《再見了，還會再見嗎？》: 第27章 – 回憶
諗返以前每日俾阿媽鬧我同逼我温習，再去到俾人杯葛同欺凌。
直到發生嗰件事之後，連阿媽都話唔再俾壓力我，唔再管我成績。
如果你問而家嘅我，我會覺得好壞參半啦。
唔好嘅相信唔使我多講啦，當然係嗰啲接踵而來嘅問題所引起嘅壓力。
而好嘅地方，係我能夠喺咁細個就率先經歷咗咁多嘢。
到底呢個世界嘅人為求自保係幾咁醜惡？
遇到唔滿意同唔公平嘅事都唔出聲，反而視而不見。
旁人嘅沉默，反而成為咗壞人嘅幫兇。
不過都要多謝返媽媽同我啲同學，如果唔係佢哋，我都冇機會體驗到呢啲。
真係好諷刺，傷害我嘅人正正係我想多謝嘅人。
「起咗身嗱？一唔一齊落Canteen食早餐？」
問我嘢嘅人叫Andy，係我喺Ocamp識嘅朋友嚟，亦都係我roommate。
「你等我執埋啲嘢先，我一陣應該直接返屋企，然後開Sem先再返嚟喇」
「咁我打多舖機，你得就叫我」
噠噠噠……噠噠噠……
佢打機真係好嘈，不過每晚都係咁上下，所以都慣。
打開櫃桶，係一個有白色波點嘅長方形黑盒。
再打開入面，係一張海洋公園嘅合照，同一塊金牌。
帶唔帶返去好呢……
當初帶呢盒嘢嚟宿舍，係因為覺得自己對Chloe仲有感情，但經過尋晚，我都幾肯定我唔會再鍾意佢。
雖然我已經對佢冇乜feel，不過都係有啲後悔之前衝動扔晒佢送俾我嘅其他嘢，畢竟都係想將啲嘢留念。
放喺到好似冇乜用，都係帶返去啦。
幾經辛苦終於搞掂晒個櫃桶，係時候到我張七國咁亂嘅書枱。
考完個Final嘅書枱真係亂到已經唔係文字可以形容，所有科嘅書同Notes疊晒埋一齊，基本上係唔會喺入面揾到想要嘅嘢。
執到底嘅時候，我揾返我塊裝飾用嘅水松板。
話說小弟份人好念舊，喺水松板上面釘住咗好多好多值得留念嘅相。
原來我都幾個月冇認真望過塊嘢……
雖然釘喺上面嘅相好多，但中學時期嘅只有4張，一張係4人合照，另外嘅三張分別係三個鍾意過我嘅人，但都係重要嘅人。
因為一直都唔係話好多朋友，加上小弟又唔係好鍾意影相，所以中學嘅嘢都冇乜影相留念。
反而一上到大學，成日都有呢樣聚會嗰樣聚會，次次聚會完又話要影張相，真係麻煩。
「車仔你執完未㗎？我打完一舖喇」Andy問我。
「俾多5分鐘我，去廁所刷個牙洗個臉返嚟就走人」
我放返好塊水松板喺枱頭就去咗廁所梳洗。
返到嚟嗰陣，
「啱啱Silvia打嚟我幫你聽咗喎，你自己揾返佢啦」
「哦，好啊」
㩒返著個電話mon就望到個2個新訊息，
「我返到去喇，Good Night」
「傻仔，一陣我返屋企啊，一齊走？」
我㩒咗落第二個，然後即刻覆返佢：「我都返啊，十二點我間房等」
「行喇，Andy哥，我就快餓死喇」
「我都未出聲話餓死，你仲好意思講呀」Andy回應我。
「Sor囉，行啦」
樓下間Cantenn真係好難食，同狗飯冇乜分別，連個早餐公仔麵都可以煮到變麵糊，除咗近之外，我都諗唔到有咩好處。
「Silvia喺樓梯落緊嚟喎，你哋又逼我做電燈膽呀？」Andy問我。
「吓，我冇約佢落嚟㗎喎……」
「咪呃我啦，平時佢連瞓覺都要上嚟同你瞓同一張單人床，都唔明點解你哋仲未拍拖嘅」
咁我同佢真係齋瞓覺，冇其他嘢發生嘛……
「喂Silvia，落嚟揾車仔呀？」
「冇人想揾呢個傻仔啊，我嚟食早餐咋……不過一齊坐得唔得先？」
有得唔得咩……
「有靚女陪食早餐喎，人都精神啲啦，係咪啊車仔」
「係係係…」
「咁我買嘢食先，一陣再傾〜」
想靜靜地食個早餐都唔得……
「Silvia真係好正喎，白滑長腿喎，你咁都唔溝？」
「我同佢又唔係Ocamp先識，要一齊就一早一齊咗啦」
「次次都係答我呢句，冇嚟新意」
「唔溝都食咗先嘛！！」
「冇興趣」
「兩個傾咩傾到咁大聲呀，我喺嗰邊都聽到你地嗌喇。車仔又講我壞話啊？」
明明我都冇嗌…
「佢點敢講你壞話，一陣你唔陪佢瞓佢就喊㗎喇」
「會唔會係咁啊，我一個人瞓不知幾舒服」我回應。
「咁我派到3人房，佢哋2個人一個菲律賓一個印尼，點住啫，唯有上嚟打攪我個好朋友囉〜」
「啱你囉，工人房」我回應。
「食沙嗲牛啦你〜」
佢又好似平時咁挑晒啲牛肉俾我。
「你哋真係好痴纏，連食個早餐都要分俾對方」Andy對我哋講。
「咁啱我唔食牛肉咋嘛，唔係嘅話點會分俾呢個傻仔」
「唔阻你哋sweet sweet，我上返去打機先」
Andy真係呢…
明知我哋2個係冇嘢嘅，咁都要怕做電燈膽。
「聽雯雯講，你尋晚瞞住我出去見Chloe喎」
「食飯咋嘛，我都好耐冇見過佢啦」
「你個Chloe有冇講咩特別嘢呀？」
「咩我個Chloe，唔鍾意佢呀。不過佢咩都冇講喎，都係問下我最近點咋」
「仲以為佢會同你表白，話要一齊返添」
原本我都驚Chloe會，真係好彩冇咋。
但係佢尋晚講啲嘢真係好似想引我復合咁，搞到我都驚驚地。
「哦，點會，尋晚Chloe話聽阿天講，我喺大學食咗好多女喎，搞到我解釋咗幾耐…」
「佢係咪同你一齊完連智商都低咗。你喎，毒撚車都食到女？」
「歧視我呀而家，你唔計嗰個咁嘅ex嘅話，都係得個肥仔同你表白咋」
「你係咪講書講傻咗啊，我嗰陣不知幾多人同我表白。話時話，講起嗰個肥仔就嬲，真係好嘔心呀，條友揸住……」