佢哋同子彈點咗個頭，就走咗。

「唔洗問，又係你做嘅好事啦。」我指一指恆爺佢哋嘅背影，笑笑口咁問。

「你喺鋪頭走咗之後五分鐘，我打咗個電話。」子彈笑住咁講。

「真係...你唔繼續做古惑仔真係浪費。」

「點解？」

「觀察力仲犀利過諸葛亮。」

「屌你啦。」

子彈抹咗抹身上面嘅血，就笑住同我講。

「都話咗我唔會有事。」

呢粒子彈，真係唔話得。

「喂，子彈。」

「嗯？」

「多謝你。」

https://youtu.be/4X32WZ7EuO8