《再見了，還會再見嗎？》: 第22章 – 古古怪怪
望下個鐘，原來差唔多6點。
為咗唔好遲到，我早少少執好嘢就出小食部等小雲。
但小雲原來都早到咗。
當我行近啲，發現佢原來同個男仔傾緊偈，好似係阿天嚟。
不過我未行到過去，阿天就走咗。
「咁早到嘅你」我問小雲。
「哦，早咗完嘛，我咪早啲落嚟囉。行啦我哋〜」
出咗學校，我即刻問小雲，
「你幾時開始同阿天咁熟㗎，快啲話我知！！」
「你講咩呀，我唔明喎」小雲一臉疑惑。
估唔到佢竟然扮傻。
「唔使扮嘢喇，我啱啱見到晒啦！！使唔使我幫手撮合下你哋先，我唔介意㗎」我奸笑。
「咩喎，佢啱啱經過……跟住我同佢傾下偈咋嘛！」小雲一邊講一邊口窒。
「好啦好啦，你唔肯認，我唔逼你喇，有咩要我幫記得出聲啊」
真係唔夠老友，竟然想識人都唔話我知。
到咗星期五合唱團練習，我趁中途休息行過去同阿天傾計。
「做咩同小雲咁熟都唔話我知！！」
「你發燒啊，邊隻眼見到我同佢熟呀？」阿天講完摸一摸我額頭。
「點解你兩個都唔肯認㗎，唔通已經一齊咗？」我追問。
「嗱嗱嗱，嘢就唔好亂咁講，一陣俾雯雯聽到就真係水洗都唔清喇我。」
「邊個雯雯，你嗰班嗰個靚女？」
「正確啲嚟講係我女朋友〜」阿天自豪地說。
「點解你咁嘅樣都會識到雯雯㗎？呢個世界真係有啲問題」我搖搖頭。
「你真係白痴仔嚟。首先，我靚仔過你。其次，識女仔係睇佢同你傾唔傾得埋，唔係淨係鬥靚仔㗎」
「仲有，而家你都有條女日日陪住你，人哋都已經明示暗示晒俾你，你都仲係扮睇唔到，咁我都冇計㗎喎」
「所以呢，就唔好再屈我想食你個小雲喇。如果你搞嬲咗雯雯呢，都唔使指意我再幫你做任何嘢」
「返你個位啦，休息時間完喇」阿天推一推我。
唔通佢哋真係咩嘢關係都冇？？純粹真係撞到？？
但係佢哋嗰陣又好似好好傾喎，真係愈諗愈唔明。
完咗練習，我好似平時咁同阿天一齊落去。
但今日唔同嘅係，我同阿天都各自有個女仔陪我哋放學。
明明上星期都仲係得我哋兩個男仔一齊搭車走，但而家突然就變咗各自同女仔搭。
人真係變得快，估唔到一個星期就令到咁多嘢唔同晒。
「咁早就喺到嘅，仲以為要上班房叫你添」阿天對雯雯講。
「我都冇嘢做，留低等你咋嘛〜」
連學校都未出，阿天就已經拖住雯雯……
真係夠晒大膽，竟然唔怕會有老師見到。
而我同小雲就跟喺佢哋後面行。
話時話，雯雯真係幾靚，係嗰種行過咗會拎轉頭望多兩眼嘅類型。
「佢哋就好啦，可以一齊」小雲講完之後扁起個嘴。
「你唔好唔開心啦，冇咗阿天啫，仲有好多好男仔㗎嘛」我嘗試氹返小雲。
「係囉，但係啲好男仔唔鍾意我呢」
「點會啊，你咁好〜」
「唉，聽到你呢句我就知唔會啦。我有車喇，下星期見啦」
「ByeBye〜」
Um…… 小雲又會咁快覺得冇好男仔鍾意佢嘅
Um…… 都係諗唔明。
跟住落嚟嘅日子都係差唔多，每日都係同小雲一齊食晏一齊放學。
唔知係咪因為聽日係聖誕聯歡啦，我哋班啲人個個都好興奮咁傾點樣報置同準備。
班會主席：「聽日個流程呢，就會係我哋一早入禮堂睇表演先，之後就返課室自由活動。咁我就諗住叫啲小食搞個大食會咁，大家有冇異議？」
Choco:「都對住班友第二年，你又唔係唔知，佢哋有得食就OK，唔會有意見㗎啦」
後排一眾肥仔:「啱呀啱呀！！Choco姐英明！！」
講開又講，我覺得Choco呢個副主席做得好過個主席多多聲，基本上所有班嘅重要嘢都係由Choco一手包辦，個主席都只係掛下名出嚟講下嘢。
Choco:「一陣放咗學想揾啲靚仔靚女幫下我佈置，有冇義工？」
有幾個女仔舉咗手。
Choco:「Um…… 我想要多個男仔嚟搬嘢，就你啦車仔」
吓，又會叫我嘅……
我一臉無奈嘅眼神望住企喺出面嘅Choco。
Choco：「唔使咁嘅樣望住我喇，決定咗係你就係你。喂〜 有份幫手嘅4點留返喺班房，我一陣Lunch Time會買齊要嘅嘢返嚟㗎喇〜」
明明我全身肌肉都唔多舊，連腹肌都係得嗰一舊，無啦啦就俾人點名要留低擔擔抬抬，真係麻煩。
〜放學後〜
「車仔，幫我手黐埋啲彩帶上去丫，差呢到就搞掂喇」Choco叫我。
「哦，好呀」
其實我留咗喺到成個鐘都唔知自己做過乜，淨係剪過幾張紙同黐過少少嘢。
「辛苦大家喇，佈置得好靚呀！！」Choco雙手合十咁講。
問心講又真係幾靚嘅，牆上面黐滿晒啲彩帶同聖誕圖案嘅剪紙，仲要唔知喺邊到買咗部噴雪機同棵聖誕樹返嚟。
「喂車仔，過嚟傾兩句偈」Choco向我招一招手細細聲同我講。
「仲有嘢未整好？」
「冇咩特別嘅嘢喇，想同你傾下閒偈啫。係呢，小雲係咪冇話你知佢近排忙緊乜？」Choco問我。
「冇啊，問極佢都唔肯講。你知咩事？」
「你聽日都會知㗎喇，一陣你同佢放學嗰陣講聲加油鼓勵下佢啦，我走先喇〜」
Choco講完句嘢同我揮一揮手就走咗。
到底小雲呢排搞乜呢，一陣再問下佢先。
等咗一陣，小雲就返咗嚟課室。
「車仔〜 等咗好耐嗱？」
「唔係，Choco都係啱啱走咋嘛」
「你聽日加油啊，我會支持你㗎！」我對小雲講。
「你知道晒喇？Choco個衰妹同你講㗎？」小雲突然變到好緊張。
「佢啱啱同我傾咗一陣偈咁囉，不過佢都係咩都唔肯講」
「咁都好啲，Choco想嚇死我咩」小雲細細聲自言自語。
「做咩喎，咁唔俾得我知㗎咩？」
「唔係，你聽日就知㗎喇。行啦傻仔〜」
行行下嘅時候，小雲突然問我
「你覺得呢，我如果好似上年陸運會咁唔戴眼鏡好唔好睇呀？」
到底上年Sports Day嗰陣係點㗎呢？
我諗咗一陣，都係冇印象。
「Errrr……好睇啊，緊係好睇啦」
「算啦你，講大話真係好渣呀，直接話唔記得咪得囉」
小雲用鄙視嘅眼神望住我。
「唉，乜都唔記得，唔想同你講嘢喇。快啲上車走啦你，聽日唔好唔返學丫！！」