《再見了，還會再見嗎？》: 第9章 – 陸運會（下）

「終於到咗陸運會最後嘅環節 – 班際接力。各班嘅代表已經喺司令台前準備就緒喇，睇嚟一陣嘅戰況將會好激烈。」

其實我對班際接力真係冇咩感覺，畢竟我又冇份落場跑，加上同班同學又唔係特別熟，不過都循例企喺跑道邊打下氣啦。

「而家即將進行嘅係中一級班際接力比賽，亦係呢次陸運會最後一個比賽」

「麻煩選手行去各自嘅接棒位準備〜〜」

「企咗喺我前面個男仔咁熟口面嘅…到底我喺邊到見過佢呢」我心想。





「喂，喊包，做咩眼定定咁望住我」個男仔竟然主動叫我。

我認得佢啦！！佢係嗰日我喊，然後突然喺廁所出現嗰個男仔！！

「仲望住我，你係咪gay㗎？」

「邊有望住你啊，你就gay」我對佢反一反白眼。

「仲以為你對我一見鍾情添」





「喂，唔講住，就快到我接棒，全班食粥食飯睇我㗎喇今鋪。」

個男仔……真係跑得好快……唔講仲以為食咗禁藥……

原本佢嗰班係排緊第四，但係佢接棒之後用咗唔夠50米就追返第一返嚟……

話咁快就到最後一棒，係由小雲交棒俾Zoe。

而家我哋班淨係輸緊俾第一名兩個身位，Zoe應該可以追到嘅！！





之後唔知係我睇錯定點，小雲交棒俾Zoe嗰陣好似好大力咁打落去……支棒仲要跌埋落地

因為支棒跌一跌，我哋就即刻跌到第五。

就算Zoe出盡力跑，都只係追得返個第二，唉。

不過積極啲諗，跌完棒都有獎攞，算係咁啦。

「而家進行中一級班際接力嘅頒獎 – 季軍：1C班」

一陣歡呼聲。

「亞軍：1B班」

一陣歡呼聲。





「冠軍：1E班」

又係一陣歡呼聲。

聽咗兩日已經聽到好麻目，淨係覺得好嘈好煩厭。

話說小弟唔太鍾意啲好嘈好多人嘅環境，啫係好似而家呢啲。

仲有嗰啲咩煙花啊，倒數啊，真係全部都唔好預我。

只要一喺呢啲地方留得太耐，我就會變到心情好差，好想離開現場。

「係喎，點解Zoe冇上台攞獎嘅，淨係得小雲同兩個男仔上咗去」我心想。





「恭喜以上得獎班別」

「第二十九屆陸運會嘅所有環節已經完滿結束，感謝各位同學嘅積極參與，我哋下年再見！！」

「Zoe喺女廁門口瞓低咗呀，你快啲幫我去睇住佢啦！！」Choco好大聲咁喝我。

「我而家去揾急救隊啲人幫手，你幫我拎呢支水同毛巾過去！！」

我一拎起啲嘢就即刻向女廁方向衝過去。

係，我好擔心佢會有事。

如果喺嗰次陸運會我都有咁關心佢就好喇。

離遠就已經望到挨住牆坐埋一邊嘅Zoe。





我：「冇事嘛？飲啖水先啦」

Zoe：「抖咗陣好好多喇，多謝你支水啊。」

佢一邊講句嘢一邊企起身，我亦都嘗試扶住佢。

但係佢都係痛到企唔到，然後坐返落地下。

我：「Choco叫緊人嚟㗎喇，你唔好起身啦」

Zoe：「你一陣可唔可以幫我打俾我家姐，佢電話係……，你叫佢嚟呢到接我就得，唔該你啊。」

我：「ok 冇問題」





Choco喺呢個時候都嚟到。

Choco：「痴線㗎，班急救話唔夠人手，叫我哋自己扶Zoe過去」

我：「吓，咁都得㗎咩」

Choco：「我陣間一定開佢哋火，幫手扶咗Zoe過去先」

原來已經4:30，真係要快啲搞掂返屋企，如果媽媽知我遲返又會鬧我㗎喇。

「喂… 係咪Zoe家姐啊？」

「我係啊，你係 ~ ？」

「我係Zoe同班同學啊，佢啱啱跑步整親，叫我打電話俾你嚟接佢」

「唉，叫咗佢唔好跑咁多㗎啦。係咪喺xx運動場啊？」

「係啊，麻煩你喇」

「麻煩你就真啦，我應該15分鐘就到，4:45運動場閘口等」

我都未話佢知我趕住走，佢就收咗線。

咁啫係我要等埋Zoe家姐嚟先走得…

一講完電話我就企喺閘口等，等咗10分鐘就有個同Zoe一樣樣嘅人出現咗。

「啱啱係你打俾我？」

雖然一樣樣，但佢個氣場同Zoe好唔同，好有壓迫感。

「係……我帶你去醫療室揾佢啦」

沿路行過去我都冇同佢講過嘢，硬係覺得個氣氛好奇怪。

家姐：「叫咗你唔好跑咁多㗎啦，行唔行到啊？」

Zoe：「點會行唔到，跑都得啊」

家姐：「得喇，啫係行唔到。搭的士返啦」

Zoe：「咩行唔到喎〜」

家姐：「收聲，行，我扶你。」

唔好以為Zoe家姐大我哋好多，佢都係中學生嚟㗎咋。

不過係咪同年級我就唔知喇，淨係認得佢套校服係我哋學校隔離嗰間。

跟住嗰日係學校假期，我就緊係乖乖地留喺屋企啦。

可以返兩日放一日，全日平平淡淡咁喺屋企温下書做下功課彈下琴就過，都咪話唔開心。

如果呢啲平淡嘅日子可以多幾日就好喇〜〜