《再見了，還會再見嗎？》: 第24章 – 聖誕卡？

〜聯歡會當日晚上〜

「車仔，記得聽日要去嫲嫲屋企喇」爸爸一邊食飯一邊對我講。

「我會㗎喇，都去咗咁多年，慣晒啦」

「你今年一定要考好啲，咁下年就可以調去精英班喇，因為……」

媽媽帶命令語氣咁同我講咗一大堆嘢，搞到我聽完都覺得有啲辛苦。





話說我學校係中三會調一次班，然後中四因為揀科又會再調一次班，所以媽媽先會叫我考好啲。

我：「係呢，你哋喺我生日嗰日會唔會上嚟㗎？」

媽媽：「應該唔會喇，你叫嫲嫲買蛋糕同你慶祝啦」

我：「哦」

聽完媽媽咁講，就緊係有啲啲失望，但其實都估到會係咁。





爸爸：「個仔都問到出聲，不如上去啦嗰日」

媽媽：「佢連自己本份都做唔好，憑咩要我哋聽佢說話。一句講晒，唔去。」

我：「我飽喇」

飯都未食完我就行返入房。

成日聽到佢哋鬧交搞到我個心都好煩。





「Um……今年都係考好啲科數學報答下陳sir先」我自言自語。

然後我將要帶去嫲嫲到嘅書放咗入個手抽袋就上床瞓咗。

「嫲嫲〜」

「車仔咁早到嘅今日，入嚟先啦」

嫲嫲幫我拎咗喺地下嗰袋書入屋。

「我尋日買咗5排維他奶俾你啊，應該夠你飲10日㗎喇」

「多謝嫲嫲〜」

今次真係飲到糖尿都飲唔晒。





「你上星期嚟話學校有聖誕party㗎喎，開唔開心啊？」嫲嫲問我。

「開心啊，小雲仲參加埋歌唱比賽添呀，雖然輸咗」

「佢平時有唱開歌㗎？」

「冇啊，佢仲話自己唱歌麻麻地」

係喎，點解佢以前又話自己唱歌一般，但又會參加歌唱比賽㗎呢？

「哈哈，車仔你真係好蠢。難得有女仔咁有勇氣為咗你去做咁多平時唔敢做嘅嘢，你都唔去回應下人哋」 

「車仔，你好好地諗下我講緊咩啦。如果你唔鍾意人啊，就直接就同人講喇」





「嫲嫲去準備今晚嗰餐先，你自己温書乖喇」

我點會唔鍾意小雲啫，如果唔係我都唔會同佢做朋友啦，更何況佢仲係我好朋友添。

話說之前咪有日我叫Zoe將啲歌名寫俾我嘅，我已經將啲歌放晒入電話喇。

而家有時温書我都會開Zoe俾我嗰啲歌嚟聽，每次聽嘅時候都會令我回想起當時同佢一齊温習嗰種心態。

可能你哋會覺得，有冇咁誇張呀？車仔又喺到吹水啦。

但我係真心咁覺得。

因為喺一個冇讀書氣氛嘅班入面，真係好易俾佢哋嘅心態影響。

一班30幾人，有成20幾個都係唔會點理自己嘅成績，直頭可以話係亂咁考都有班頭十。





好容易就會有成功感，覺得自己好叻，根本就係現實版嘅「池中無魚蝦自大」

所以要令自己有温書嘅動力，就成日都要篤促自己。

而媽媽嗰邊嘅要求，我諗通㗎喇，唯有盡量當唔知當聽唔到啦。

因為根本就高到唔合理，冇必要再逼自己去配合佢。

如果一直喺媽媽嗰種逼迫底下温習，反而令我仲緊張，仲大機會考得唔好。

假期一眨眼就過，每日都係輕輕鬆鬆温下書休息下又一日。

如我所料啦，平安夜嗰日爸爸媽媽真係冇上嚟，不過今年唔同在收到一個朋友嘅祝福。





平安夜當日晏晝12點搭5左右，有個陌生號碼打俾我。

「傻仔，生日快樂呀！！」

「你又會記得我今日生日嘅？」我問佢。

「你同我講過我咪記得囉〜」

小雲突然語氣一轉。

「係喎，你睇咗我俾你張聖誕卡未啊？」

死，冇咗件事添。

「Er……」

「唔出聲！！啫係未啦，我嬲喇！！」

「又嬲……」我細細聲講。

「咩又嬲，明明係我俾張嘢你幾日你都唔睇」

「嬲喇我〜收線〜ByeBye〜ByeBye〜」

嘟〜嘟〜嘟〜

佢真係講完就收咗線……

認真諗諗，原來佢係呢2年嚟第一個同我講生日快樂嘅同學。

返到屋企一定要開佢張聖誕卡睇下先。

「喺邊呢張卡……」我自言自語。

去揾下聯歡嗰日個袋先。

有了。

張卡講真就平平無奇，入面都係寫啲普普通通嘢，

「聖誕快樂啊！！！
我哋識咗一年幾喇，
中間雖然發生咗好多事，
意外又令我哋一齊返，
你以後唔准再走咗去呀！」

我睇完之後就放返入櫃桶，費事媽媽望到粉紅色信封，以為有人寫情信俾我就麻煩喇。