今日係假期後嘅第一個上課日,亦係第一學期考試前嘅最後一個上課日。

食完飯之後我同小雲返咗課室。

「車仔,你覺得我俾你嗰張卡點啊?」小雲突然問我。

我如果答佢一般般或者冇乜特別又好似唔係幾好喎。

小雲一臉誠懇嘅樣望住我。





等我諗下先……

「你用短短幾句就寫晒你嘅諗法同我哋經歷過嘅嘢,我睇完都幾感動啊」

「總之我哋將來都會繼續係好朋友啦!!」我興奮地說。

聽完呢句,佢突然由誠懇嘅樣變得非常失望,仲好似有啲想喊。

「我…想去洗…手間…先,你…幫我叫……」小雲嘅聲音變得模糊。





完全唔了解狀況嘅我有少少不知所措。

「叫邊個??Choco??」我問。

「嗯…」小雲喊住咁跑走咗。

Choco……喺邊呢……

大鑊,未返添……





都係落學校門口等Choco返好啲。

過咗5分鐘左右,Choco同班會主席佢哋出現咗喺學校門口。

「Choco,小雲應該喺2樓廁所喊緊啊…」我緊張地說。

Choco一聽完皺起眉頭。

「唉,你哋又搞咩嚟呀?」

我到呢刻都係乜都唔知…

「我同佢傾傾下佢就突然喊喇,我都唔知點解」

「你返班房啦你,我會帶佢返嚟㗎喇」





Choco一講完就一支箭跑咗上樓梯。

阿天同雯雯都喺呢個時候返咗學校。

難得嘅係佢兩個今次終於冇拖住。

阿天:「成碌木咁企喺到,小雲又唔係隔離,知咩事啦」

雯雯:「去追返人啦,企喺到扮雕像等人俾錢咩」

我:「佢喺女廁喎,我可以做啲咩……」

雯雯:「你追上去企喺女廁外面聽下咩事囉,最多我入去幫你收下風」





阿天:「跟我哋一齊上去啦,仲企喺到」

一上到2樓,雯雯行入咗去女廁。

我同阿天企喺外面隱約都聽到少少Choco同小雲傾計嘅聲。

Choco:「唔...開...啦,佢...意思...」

小雲:「...啊...啊...」

小雲喊到根本我一粒字都聽唔到佢講乜,都分唔到係喊嗰啲抽促聲,抑或係講嘢嘅聲喇。

「你聽唔聽到小雲講緊咩啊?」我問阿天。

「咪玩我啦,唔講仲以為佢喺入面拍緊AV啊,點聽呀」





雯雯過咗冇耐就出返嚟。

「到底咩事呀??」我心急地問。

「唔好企喺廁所門口傾啦,一陣啲人以為我好似車仔咁變態啊,我哋班房喺隔離咋嘛」阿天提議。

「你點會係變態,你仲有我㗎嘛〜」雯雯講完句嘢又拖返住阿天。

佢哋兩個真係好嘔心……

一行入E班班房,就望到Zoe同嗰個男仔又坐埋一齊,硬係有啲覺得唔舒服。

我知嗰種唔舒服唔係因為我鍾意Zoe,而係嚟自好朋友俾人搶走咗嘅嗰種感覺。





「入嚟啦,唔好企喺外面,唔使驚有老師行過睇到你入其他班房㗎喎」雯雯叫我。

「Zoe係佢個ex嚟㗎,俾佢見到Zoe而家溝緊Simon,係會有少少唔開心㗎喇」阿天細細聲同雯雯講。

「Opps… 有啲料喎𡃁仔,可惜又蠢又唔靚仔,唔係同Simon都有得鬥下。坐低啦〜」

咩意思喎…… 

我:「唉,你講返你啱啱聽到咩先啦」

雯雯:「根據我嘅專業分析呢,我就覺得你係拒絕咗人哋表白嘅」

我:「吓,佢邊有表白」

阿天:「弱智仔,你唔係連人哋表咗白都唔知嘛」

但事實係我真係唔知……

雯雯:「算啦阿天,你平時都同我講話佢蠢到冇得救㗎啦」

阿天:「唉,就夠鐘上堂。車仔你返自己班房先啦,我同雯雯再幫你諗諗計。如果係第二個,我一定睬佢都傻,見係你咋」

我:「好啦,麻煩晒你哋喇」

原來下一堂係Miss Chu嘅英文堂,啫係又會播戲俾我哋啦。


話說升咗上中二之後,Miss Chu變咗個真真正正嘅教畜。

佢每堂上到嚟都係叫我哋一齊讀下課文同背下生字,再唔係就將同學寫嘅文印落去變工作紙,再叫大家揾有咩Grammar用錯。

如果咁啱係撞正Lunch Time後嗰兩節上堂,仲會直接播套英文戲俾我哋睇就算,話係練listening喎。

「Students,今日呢,我就準備咗套戲俾大家睇,英文叫The Day After Tomorrow,中文叫做明日之後。咁套戲就成2個鐘嘅,所以我哋今日就睇住一半先,另外嗰半就遲啲……」

小雲到而家都仲係未返嚟。

「你個friend呢,做咩佢同你食完飯唔見咗嘅?」之前蝦我嗰個肥仔問我。

「我都唔知啊」

播咗10分鐘左右,佢哋終於返嚟。

「Oh,做咩咁遲先返嘅?」Miss Chu 問佢哋。

「小雲佢食完飯有啲唔舒服,所以我啱啱陪咗佢落去,而家冇咩事喇」

「冇事就好喇,快啲坐低啦」

其實呢刻嘅我又邊有心情睇套戲呢,所以我決定偷偷地行過去小雲到。

我首先踎低咗喺地下,然後細細步咁慢慢行過去。

估唔到沿途好順利,Miss Chu竟然冇發現我離開咗位。

只係行嗰陣俾幾個冇留心睇戲嘅同學見到,不過佢哋都冇舉報我。

我拍一拍小雲大脾,佢望到我之後瞪起雙眼呆咗。

「車仔??點解你會過咗嚟嘅??」小雲驚訝地問。

「我偷偷地踎低行過嚟想睇下你點嘛…」

Choco喺呢個時候企咗起身。

「我俾個位你坐啦,我坐你嗰到。」

「點解你可以就咁企起身嘅??」我一臉疑惑。

「你都企起身睇下啦,Miss Chu都睇到瞓著咗喇喎」

唔係嘛,而家啲老師咁都得㗎咩…

Choco講完句嘢就向我個位嗰邊行。

「你…冇咩事嘛?」我問。

「傻仔,我明㗎喇,我哋係好朋友嘛」小雲講完摸一摸我個頭。

冇事就好喇。

「今日你温唔温書啊?」我問小雲。

「緊係温啦,聽日就考試喇喎」

「我意思係一唔一齊落嗰到温啊?」

「邊到都得啊,冇所謂。睇完套戲就一齊落去啦〜」

 
已有 0 人追稿