《再見了，還會再見嗎？》: 第39章 – 短暫的甜蜜

「又會咁多人嘅呢到……」我自言自語。

呢個係我望到眼前情境嘅第一反應。

「呢到咪啱啱我哋同小雲佢哋一齊坐上嚟嗰個站囉，前幾個月先起好㗎咋，好似叫海洋列車」

「哦，原來就係啱啱坐上山嗰架地鐵。整咗呢架嘢都幾好呀，起碼啲畏高嘅人唔使夾硬去坐纜車。」

不過如果你哋問我，我都係鍾意纜車嗰種喺天上舒舒服服慢慢郁，多過困喺一個密封嘅車卡入面。





「呢樣都真，不過我都係鍾意纜車多啲。嚟得主題樂園就緊係體驗下呢到先有嘅嘢啦，唔通搭地鐵咩」

行去纜車站途中，後面無啦啦有人拍我膊頭。

「啱啱我哋睇到晒你兩個玩“雷霆節拍”啦，估唔到你平時啲弱智都扮得幾真喎」雯雯一邊笑一邊講。

「佢係真係弱智㗎，但唔知點解就係好多女埋身。如果我有車仔一半咁有吸引力就好喇〜」阿天回應雯雯。

「而家你有我仲唔夠咩，你仲想要邊個啊，等我幫你撮合下」雯雯一邊講一邊扭阿天耳仔。





睇住佢哋打情罵俏其實都幾尷尬，不過就真心feel到佢兩個好sweet囉。

「有冇顧過我哋兩個單身嘅感受㗎，睇住你兩條友喺到打情罵俏〜」阿盈開聲插嘴。

「我睇到“雷𩃀節拍“嗰到仲以為……」雯雯回應。

唔通阿盈鍾意我？

應該唔會掛，等我扮傻問下先。





「以為咩啊？」我問大家。

「你輕度弱智就唔好出聲，留心啲聽就得」阿天講完呢句搭一搭我膊頭。

排咗5分鐘到就已經有空嘅纜車。

上到纜車阿盈突然一粒聲都唔出，明明啱啱排隊嘅時候同大家都仲有講有笑。

我諗阿盈應該係畏高啫，所以我決定主動安撫下佢。

「你冇咩事嘛，係咪畏高呀？」

佢冇應我，令到我有啲擔心。

阿盈深呼吸一口氣，然後……

「車仔，我鍾意咗你好耐㗎喇。由你未同班嗰陣已經有留意你，直到知道有機會同你一班，我真係好開心。我知你對我未必有咩感覺，或者你只係當我係普通朋友。不過無論你嘅答覆係點，可唔可以喺呢段短短幾分鐘嘅車程扮我男朋友？」

聽到有女仔對我表白，我真係好意外。

畢竟呢啲事從來都冇發生過。

我都未決定好要點答阿盈好，不過既然佢有要求嘅話我就做咗先啦。

我行咗過去坐喺阿盈隔離，一隻手拖住佢，而另一隻手攬住佢。

「你所講嘅扮男朋友係咪咁做？」我細細聲問阿盈。

佢冇回應我，只係挨咗喺我膊頭上面。





之後嘅成程纜車大家都冇出聲講過嘢，阿盈只係靜靜地挨住我，而我亦將阿盈攬住。

喺阿盈挨住我呢段時間，心入面一直有種甜絲絲嘅感覺，但同時又心如鹿撞咁緊張。

不過甜蜜嘅時光總係短暫，

「差唔多到喇」我對阿盈講。

阿盈不情願地放開拖住我嘅手，再坐返直個人梳返好頭髮。

纜車就快到站時，阿盈對我講咗句嘢，

「啱啱嘅事你當從來冇發生過就得，唔使放喺心太在意。如果你有想講嘅答案，就用行動話俾我知啦」

阿盈對我眨一眨眼就即刻離開咗車廂，漏低咗我自己一個。





我行返出纜車站外面，等埋後面嘅阿天同雯雯。

「阿盈呢？你拒絕咗佢然後嬲到走咗呀？」

佢哋一落車就即刻問我。

「冇呀，佢只係叫我如果有答覆就話佢知咋」我回應。

「都估到係咁，明明都夠膽表白，但係又唔夠膽去聽人哋回應」雯雯講完嘆一嘆氣。

我直頭俾阿盈嚇到窒一窒添啦。

「行啦，一齊過去集隊」