《再見了，還會再見嗎？》: 第44章 – 像最初

到底我要點樣面對阿盈呢？

自問對住佢好難用返以前嗰種態度，太關心又怕佢誤會，拒絕咗又怕會連朋友都做唔到。

真係好矛盾。

「車仔，咁認真喺到諗咩啊？」小雲一返嚟就問我。

「冇咩嘅，有啲麻煩事啫」





「咁陪我落去食啲嘢啦，我仲未食早餐」

「哦，好呀」

小雲買完嘢食就過嚟坐低咗。

「我諗緊聖誕約晒大家出嚟玩一日啊，你會唔會嚟呀？」

又諗到聖誕要去嫲嫲屋企，搞到我唔敢應承。





係喎，我叫嫲嫲放我出去玩一日咪得囉。

嫲嫲應該唔會唔俾嘅，我諗。

「我遲啲再話你知啦，我都未知聖誕有咩做」

「好呀，咁我一陣問埋佢哋啦〜」

過咗一陣，





「係呢，我哋好耐冇一齊温書喇，今日你會唔會落去啊？」小雲問我。

「我而家都係日日落去㗎，係你太忙唔嚟咋嘛〜」

「唓，我今日咪嚟囉」

「返上去啦，差唔多打鐘喇」

臨放學嗰陣阿盈行咗過嚟。

望到阿盈行過嚟，都不禁有少少尷尬。

「車仔，下個星期要交個book report喇，你真係唔使我幫手？」

「唔使啦，我都做到七七八八。最多我做完之後再俾你睇一次有冇問題囉」





「咁又唔使，我信得過你啦。況且我都冇睇過本書咁濟，你叫我改入面啲嘢我都改唔到啦」

「車仔，你同阿盈傾完再叫我一齊落去啦〜」小雲拎轉頭講。

「講完喇，行啦〜」我企起身孭起書包。

落到去細房，係久違嘅感覺。

原來好耐都冇試過同小雲咁樣兩個人喺到温書喇。

前排小雲喺Prefect嗰邊又有啲會要開，之後又要忙嗰個數學閱讀報告，再加上我又要去嗰個改進計劃，搞下搞下就冇咗大半個學期。

「你今日想温咩呀？」小雲問我。





「我都係諗住做下數咋，今年暫時每次測驗都仲係滿分。如果考試唔失手，應該有機會拎到科級第一掛」

「今年冇睇你温書一排，又會勁咗咁多嘅」小雲質疑地問。

小雲唔係覺得因為佢唔喺我隔離温書，所以我成績有進步掛……

「唔好諗太多！！其實係因為郭sir真係教得唔係幾好，所以啲同學成績咪冇得再好似以前咁樣大拋離囉」

「但係都係解釋唔到點解你咁叻喎〜」小雲皺起眉頭追問。

「其實仲係因為我成日一有唔識就會問陳sir。最估唔到係就算佢冇再教我哋，佢都仲肯答我嘢」

「話說有日我又係好似而家咁坐喺到做緊數啦，做做下嗰陣遇到條鑽石題，試咗成粒鐘都唔係好做到個part (c)。跟住我咪諗住入去揾郭sir囉，點知佢晨咁早就唔見咗人」

「跟住陳sir喺個位到望到你企喺到，所以就出嚟問你咩事？」小雲問我。





「係啊，你又知嘅……」

「點會估唔到……都冇其他可能啦。唉，認真做陣嘢先……」小雲拎咗本英文書出嚟。

温咗個幾鐘，我哋又好似以前咁出去食啲嘢休息下。

食嘢嘅時候依然有講有笑，但有啲嘢已經唔同咗。

我哋冇再兩個人分一盒維他奶，小雲亦冇再將份西多切好俾我。

唔知係因為我哋嘅關係生疏咗定點呢。

但即使小雲改變咗一啲原先做開嘅行為，我都冇話覺得好奇怪。





諗下諗下，其實應該咁樣先至係正常。

到咗6點幾離開學校嘅時候，小雲都有陪我一齊去西鐵站搭車。

「你聽日會唔會都留喺學校温書啊？」小雲問我。

聽日放學之後要跟改進計劃去探訪老人喎，啫係唔得啦……

「我聽日有啲嘢要做啊…… 後日啦，後日我會留低」我回應。

「咁好啦，聽朝再見，ByeBye〜」

「Bye〜」

今晚喺group到問下聽日個流程係點先……