《伙記唔該落單》: 第四十六章「梁嘉杰」

九月一號，終於升上year4，即係話我仲有一年就要正式踏入社會，不過其實我一早已經習慣咗喺呢個世俗嘅社會生存。

可能人大咗，身邊肯留低嘅人越嚟越少，就算願意接近你，都可能只係為咗利益。

但係自從識咗沛霖，我終於明白一個道理。

唔係每個人埋自己身，都帶有企圖，有啲人真係真心真意咁對自己，想同自己做朋友。

我唔敢話有好多人都好真誠。



但係，至少沛霖係其中一個。

今日我七點鐘就起咗身，落樓下大快活食完早餐，然後就返去上九點堂。

一路搭火車，一路諗返起呢三年嚟嘅大學生活，好似都係得自己一個人，冇朋友、冇上莊、冇玩ocamp。

所有時間都拎咗嚟返工、陪婆婆，好似冇咩享受過大學生活。

可能你會問，我後唔後悔。



我會答你，實有少少架。

見到其他同齡嘅人喺度嘻嘻哈哈，上莊玩ocamp，每日去打牌飲酒，好似過得好開心、好自由自在。

以前嘅我點會咁樣諗呀，不過係自從識咗沛霖之後，佢教曉我一件事，就係人的而且確需要同伴。

有個人關心自己，愛錫自己，點都好過得一個人孤零零咁過日子。

「你話係咪？沛霖。」



去到九龍塘，喺達之路撞到一個freshmen嗰年一齊玩ocamp嘅男仔omate，佢本來想扮睇我唔到，但我行咗埋去拍一拍佢。

「呀！hello....！杰...杰...」佢好似好驚我咁。

「hi，好耐冇見。」我微笑起嚟。

佢而加個表情，就好似見到外星人一樣。

「你...同三年前差...差...差咁遠嘅...」

「係咩？」

「係呀...好似...唔同咗...平易近人咗...」

「多謝。」



「我而加個頭好睇啲定啡毛好睇啲？」

當初嘅啡毛，已經變曬黑色頭髮，我冇特登再去染，費事再嚇親人。

「呃..都..都係啡色襯你...」佢有啲緊張咁點點頭，然後就急急腳就咗。

「屌..又話我平易近人，又咁鬼驚我。」

不過佢話我個頭襯啡色多啲，都唔算意外，話曬我骨子裡都係散發住一種mk嘅氣質。

大約十二點左右，我上完堂就去canteen食飯，排緊隊買飯嘅時候，有個人突然喺後面拍我。

「雪寧？」雪寧喺度出現，我有少少嚇親，因為雪寧唔係讀城大，佢係讀HKU。



「杰，幾個月冇見啫，差啲唔認得你。」雪寧個感覺都好似唔同咗，好似變返中三啱啱識佢嗰陣咁。

「係咩，可能我變返乖學生掛。」我指一指黑色嘅頭髮。

「睇唔慣你呢個頭，都係啡毛靚仔啲。」雪寧微微一笑。

「係呢你又會喺城大嘅？」

「我嚟搵男朋友呀。」雪寧呢個時候拖住咗佢隔離嘅一個男仔。

「哦...」個男仔都幾瘦，有啲毒毒地，戴住副粗框眼鏡。

突然，雪寧一嘢揸咗落我褲袋度。

「你做咩....」我好無奈咁望住佢。



「你包煙呢？！」

「戒咗好耐啦....」

「唔係嘛，你都戒到煙？」

「.......」

「講笑講笑，喂，到你買喇。」雪寧拍拍我。

我向佢地點一點頭，就轉身買飯，然後自己一個人坐喺canteen食飯。

見到雪寧佢而加咁樣，我都放心得多。



以前佢啲男朋友，唔係做倫敦金，就係啲飛機頭嘅mk仔，個個都冇本心，淨係貪雪寧靚女。

呢個普普通通嘅瘦弱書生，應該會一心一意對雪寧...掛。

我諗應該都唔會再出現雪寧俾仔飛，然後打電話叫我出去飲酒嘅情況，哈哈。

食完飯，我就繼續上堂。

上到一半，無啦啦有人打俾我。

「子彈？」於是我就行咗出課室聽。

「喂，咩料。」

「仆街仔！好消息！」

「有咩消息好到要你打俾我咁嚴重呀。」

「聽講沛霖佢返咗嚟香港呀！」

「係咩。」其實我有少少興奮，但子彈呢條友成日都講大話，信唔過。

「喂！做咩好似一啲都唔驚訝咁嘅你。」

「你聽邊個講呀。」

「呃..呃...」

「嗡唔出，即係講大話啦，係咁。」我本身諗住收線，但子彈突然又補多句。

「喂！！係敏怡同我講...」

「哦？敏怡同你咩關係...」

「呃...喂？喂？好似收得唔係好清楚！唔同你講喇！拜！」

屌你，明明清楚到仆街，呢個子彈擺明溝咗敏怡，晨早話佢對人有意思。

不過咁，頭先佢話沛霖返咗嚟。

於是我打開whatsapp。

「單剔...冇icon。」

應該都係呃鳩我。

反正我一早決定咗，如果過多兩個禮拜，沛霖都仲未搵我嘅，我就會飛去英國。

所以擺返部電話落褲袋，就返入課室上堂。

四點半落堂之後，又係時候返工，我就行咗去九龍城，沿途見到一男一女著住校服，有講有笑咁踩單車。

「真係青春。」我有啲感慨咁笑咗笑。

二十分鐘後，我就行到鋪頭。

「好準時喎杰少！」

「挑，我不嬲準時。」