《再見了，還會再見嗎？》: 第5章 – 週末日常

由細到大，媽媽俾咗好多機會我試學唔同嘅嘢，例如 水彩畫 武術 圍棋，仲有好多好多樣，最後唔少得就當然係鋼琴。

我咁鍾意彈鋼琴，係因為佢俾咗個方法我去將心入面嘅唔開心釋放出嚟，而且仲可以暫時忘記晒手上嘅嘢，將成個人投入音樂世界。

教我鋼琴嘅李老師一直都話我好有天份，因為通常啲譜教我一次我就識彈。

所以每次最後都會剩返15-30分鐘俾我練想彈嘅歌。

上個星期我同咗李老師講話想彈《睡公主》。





李老師通常都會好好咁幫我揾埋琴譜，因為佢都知我媽媽一定唔會俾我喺屋企印呢啲流行曲。

「車仔，第一個星期返中學點啊」李老師問我。

「識到一兩個朋友，佢哋對我都好好，幾開心嘅」

淨係第一日已經發生咗咁多事，呢個星期真係可以用百感交集嚟形容。

「傾到呢到先啦我哋。咁今日呢，我哋學巴赫嘅……」





過咗一個鐘左右

「有冇嘢唔明，冇嘅話我就拎份《睡公主》俾你」

「冇啊，唔該李老師」

「呢首唔係好難㗎咋，你留意呢幾個我畫咗箭咀嘅位就OK」李老師一邊指住份譜一邊教我。

彈熟咗段副歌，我就照平時咁自彈自唱。





「沉睡中的主角 怎會怕寂寞……」

「我有啲好奇，點解你會揀呢首歌嘅，首歌講愛情㗎喎」李老師突然問。

「有日睇電視個音樂節目聽到個姐姐唱呢首歌，佢叫咩名我就唔係好記得喇。只係一直聽，覺得個旋律好舒服，所以咪想學囉。」

「個姐姐唱完首歌之後仲做咗個訪問，嗰個女仔好似大我幾年㗎咋，首歌係由佢一手一腳去作曲同填詞，作完仲要自彈自唱，真係好犀利啊。」

其實我都好想可以好似佢咁，用首歌將自己嘅感受全部寫晒出嚟。

「遲啲如果有機會，我揾啲時間教你作曲啦。今日差唔多喇，快啲返屋企唔好要媽媽擔心你」

「ByeBye 李老師」

其實我一直都好羨慕其他人喺weekend 可以留喺屋企做想做嘅嘢。





就算係上網聽下歌煲下劇咁過一日，我都已經好滿足。

可惜，呢啲機會真係唔係屬於我。

落堂返到去我就坐咗埋部鋼琴，因為咁樣就可以唔使温書喇！！

真係連我都覺得自己真係好聰明！！

想我彈《睡公主》？？？

緊係唔得啦，作死咩。媽媽喺屋企嘅時候淨係可以貝多芬莫扎特無限loop㗎咋。

爸：「仔，記得聽日要去嫲嫲屋企啊。不過嫲嫲話朝早唔去飲茶喎，你可以晏啲先起身都得」





我：「點會唔記得喎，個個禮拜都要去㗎啦」

我屋企每逢星期日嘅節目就係成家一齊去探嫲嫲。

通常就10點左右出去同嫲嫲飲茶，之後就上嫲嫲屋企，留到夜晚食完飯先走。

媽媽為咗唔好影響我嘅温習進度，每次都會叫我揀一科帶出去坐車嘅時候睇。

話時話，我同嫲嫲嘅關係好好㗎，因為爸爸媽媽都要出去返工，所以我細個嗰陣係嫲嫲照顧我。

「嫲嫲午安〜」

「車仔乖，過嚟坐低陪嫲嫲傾下偈，不過除咗隻襪先，唔好幫嫲嫲吸塵」

「車仔，中學好唔好玩啊」嫲嫲問我。





「好玩呀，仲識到新朋友添啊」

「睇你笑到四萬咁口，係咪識到女仔呢，可唔可以講多啲俾嫲嫲知」

「咁都俾你發現添」
… 
…
「佢哋兩個都係好女仔嚟，你要對人好啲啊」嫲嫲對我說。

「車仔，你要聽住啊。喺將來你會遇到好多對你好嘅人，但當你愈大個，真心咁對你好嘅人只會愈嚟愈少。好多人痴埋你到只係為咗攞你著數，而唔係真心想同你做朋友。喺你而家呢個時候識嘅朋友，先至係你喺將來最能夠相信嘅人。」

「而家嘅你可能聽唔明，不過要記住我今日同你講嘅嘢呀」

「知道喇嫲嫲，我會記住㗎啦」





「我去煮飯先喇，你去自己玩啦」

其實嗰陣嘅我聽完真係成頭問號，點解連朋友都唔可以信。

到咗而家諗返轉頭，先知原來已經有人提醒過我。

當一切都沒了才後悔 已經太遲了