《伙記唔該落單》: 最終章「感激我遇見」

最終章「感激我遇見」

我換上制服，然後就開始今日嘅工作。

「寫嘢！」一個中年大嬸揮手示意。

「嚟，食啲咩呀。」

「炒金邊粉，凍奶茶。」



「好！馬上嚟。」

寫完一張單，又有另一個客要寫嘢。

九龍城嘅泰國餐廳就係咁，無時無刻都咁多客，唔似粉嶺嗰啲細商場嘅街坊鋪頭，晏晝四、五點就好得閒。

啱啱開始嚟做嘅時候都有啲唔慣架，一嚟呢度忙過隆發好多，二嚟鋪頭啲人多數都係啲東南亞姨姨，冇乜後生仔女做。

都係有子彈、嫻姐同雄哥嘅隆發有人情味啲。



講起子彈，都有好幾個月冇見過佢，搵日約佢出嚟食個飯都好，唔知佢呢排點呢。

話唔定佢可能真係同咗敏怡一齊，哈哈。

不過我就冇咁好彩喇，等咗幾個月，沛霖都仲未返嚟搵我，不過呢啲嘢急唔嚟嘅，會出現嘅點都會出現。

「喂！食唔食煙呀。」收銀個大叔又撩我去食煙，不過我拒絕咗。

「唔啦，你知我戒咗。」我微微笑起嚟。



「食一枝啦！兩個禮拜冇同你食煙吹水！好唔習慣呀！」佢拍一拍我。

「你去啦，我做嘢先。」

「好好好！肯戒煙都好嘅！你仲後生！想戒就戒！我哋呢啲老餅食咗幾廿年，戒唔到嘍！」之後佢就擔住口煙行咗出鋪頭。

食煙？而加真係不了。

想當年，俾啲仆街mk仔大鳩我，話我垃圾，唔敢食煙，叫我返屋企瞓教。

「食啦！唔係淆底呀你？」

「食..食咪食...！」

點知一食，就食咗六年。



煙呢，就真係咪亂試，有錢去買煙嘅，倒不如用舊錢約下女去旅行仲好。

做下做下，就夜晚七點半，鋪頭開始多客，差唔多坐滿曬咁濟。

但我做到有啲攰，就趁冇人落單嘅時候，去咗收銀蛇一蛇王。

點知呢個時候，有人推門入嚟。

屌，挨咗十秒都冇又要做嘢。








「唔該，有冇六位呀？」

「有呀，入嚟啦。」

因為鋪頭門口好窄，每次淨係可以入一個人，於是嗰六個人就開始慢慢一個一個咁入嚟。

帶頭嗰個女仔著住城大市場營銷嘅soc tee，即係呢班人應該都係城大嘅學生嚟。

當入到第四同第五個女仔嘅時候，我已經認得佢哋兩個，係敏怡同嘉瑩。

我本來諗住揮手同佢哋say hi，但係點知佢兩個見到我之後，第一時間唔係同我打招呼。

而係嚇咗一嚇，然後轉身同第六個女仔講悄悄話。



呢個女仔一行入嚟，我即刻呆咗一呆。

最後呢一個女仔，細細粒，眼大大，有一把淺啡色嘅長髮，著住件黑色短袖t shirt同牛仔短褲，同埋拎住一部notebook。

佢見到我嘅時候，窒咗一下，又笑咗笑。

「好耐冇見。」

「好耐冇見。」

「你幾時返咗嚟？」

「上個禮拜。」呢個女仔微微一笑。

「唔搵我嘅？」



「換咗電話，嘻嘻，冇咗你contact。」

「哦...係呢...你..好返未？」

「未架。」

「仲差少少嘢。」佢突然眼紅起嚟。

「差啲咩？」

「差一個人。」佢又笑起嚟。

「嗯。」我都笑咗一笑。

「你讀城大？」

「係呀，creative media。」

「你夠分入？」

「本來唔夠架，但好彩數學有五星。」佢聳一聳肩，然後對我伸一伸脷。

「所以呢，我要多謝一個人。」

我合上眼，點點頭。

「你枝煙呢？唔係日日都攝喺耳仔後面架咩？」佢指一指我耳仔，然後微笑地問。

「戒咗lu～」

佢有啲驚訝，又欣慰地點點頭，然後攬實胸前嘅電腦。

「點解會戒嘅？」

「因為一個人。」

呢個時候，其他五個女仔，已經坐低咗。

「你唔驚嗰個人，永遠都唔返嚟咩？」

我搖搖頭。

「唔驚。」

「因為我知道，佢一定會返嚟。」

我哋再次相視而笑。

「喂！講完未呀你哋！過嚟睇嘢食啦！」

我揮揮手示意，叫呢個女仔過去坐低。

過咗一陣之後，呢個女仔舉起手，然後望住我微微一笑。

「伙記。」

「唔該落單！」
















《伙記唔該落單》全文完