《再見了，還會再見嗎？》: 第40章 – 初戀的煩惱

「乜你去咗揾阿天同雯雯玩啊？」等緊旅遊巴嗰陣小雲問我。

「Errr……啱啱喺纜車站撞到佢兩個啫。係呢，你同Simon兩個玩得開唔開心呀？」

我嘗試問其他嘢轉下話題。

就算同小雲好熟，我都唔敢同佢講啱啱發生過嘅事。

始終都係想俾啲時間自己冷靜下同沉澱下先。





「都幾開心呀，嗰個對腳離地嘅過山車我哋仲玩咗2次，真係好刺激囉。最衰你哋唔知行咗去邊啦，唔係可以一齊玩」

有冇諗過其實我哋根本唔鍾意玩啲咁刺激嘅機動遊戲……

「哈哈，下次先一齊玩啦〜」

當晚返到屋企，我喺床上諗返突如其來發生嘅所有事。

真係咁大個仔都未試過有女仔同自己面對面表白，呢種感覺已經唔係用一般文字形容到。





自問真係唔係咩靚仔，又冇話做啲咩去令人鍾意自己。

但竟然咁都會有人鍾意自己，仲話由我未同班嗰陣已經留意我，都唔知係真定假嘅。

啲人成日都話喺中學點都要拍一次拖，搞到我又心思思想應承阿盈。

不過又諗到自己明明對人哋冇咩feel，應承咗人又會唔會hurt咗人呢，話晒對我哋兩個都係初戀嚟。

初戀應該要留返俾真心鍾意嘅人先啱？





「叮〜」

「叮叮〜」


喺我攤喺床休息緊嘅時候，電腦不斷響起收到訊息嘅聲。

我行咗去電腦嗰邊睇下發生咩事。

「聽日學校假期，我哋出嚟傾下星期去探老人家嗰個活動好冇呀？」Lily喺group問我同Parco。

Parco：「ok，學校等」

Lily：「我唔想著校服啊。我屋企喺學校附近，一係你哋過嚟我嗰到會所啦xddd」





Parco：「冇所謂」

Lily：「車仔呢？」

Parco：「神術召喚，張轟浩〜」

Lily：「你呢啲咩嚟㗎xddd 我諗佢可能冇睇緊電腦啫」

睇完上面啲對話真係有少少尷尬，個Parco係咪睇太多漫畫睇上腦……

我：「Hello~ 我聽日都ok呀」

Lily：「Hello 車仔，咁聽日大家2點喺西鐵站等先啦 xdddd」

我：「好啊」





都係唔好再諗今日發生過嘅事好啲，愈諗就愈複雜。

就算我唔回應，阿盈應該都唔會嬲咗我掛。