「我講個秘密俾你聽啊,今朝我咪去揾陳sir嘅,佢俾咗間房我用呀」

「都唔知你講緊乜,垃圾房呀??」小雲笑我。

「緊係唔係啦,舊嗰間影印房呀。佢話我可以隨時去嗰到温書都得,唔使再留喺個班房對住班人」

「吓,又會咁好嘅」小雲驚訝地說。

「咁你今日放學同唔同我一齊去嗰到温書啊?」





「Ahhh……我呢排放學之後有嘢要做啊,你自己温書啦」小雲唔好意思咁講。

小雲好似冇玩課外活動㗎喎,又會突然有嘢做嘅。

「咁我自己去啦」我失望地說。

「唔好唔開心啦,我又唔會走咗去」小雲伸一伸脷。

「一係6點喺樓下小食部等一齊放學啦〜」小雲同我講。





一放學我執齊嘢就落咗間房温書。

「呼,估唔到呢到又真係幾舒服〜〜」我自言自語。

陳sir對我咁好,一定要考好啲數學報答下佢先。

我揭開本數學書望住今日新教嗰課,

真係無從入手,全部都好似鬼畫符咁。





點解可以成版都係英文字母,揾多粒數字都冇。

「車仔?你俾人罰留堂啊,點解你會喺入面嘅?」

呢把聲……

係Zoe!!

「呢間房係陳sir book俾我温書用㗎,你又會落嚟教員室呢邊嘅?」我問Zoe。

「我諗住落嚟交返份作文咋嘛,不過Miss Chan好似走咗lu」

難得Zoe喺到,不如叫佢教下我呢課都好喎。

「係呢,你可唔可以教我呢啲點做啊,我今日上堂聽唔明呀」





Zoe望到我温緊呢課嘅時候嚇一嚇。

「你哋教得咁慢嘅,我哋一個幾月前教晒呢個學期啲嘢,而家温緊書喇喎〜」

吓,明明係你哋教得太快……

一個學期先得3個幾月,你哋早成個月就教完晒啲嘢……

「呢條呢,你要睇咗邊啲係一樣先,之後……」

由9月開始一直都冇乜心機温書,可能因為Zoe又走咗,小雲又唔理我,仲日日俾人騷擾。

搞到而家讀書同上年比都差咗少少,希望喺淨低呢2個月追得返啦。





聽住Zoe坐喺側邊教我,以前嘅感覺好似返晒嚟。

好耐冇試過有人同我一齊温習,好難忘。

「最後咁樣就搞掂喇〜」

「喂,車仔,喂,你有冇聽㗎!!!」Zoe喺我耳仔旁邊大叫。

死,我真係冇聽到。

「Errr……你講多次得唔得啊……」

Zoe嘆一嘆氣。

「唉,怕咗你,講埋今次咋。呢到……」






「嗯,我應該識㗎喇。唔該晒你呀〜」

「咁我走喇,遲啲再見啦」

「等陣!!我想問呢,你嗰次喺課室俾我聽啲歌呢,可唔可以俾歌名我啊?」我問Zoe。

「得啊,你有冇紙,我而家寫俾你」

過咗一陣,Zoe將張寫到密麻麻嘅紙遞返俾我。

「下次再傾喇〜」

呢刻嘅我只係覺得Zoe俾咗好大動力我,重拾返嗰股失去而久嘅温習衝勁。





但我又點會估到我哋下次再傾偈,係講緊幾耐之後嘅事呢。
已有 0 人追稿